कुल बजेटको साढे ३२ प्रतिशत असारमै खर्च

A+ A A-

रुपन्देही जिल्लामा आर्थिक वर्ष ०७५/०७६ को असार महिनामा मात्र ३२ प्रतिशत पुँजीगत खर्च भएकाे छ । कोष तथा लेखा नियन्त्रक कार्यालय भैरहवाका अनुसार जिल्लामा आर्थिक वर्षको असारमा मात्रै २ अर्ब ४६ करोड ९३ लाख ८३ हजार रुपैयाँ खर्च भएको हाे । जुन पुँजीगततर्फको कुल बजेटको ३२.३९ प्रतिशत हाे । यसले असारे विकास खर्च बर्सेनी बढेको देखाएकाे छ ।

जिल्लामा पूँजीगततर्फ ७ अर्ब ६२ करोड २६ लाख २७ हजार बजेट निकासा भएको थियो । पुँजीगततर्फ आवमा जम्मा ६ अर्ब ३३ करोड १७ लाख ९९ हजार अर्थात् ८३.०७ प्रतिशत खर्च भएको छ ।

यस्तै, जिल्लामा चालुतर्फ असार १ अर्ब ८१ करोड ४८ लाख ६४ हजार अर्थात् ६.१३ प्रतिशत खर्च भएको छ । चालुतर्फ आवमा २९ अर्ब ५९ करोड ४७ लाख ५९ हजार बजेट छुट्याइएको थियो । आवमा चालुतर्फ २८ अर्ब ४ करोड ४८ लाख अर्थात् ९४.७५ प्रतिशत खर्च भएको छ । चालुको खर्च राम्रो भए पनि पुँजीगत खर्च भने अघिल्लो आवको भन्दा थोरै हो ।

अघिल्लो आव ०७४/०७५ मा जिल्लामा पुँजीगततर्फ ८६.६३ अर्थात् ६ अर्ब ९५ करोड २१ लाख खर्च भएको थियो भने चालुतर्फ ९१.७० प्रतिशत अर्थात् १२ अर्ब ९९ करोड ८४ लाख खर्च भएको कार्यालय प्रमुख चन्द्रप्रसाद भुसालले जानाकारी दिए ।

जिल्लामा आव ०७५/०७६ मा जिल्लामा चालु र पुँजीगत गरी ३७ अर्ब २१ करोड ७३ लाख ८६ हजार बजेट छुट्याइएको थियो ।

कार्यालयका अनुसार जिल्लाका १६ स्थानीय तहको खर्च शतप्रतिशत भएको छ । यस्तै यहाँ सञ्चालित ठूला आयोजनाले पनि विगतको भन्दा विकास खर्च धेरै गरेका छन् ।

बुटवल सभाहल, सिँचाई आयोजना, डिभिजन खानेपानी, व्यापारिक मार्ग, डिभिजन सडक कार्यालयको, संघीय खानेपानी लगायतको बजेट खर्च विगतको भन्दा राम्रो देखिएको कोलनिकाले जनाएको छ ।

प्रकाशित मिति: बिहीबार, साउन २, २०७६ ०५:३३