त्रिभुवन अन्तर्राष्ट्रिय विमानस्थलबाट लुगामा टाँसेर सुन तस्करी, ७ जना पक्राउ

त्रिभुवन अन्तर्राष्ट्रिय विमानस्थलबाट लुगामा टाँसेर सुन तस्करी, ७ जना पक्राउ

A+ A A-

त्रिभुवन अन्तर्राष्ट्रिय विमानस्थलबाट नयाँ तरिकाले सुन तस्करी हुन थालेको तथ्य फेला परेको छ । उपत्यका अपराध अनुसन्धान कार्यालयको टोलीले सुन तस्करीमा संलग्न ७ जनालाई पक्राउ गरेपछि नयाँ त्यस्तो खुलासा भएको हो ।

अपराध अनुसन्धान कार्यालयका प्रमुख वरिष्ठ प्रहरी उपरीक्षक (एसएसपी) वसन्तबहादुर कुँवरका अनुसार पक्राउ पर्नेमा रुपन्देही सैनामैना–१ का ४२ वर्षीया सुरेशबहादुर शाही, बारा जितपुरका २२ वर्षीय निर्मला घलान, २७ वर्षीया चिनियाँ नागरिक लोप्साङ ग्याल्सेन, कपिलवस्तु बाणगंगा–८ का २९ वर्षीय सन्दीप चन्द ठकुरी छन् ।

त्यस्तै, काठमाडौं बूढानीलकण्ठका ४१ वर्षीय राहुल भन्ने वरुणभक्त माथेमा, नवलपरासीका युवराज भुसाल र एक जना भारतीय नागरिक अमन राजपुत पक्राउ परेका छन् ।

पक्राउ परेकाहरूमध्ये सुरेश शाही र सन्दीप चन्द ठकुरीले २१ जेठमा नेपाल वायुसेवा निगमको फ्लाइट नम्बर आरए २३० जहाजबाट अवैध तरिकाले सुन नेपाल भित्र्याका थिए । उनीहरूलाई विमानस्थलको आगमन कक्षबाहिरबाट प्रहरीले पक्राउ गरेको हो ।

यसरी ल्याएका थिए सुन

सुरेश शाही र सन्दीप चन्द ठकुरी छ महिनाअघि दुबई पुगेका थिए । प्रहरीको सोधपुछका क्रममा उनीहरूले कामको सिलसिलामा दुबई पुगेको बयान दिएका छन् । तर, दुवै जना नेपाल फर्किंदा भने अवैध सुनसहित पक्राउ परेका हुन् ।

प्रहरीको अनुसन्धानका क्रममा शाही र ठकुरी नेपाल फर्किने बेला एक जनाले उनीहरूलाई केही थान लुगाकपडा पठाएको खुलेको छ ।

अपराध अनुसन्धान कार्यालयका एसएसपी कुवँर भन्छन्,‘ भीम लाहुरे भनेर एक चिनियाँ नागरिकले शाही र ठकुरीलाई यो लुगा लगाएर जानू । नेपाल पुगेपछि निर्मला घलानलाई सम्पर्क गरेर बुझाउनुहोला, यति गरेबापत १५/१५ हजार रुपैयाँ दिन्छु भनेर पठाएको देखिन्छ ।’

प्रहरीका अनुसार भीम लाहुरेले नेपाल पठाएकै लुगा लगाएर उनीहरू नेपाल पुगेका हुन् । सुरेश शाहीले सर्ट, पाइन्ट र सन्दीप ठकुरीले सर्ट, पाइन्ट, अन्डरवेयर र एउटा भेस्ट लगाएका थिए ।

तर, लुगाको तौल भने स्वाभाविक थिएन । त्यही सूचना प्रहरीको अपराध अनुसन्धान कार्यालयलसम्म पुग्याे । विमानस्थलको आगमन कक्षबाहिर पुगेका शाही र ठकुरीको लुगा जाँच गर्दा भने प्रहरीलाई नै चकित पार्ने गरेर सुनको धुलो पारेर लुगाको भित्री भागमा टाँसेको र बाहिरी अर्को लेयरले छोपेको पत्ता लागेको हो ।

उनीहरूले त्यसरी ल्याएको कपडा रिसिभ गर्न खोज्ने निर्मला घलानसहित अन्य पाँच जनालाई प्रहरीले पक्राउ गरेको हो । पक्राउ परेका ७ जनाबीच भने कुनै चिनजान छैन ।

उनीहरू पाँच रुपैयाँको नोटको फरक–फरक नम्बर देखाएर दुवैबाट नेपाल भित्रिएको उक्त कपडा रिसिभ गर्न आउँदा पक्राउ परेका हुन् । तस्कर समूहले सुरुमा निर्मलालाई बुझाउने सुनको धुलो बनाएर पठाएको लुगा निर्मलाबाट नै लोप्साङ र माथेमा लिन आउँदा उनीहरू पनि पक्राउ परेका हुन् ।

त्यसरी तस्कर समूहले विभिन्न लेयर बनाएर सुनसहितको लुगा भारत पठाउन खोज्ने सात जना प्रहरीको फन्दामा परेका हुन् । उनीहरूको साथबाट बरामद गरेको सुनको धुलो भएको लुगा डढाएर सुन निकाल्दा सन्दीपको साथबाट ५ सय ७२ ग्राम र सुरेशको साथबाट ३ सय १६ ग्राम सुन बरामद भएको छ । पक्राउ परेकाहरू माथि प्रहरीले थप अनुसन्धान जारी राखेको छ ।

प्रकाशित मिति: सोमबार, जेठ २३, २०७९ १४:५४