वैदेशिक रोजगारीमा हिँडेका मुखिया मेडिकल कलेजको शय्यामा छटपटाउँदै

A+ A A-

वैदेशिक रोजगारका लागि कुवेत जान घरबाट बिदावारी भएर हिँडेका धनुषाको जनकपुर उपमहानगरपालिका २२ का ३९ वर्षीय विनोद मुखिया भैरहवास्थित युनिभर्सल मेडिकल कलेजको शय्यामा मृत्युसँग संघर्ष गरिरहेका छन् ।

भैरहवास्थित गौतमबुद्ध अन्तर्राष्ट्रिय विमानस्थलबाट कुवेत उड्न उनी शुक्रबार जनकपुरबाट भैरहवाका लागि रात्रि बसमा चढेका थिए । उनी चढेको बस गन्तव्यमा नपुगी आइतबार बिहान रुपन्देहीको रोहिणी नदीमा खस्यो ।

त्रिभुवन अन्तर्राष्ट्रिय विमानस्थलबाट भन्दा गौतमबुद्ध अन्तर्राष्ट्रिय विमानस्थलबाट कुवेत उडान ८ हजार सस्तो हुने भएपछि मुखियाले भैरहवाबाटै उड्ने निर्णय लिएका थिए । जजिराको फ्लाइट रातिमा हुने भएकाले आज बिहान आए पनि राति मात्रै हिँड्ने योजनामा थिए उनी । ३ सय ७५ किलोमिटरको गन्तव्यका लागि गुडेको उनी सवार बस ३ सय ७१ किलोमिटर जति गुडेपछि दुर्घटनामा पर्‍यो ।

सो दुर्घटनामा ९ जनाको मृत्यु भएको छ भने उनीसहित २३ जना घाइते भएका छन् । जनकपुरबाट भैरहवातर्फ आउँदै गरेको लु२ख ३८४१ नम्बरको बस रोहिणी पुलको रेलिङ तोड्दै नदीमा खसेको थियो ।

वैदेशिक रोजगारीमा गएर परिवार पाल्ने योजनासहित घरबाट हिँडेका मुखिया अहिले युनिभर्सल मेडिकल कलेजको बेडमा पल्टिएका छन् । उनको गर्धनको हड्डी भाँचिएको छ भने देब्रे हात र देब्रे खुट्टामा चोट लागेको छ ।

उनको परिवारको आम्दानी गर्ने प्रमुख व्यक्ति नै मुखिया हुन् । उनका श्रीमती, २ छोरी र १ छोरा छन् । सानासाना सन्तानका बाबु उनी चलमलाउनसमेत नमिल्ने मेडिकल कलेजका तेज केसी बताउँछन् । यहाँ उनीसहित २१ जनाको उपचार भइरहेको छ भने बाँकी घाइतेको भीम अस्पतालमा उपचार भइरहेको रुपन्देही ट्राफिक प्रहरी प्रमुख केशव केसीले जानकारी दिए ।

जिल्ला प्रहरी कार्यालय रूपन्देहीका प्रवक्ता प्रहरी नायब उपरीक्षक नवरत्न पौडेलका अनुसार पश्चिम नेपाल बस व्यवसायी प्रालिमातहत रहेको उक्त बसमा चालक र सहचालकसहित ३३ जना सवार थिए ।

तीमध्ये नौ जनाको मृत्यु भएको छ भने २४ जना घाइते छन् । २५ जना पुरुष, ६ जना महिला र दुई बालिकामध्ये ८ जना पुरुष र १ जना महिलाको मृत्यु भएको छ भने घाइतेको भैरहवास्थित युनिभर्सल कलेज अफ मेडिकल साइन्सेजमा उपचार भइरहेको छ ।

प्रकाशित मिति: आइतबार, जेठ २२, २०७९ १६:१७