दार्चुला कारागारभित्र चौकीदार र नाइकेकाे मेजमानी, जुवातासदेखि लागुऔषधको सुविधा (भिडियोसहित)

दार्चुला कारागारभित्र चौकीदार र नाइकेकाे मेजमानी, जुवातासदेखि लागुऔषधको सुविधा (भिडियोसहित)

A+ A A-

जिल्ला कारागार दार्चुलाभित्रै आपराधिक गतिविधि मौलाउँदै गएको तथ्य फेला परेको छ । कारागारभित्रका नाइके र चौकीदार मिलेर कारागारमै अवैध धन्दा सञ्चालन गरिरहेको फेला परेकाे हो ।

केही वर्षदेखि नै कारागारभित्रका अन्य कैदीबन्दीबाट अवैध रकम असुली गर्ने र गुणस्तरहीन खाना खुवाउने नाइके र चौकीदारको अर्को अवैध धन्दा शिलापत्रलाई प्राप्त भएको छ ।

कारागारका चौकीदार ललित पन्त, नाइकेहरू पदमलाल ठगुन्ना र पुष्पराज जोशीले अवैध धन्दा सञ्चालन गरेका हुन् । पन्त जबर्जस्ती करणीको अपराधमा र ठगुन्ना र जोशी हत्याकाे जघन्य अपराधमा दोषी ठहर भएर जेल पुगेका हुन् ।

उनीहरूले कारागारभित्रै जुवातास खेलाउनेदेखि लागुऔषध चरेसको धन्दा पनि सञ्लान गरेको कैद सजाय भुक्तान गरेर केही दिनअघि मात्रै छुटेका एक जनाले बताए ।

‘कारागारभित्र सबै कुरा हुन्छ । नाइके र चौकीदारलाई पैसा दिए भने मोबाइल फोन ल्याइदिनेदेखि गाँजा, चुरोटसमेत भित्र पुग्छ । भित्रै जुवा खेल्नसमेत मिल्छ,’ ती जेलजीवन भुक्तान गरेका व्यक्तिले भने ।

उनले जेलभित्र तास खेलिरहेको देखि निर्वाध रूपमा फोन गरेको भिडियो र फोटो उपलब्ध गराएका छन् । भिडियोमा चार/पाँच जना तास खेलिरहेका देखिन्छन् । तास खेल्ने समूहमा चौकीदार ललित पन्तसमेत संलग्न छन् ।

तासबाहेक केही कैदीबन्दी कारागारभित्रको कम्पाउन्डमा मोबाइल फोनमा बोलिरहेको देखिन्छ भने कोही कैदी कोठामै मोबाइल चलाइरहेका देखिन्छन् । कारागारभित्र मोबाइल फोन चलाउन बन्देज छ ।

आफन्तसँग संवाद गर्न कारागार प्रमुख जेलरले टेलिफोन उपलब्ध गराएको हुन्छ । जसमा घरपरिवार र आफन्तसँग कुरा गर्ने कैदीले सम्पर्क नम्बर नाम कारागार प्रशासनलाई फोन गर्नुअघि नै टिपाउनुपर्छ ।

प्रशासनको अनुमति पाएपछि मात्रै उनीहरूले फोन गर्न पाउँछन् । तर, दार्चुला कारागारभित्र भने जुवातास र मोबाइल फोन निर्वाध चलाइरहेका छन् । जसले आपराधिक गतिविधि झन् बढाएको छ ।

कारागार प्रमुख जेलर रामराज पन्तले भने आफू कारागारभित्र नियमित अनुगमन गर्न थालेको र आजसम्म कुनै अवाञ्छित गतिविधि गर्ने मानिस फेला नपरेको बताए ।

‘म १५ चैत २०७८ मा जेलरको रूपमा यहाँ आएको हुँ । यसअघि जेलर वीरेन्द्र धामी हुनुहुन्थ्यो । उहाँको पालामा के भयो, मलाई थाहा छैन । केही गुनासाहरू म आउँदाआउँदै पनि आएका थिए । त्यो भिडियो कहिलेको हो, म छानबिन गर्छु,’ जेलर पन्तले भने ।

कारागार व्यवस्था विभागका सूचना अधिकारी रामचन्द्र शिवाकोटीले भने घटना कारागारभित्र नै अवैध जुवातास खेलेको पुष्टि भए आवश्यक कारबाही हुने बताए ।

‘कारागारभित्रै जुवातास खेलेको हो भने आवश्यक कारबाही गर्छौं नै, त्यो विषयमा हामी छानबिन गर्छौं,’ सूचना अधिकारी शिवाकोटीले भने ।

कारागारका एक कैदीले भने यसअघि नै जेलर वीरेन्द्र धामीको मिलेमतोमा नाइके र चौकीदारले अवैध धन्दा चलाएको र त्यो अझै जारी रहेको बताए ।

उसो त देशभरका ७४ कारागारमध्ये अधिकांश कारागारका नाइके र चौकीदारसँगको मिलेमतोमा कारागार प्रशासनले अवैध काम गर्न अनुमति दिने गरेको आरोप लाग्ने गरेको छ ।

४ जेठमा रोल्पा कारागारका कैदी सुन्दर हरिजन चमारले झुण्डिएर आत्महत्या गरेको प्रकरणमा गृह मन्त्रालयले छानबिन समिति नै बनाएको छ । बाँकेको नेपालगञ्ज उपमहानगर– २ का सुन्दर ‘सट्टा’ मा जेल बस्न बाध्य पारिएका कारण आत्महत्या गर्न बाध्य भएको भन्दै गृह मन्त्रालयले छानबिन समिति बनाएको हो ।

प्रकाशित मिति: शुक्रबार, जेठ २०, २०७९ १५:१३