२ हजार नर्स पठाउन बेलायतसँग श्रम सम्झौता गरिँदै, यस्ता छन् मापदण्ड

A+ A A-

नेपाली नर्सलाई रोजगारीमा पठाउने विषयमा बेलायत र नेपाल सरकारबीच अगामी साता श्रम सम्झौता हुँदै छ । शुक्रबार श्रम, रोजगार तथा सामाजिक सुरक्षामन्त्री कृष्णकुमार श्रेष्ठसँग नेपालका लागि बेलायती राजदूत निकोला पोलिटबीच भएको भेटवार्तामा श्रम सम्झौता गर्ने सहमति तय भएको हो ।

बेलायतको स्वास्थ्यक्षेत्रमा रोजगारीका लागि प्रारम्भमा २ हजार नर्स पठाउने गरी श्रम सम्झौताको खाका तयार भएको श्रम, रोजगार तथा सामाजिक सुरक्षा मन्त्रालयले जनाएको छ । भेटमा श्रममन्त्री श्रेष्ठले वैदेशिक रोजगार विभागको क्षमता अभिवृद्धि, छात्रवृत्तिको अवसरका साथै नर्सिङ कलेजहरूको क्षमता अभिवृद्धिका लागि बेलायत सरकारले सहयोग र रोजगारीमा नर्सका लागि तालिमको व्यवस्था गर्ने अपेक्षा नेपालको रहेको धारणा राखेका थिए ।

आगामी सोमबार मन्त्रिपरिषद् बैठकले बेयालतसँग श्रम सम्झौता गर्ने विषयमा निर्णय गरेसँगै मिति तय हुने श्रम मन्त्रालयले जनाएको छ । नेपाल र बेलायत सरकारबीच हुने श्रम सम्झौतापत्रको तयारीका लागि दुवै देशका तर्फबाट सहभागी प्रतिनिधिको संयुक्त प्रयासबाट सुरक्षा क्षेत्रभन्दा बाहिर पहिलोपटक नेपालीहरूले बेलायतमा रोजगारीको अवसर प्राप्त गर्न लागेका छन् । जापानपछि विकसित देश बेलायतसँग नेपालले श्रम सम्झौता गर्न लागेको हो ।

नेपालभित्र रोजगारीका प्राप्त सम्भावना नभएसँगै वैदेशिक रोजगारीको विकल्प नभएको र विदेशिने कामदारको सुरक्षा, रोजगारी र उनीहरूको स्वास्थ्यजस्ता महत्त्वपूर्ण विषयमा सरकारले गम्भीर भएर श्रम सम्झौता गर्ने श्रममन्त्री श्रेष्ठले बताए ।

श्रम सम्झौता भएपछि रोजगारीका लागि बेलायत जाने नर्सले कुनै पनि शुल्क बुझाउनुनपर्ने गरी सहमति हुने उनको भनाइ छ ।

बेलायतको ‘डिपार्टमेन्ट अफ हेल्थ सर्भिस’ र ‘नेसनल हेल्थ सर्भिस’का प्रतिनिधिका साथै काठमाडौंस्थित बेलायती दूतावासका प्रतिनिधि र नेपाल सरकारका प्रतिनिधिबीच विभिन्न चरणमा छलफल भई श्रम सम्झौतापत्रको मस्यौदा तयार भएको हो ।

यस्ता छन् मापदण्ड

श्रम सम्झौतापत्रको मस्यौदा बनाउन गठित दुवै देशका प्रतिनिधि सम्मिलित समितिले अन्तिम मस्यौदा तयार गरेको छ । उक्त मस्यौदामा नेपाली नर्सको योग्यता, अध्ययनसँगै तालिम, अंग्रेजी भाषा र अनुभवलाई समेटिएको श्रम मन्त्रालयले जनाएको छ ।

रोजगारीका लागि बेलायत जान चाहने नर्सहरूले इन्टरनेसनल इङ्लिस ल्याङ्ग्वेज टेस्टिङ सिस्टम (आईईएलटीएस) परीक्षामा ६ अंक प्राप्त गर्नुपर्ने प्रस्ताव बेलायतले गर्दै आएको थियो ।

तर, दक्षताका आधारमा उनीहरूले आईईएलटीएसमा ५.५ अंक ल्याए पनि मान्यता दिनुपर्ने अडान नेपालको छ । सोहीअनुसार नै मस्यौदाको खाका तयार भएको श्रम मन्त्रालयका एक कर्मचारीले जानकारी दिए ।

नर्सिङ पढेका, अस्पतालमा काम गरिरहेका नर्सहरूलाई अनुभवका आधारमा लैजाने नेपालले प्रस्ताव गरे पनि अन्तिममा इन्टरनेसनल इङ्लिस ल्याङ्ग्वेज टेस्टिङकै आधारमा परीक्षा लिएर मात्र लैजाने गरी मस्यौदा बनेको छ, यद्यपि अनुभवलाई केही मान्यता दिने सर्त भने राखिएको उनले जानकारी दिए ।

नेपालले चाहिँ पुराना मात्र नभए/ नयाँ नर्स (कम अनुभव भएका) र नर्सिङ पढेका मात्र नभएर कार्यानुभव भएकालाई पनि रोजगारीमा लिन बेलायतसँग प्रस्ताव गरेको थियो । नेपालको प्रस्तावअनुसार नै सबैलाई समेट्ने गरी मस्यौदा तय भएको उनको भनाइ छ ।

रोजगारीमा बेलायत जाने नर्सहरूको तलब न्यूनतम ३ लाख रुपैयाँ हुने श्रम मन्त्रालयले जनाएको छ । बेलायत जाने खर्च रोजगारदाता कम्पनीले नै ब्येहोर्नेछ । बेलायतमा नेपालीहरू विभिन्न क्षेत्रमा कार्यरत छन् । यसअघि नै त्यहाँ नेपाली नर्सहरू काम गरिरहेको भए पनि यस्तो संख्या कति छ भन्ने तथ्याङ्क सरकारसँग छैन ।

पहिलो कुरा बेलायतसँग श्रम सम्झौता हुने भएको छ । श्रम सम्झौता भएपछि नेपाली नर्स रोजगारीमा पठाउने बाटो खुल्नेछ । अन्य विषय दुवै देशको सहमतिमा सुधार गर्दै लैजाने श्रममन्त्री श्रेष्ठले जानकारी दिए । नेपालीहरूले अध्ययन गरे पनि अभ्यास कम गरेका होलान् तर, बेलायतमा अस्पतालमा गएर काम गर्न सक्ने श्रममन्त्री श्रेष्ठको बुझाइ छ ।

प्रकाशित मिति: शनिबार, जेठ २८, २०७९ ०७:०५