काठमाडौं ५ वा चितवन १ बाट चुनाव लड्ने स्वर्णिम वाग्लेको तयारी

A+ A A-

अर्थशास्त्री डा. स्वर्णिम वाग्लेले आगामी प्रतिनिधिसभाको निर्वाचनमा प्रत्यक्षतर्फ लड्ने तयारी गरेका छन् ।

प्रतिनिधिसभाको निर्वाचनलाई मध्यनजर गरेर विभिन्न व्यक्तिले उम्मेदवारी घोषणा गरिरहेका बेला अर्थशास्त्री वाग्लेलाई कांग्रेस नेताहरूले काठमाडौं क्षेत्र नम्बर ५ वा चितवन क्षेत्र नम्बर १ बाट चुनाव उठ्ने तयारी गर्न सुझाएका छन् ।

मिति घोषणा भइनसकेको भए पनि मंसिरभित्रै प्रतिनिधिसभाको चुनाव गर्ने सरकारको तयारी छ । निर्वाचन लड्ने तयारीका लागि वाग्लेले यूएनडीपी एसिया प्यासिफिकको प्रमुख आर्थिक सल्लाहकारबाट राजीनामा दिइसकेका छन् । उनी आगामी अगस्टमा नेपाल फर्किंदै छन् ।

अमेरिकाकाे न्युयाेर्कस्थित प्रधान कार्यालयमै बसेर काम गर्नेगरी गत असारमा नियुक्त भएका वाग्ले कांग्रेस शीर्ष नेताहरूसँग परामर्श गरेर अमेरिका गएका थिए । स्थानीय तहको निर्वाचनका क्रममा समेत उनले एक महिना लामो बिदा लिएर सक्रियता देखाएका थिए ।

अहिले काठमाडौं ५ वा चितवन १ बाट निर्वाचन लड्न कांग्रेस नेताहरूको सुझाव आएको वाग्लेले बताएका छन् । त्यसो त उनलाई गोरखाबाट पनि चुनाव लड्ने प्रस्ताव आएको छ । पार्टीको जिल्ला संरचनासँग मिलेर काम गरिरहेका कांग्रेस नेताहरूले गोरखा पनि उनका लागि उपयुक्त निर्वाचन क्षेत्र हुने बताएका छन् ।

काठमाडौं ५ बाट २०७४ सालको निर्वाचनमा कांग्रेस नेता डा. प्रकाशशरण महत लडेका थिए । तर, महत एमाले वरिष्ठ उपाध्यक्ष ईश्वर पोखरेलसँग पराजित भएका थिए । महत यो पटक नुवाकोटबाट निर्वाचन लड्ने तयारीमा छन् । यो क्षेत्रमा निर्वाचन लड्न अन्य केही नेताहरूले चासो राखिरहेको भए पनि वाग्लेको सम्भावना बलियो भएको कांग्रेसका एक पदाधिकारीले बताए ।

'अहिले नामै तोक्ने समय भएको छैन । तर, वाग्लेको बलियो सम्भावना छ, सभापतिज्यूले समेत उहाँलाई कहाँबाट चुनाव लड्ने हो तयारी गर्न भन्नुभएको छ,' कांग्रेसका एक पदाधिकारीले भने, 'उहाँका लागि उपयुक्त स्थान काठमाडौं ५ नै हो ।'

अमेरिका जानुअघि उनले सभापति शेरबहादुर देउवा, नेताहरू विमलेन्द्र निधि, डा. शंशाक कोइराला, प्रकाशमान सिंह, गगन थापा, अर्जुननरसिंह केसीलगायतसँग परामर्श गरेका थिए । 'उहाँ अमेरिका नेताहरूको परामर्श लिएर नै जानु भएको हो, उहाँको व्यक्तिगत लाभभन्दा पनि नेपालको अन्तर्राष्ट्रिय सम्बन्ध तथा नेटवर्क विस्तारमा सहयोग पुग्ने हेतुले अमेरिका जान नेताहरूले सुझाव दिनुभएको थियो,' कांग्रेस केन्द्रीय सदस्य डा. गोविन्द पोखरेलले भने ।

को हुन् वाग्ले ?

स्वर्णिम अहिले यूएनडीपी एसिया प्यासिफिकको प्रमुख आर्थिक सल्लाहकार छन् । यद्यपि उनले यो पदबाट राजीनामा भने बुझाइसकेका छन् ।

सुशील कोइरालाको प्रधानमन्त्रीकालमा उनलाई अमेरिकाबाट बोलाएर योजना आयोगको सदस्यमा नियुक्त गरिएको थियो ।तत्कालीन अर्थमन्त्री रामशरण महत र तत्कालीन सचिव रामेश्वर खनालले समेत आग्रह गरेरपछि अमेरिकाको जागिर छोडेर नेपाल आएर उनले योजना आयोगको सदस्य भएर काम गरेका थिए ।

पुष्पकमल दाहाल प्रचण्डको पालामा उनी दोस्रोपटक योजना आयोगको सदस्य बनेका थिए भने अघिल्लो पटक शेरबहादुर देउवा प्रधानमन्त्री हुँदा वाग्लेले योजना आयोगको उपाध्यक्ष भएर काम गरेका थिए ।

१३औँ महाधिवेशनबाट सभापतिमा निर्वाचित भएपछि देउवाले वाग्लेलाई महासमिति सदस्यमा समेत मनोनीत गरेका थिए । वाग्लेले बूढानीलकण्ठ स्कुल हुँदै लण्डन स्कुल अफ इकोनोमिक्स, हावर्ड विश्वविद्यालयमा अध्ययन गरेका छन् ।

पार्टीको प्रशिक्षण र दस्तावेज निर्माणमा सक्रिय

कांग्रेसको राजनीतिमा विभिन्न लेखरचनामार्फत पार्टीले अघि सारेका अर्थराजनीति र नीतिका विषय पस्किनुका साथै प्रशिक्षण र दस्तावेज लेखनमा उनी सक्रिय रहँदै आएका छन् । उनले कांग्रेसले अघि सारेको र सार्नुपर्ने अर्थ राजनीतिबारे नेता कार्यकर्तालाई प्रशिक्षण दिँदै आएका छन् ।

त्यस्तै २०७०, २०७४ को निर्वाचन र २०७९ को स्थानीय तहको निर्वाचनका क्रममा पार्टीको घोषणपत्र तयार गर्न पनि उनी सक्रिय थिए । पार्टीमा विकास र आर्थिक परिदृष्यको उजागर तथा पार्टीले अघि सार्नुपर्ने मुद्दाका विषयमा पनि उनले परामर्श दिँदै आएका छन् ।

आचार्य र महतको बाटोमा वाग्ले

कांग्रेसको आर्थिक नीति २०४८ सालपछि नेता महेश आचार्य र रामशरण महतले तय गरे । उनीहरूकै सल्लाह र परामर्शअनुसार कांग्रेसले २०४८ सालपछि पहिलो चरणको आर्थिक सुधारको योजना अघि सार्‍यो । अनि कांग्रेसले खुला बजार नीति अवलम्बन गर्‍यो ।

पछिल्लो समय कांग्रेसको अर्थराजनीति र विकास नीतिमा वाग्लेले सहयोग गर्दै आएका छन् । आचार्य र महतले जस्तै अन्तर्राष्ट्रिय छवि कमाएको र अन्तर्राष्ट्रिय निकायको उच्च ओहोदामा बसेर पाएको सुविधा छोडेर राजनीतिमा सक्रिय हुँदैछन् वाग्ले ।

राष्ट्रिय योजना आयोग, सिंगो एसिया क्षेत्र हेर्नेगरी यूएनडीपीको सल्लाहकार भएकाले पनि वाग्लेलाई काम गर्न थप सहज हुने योजना आयोगका पूर्वउपाध्यक्षसमेत भएका नेता पोखरेल बताउँछन् । देशको काम गर्ने प्रणाली, कर्मचारीतन्त्रको अवस्थालगायतका विषयमा जानकार भएकाले पनि राजनीतिमा जम्न सहज हुने पोखरेलको तर्क छ ।

प्रकाशित मिति: शनिबार, जेठ २८, २०७९ १८:११