वैदेशिक रोजगारीका नाममा कन्सल्टेन्सीको बढ्दो ठगी, एउटै संस्थाद्वारा करोडौँको ठगी

वैदेशिक रोजगारीका नाममा कन्सल्टेन्सीको बढ्दो ठगी, एउटै संस्थाद्वारा करोडौँको ठगी

A+ A A-

गोरखा बारपाक सुलिकोट गाउँपालिका– ३ बस्ने निशान बगाले रोजगारीको प्रलोभनमा परी शैक्षिक संस्थाबाट ठगिए ।

पीडित बगालेलाई अस्ट्रेलियाको एक प्रतिष्ठित होटलमा मासिक १ हजार डलर तलबको रोजगारीमा लगाइदिने भन्दै काठमाडौं बुढानीलकण्ठ नगरपालिकाका हरिशरण खड्काले १० लाख रुपैयाँ लिए ।

तर, एक वर्षसम्म अस्ट्रेलिया नपठाएपछि उनले प्रहरी र वैदेशिक रोजगार विभागमा उजुरी दिए । बगालेले दिएको उजुरीका सम्बन्धमा विभागले अनुसन्धान प्रक्रिया अगाडि बढाइसकेको छ । तर, अस्ट्रेलिया रोजगारीमा पठाइदिन्छु भन्ने खड्का भने फरार छन् ।

देशभित्र रोजगारी नपाएपछि बेरोजगार भएर बस्नुभन्दा विदेश नै जानु उचित लागेर विदेश जाने तयारी गरेका बगालेले दलालको प्रलोभनमा परी ऋण काढेको पैसा फसाए । अस्ट्रेलियाको नक्कली भिसा देखाएर आफूलाई दलालले फसाएको उनले बताए ।

बगालेजस्तै, धरानकाे बुढासुब्बा चोककी सुनिता रानाले पनि बेलायत रोजगारीमा जाने प्रलोभनमा परेर ११ लाख एजेन्टलाई खुवाइन् । सुनितालाई यूकेमा मौसमी रोजगारीका लागि पठाइदिन्छु भनेर इटहरीकै एक कन्सल्टेन्सीका सञ्चालकले ठगेका रहेछन् । सुनिताले इटहरी बसपार्कनजिकै दर्ता नै नगरी सञ्चालन हुँदै आएकाे कन्सल्टेन्सीका सञ्चालक विदुर अधिकारीलाई पैसा बुझाएकी रहिछिन् ।

यूकेमा कृषिमा मौसमी रोजगारीमा पठाइदिने भन्दै सुनिताबाट चारपटक गरेर ११ लाख रुपैयाँ लिएका अधिकारी अहिले फरार छन् । न्यायका लागि प्रहरीदेखि जिल्ला प्रशासनसम्म धाउँदा पनि कतै उजुरी नलिएपछि अन्तिममा विभागमा आएको रानाले बताइन् ।

कन्सल्टेन्सी सञ्चालक अधिकारीले पूर्वका सयौँ युवालाई यूके र युरोप रोजगारीमा पठाइदिने भन्दै ठूलो आर्थिक ठगी गरे पनि प्रहरीले उनलाई समाउन नचाहेको उनको आरोप छ ।

बेरोजगार भए पनि वैदेशिक रोजगारीमा जाने आसमा पर्दा ठगिएको उनी गुनासो गर्छिन् । सरकारले पनि पीडितभन्दा ठगी गर्ने अपराधीलाई नै संरक्षण गर्छ । ठगिएको उजुरी बोकेर धरान, इटहरीदेखि काठमाडौंसम्म धाउँदा पनि न्याय पाउन नसकेको उनको भनाइ छ ।

बगाले र रानाजस्ता धेरै रोजगारीको खोजीमा रहेका युवा शैक्षिक परामर्श संस्था, ट्राभल एजेन्सी र व्यक्तिबाट ठगिने गरेका छन् । यसरी ठगिएका बेरोजगार युवा प्रमाण नहुँदा न्याय पाउनबाट वञ्चित हुँदै आएका छन् ।

पछिल्लो समय विदेश अध्ययनका लागि विद्यार्थी पठाउन शिक्षा, विज्ञान तथा प्रविधि मन्त्रालयबाट स्वीकृति लिएर खोलिएका शैक्षिक परामर्श संस्थाले वैदेशिक रोजगारीमा कामदार पठाउने भनेर चरम ठगी गरिरहेका छन् ।

कतिपय शैक्षिक परामर्श संस्थाले वैदेशिक रोजगारीमा पठाइदिने भन्दै लाखौँ रुपैयाँ ठगी गरेर सञ्चालक नै फरार हुने गरेको उजुरी वैदेशिक रोजगार विभागमा दिनहुँ पर्ने गरेको विभागको भनाइ छ ।

शैक्षिक परामर्श संस्थाले रोजगारीका नाममा करोडौँ रकम असुल्ने गरेको पाइएपछि यसलाई रोक्न श्रम, रोजगार तथा सामाजिक सुरक्षा मन्त्रालयले मिसन नै चलायो । तर, सफल हुन सकेन ।

विभागले हालै इन्टरनेसनल एक्स्पो एन्ड ट्राभल सर्भिस प्रालि र जिनियस एजुकेसन एन्ड कन्सल्टेन्सी सर्भिस प्रालिले १ सय ४४ जनाबाट साढे ४ करोड ठगी गरेकाे भन्दै वैदेशिक रोजगार न्यायाधिकरणमा मुद्दा दायर गरेको छ ।

शैक्षिक परामर्श सेवाका नाममा खुलेका धेरै संस्थाले वैदेशिक रोजगारीको काम गरिरहेकामध्ये हाल तीनवटाको मुद्दा वैदेशिक रोजगार न्यायाधिकरणमा दायर गरिएको विभागले जनाएको छ ।

शैक्षिक परामर्श संस्था, ट्राभल एजेन्सी र व्यक्तिगतसहित पछिल्लो महिनामा मात्र ४ करोड ९३ लाखको दाबी र सोको हर्जनासहित ७ करोड रुपैयाँबराबरको मुद्दा दायर गरिएको विभागले जनाएको छ ।

रोजगारीको प्रलोभनमा पारी ठगी गर्ने शैक्षिक परामर्श संस्था, ट्राभल एजेन्सी र व्यक्तिहरूलाई कानुनी कारबाही गरिरहेको वैदेशिक रोजगार विभागका महानिर्देशक शेषनारायण पौडेलले जानकारी दिए ।

अन्तर्राष्ट्रिय अध्ययनका लागि विद्यार्थीहरूलाई विदेशका विश्वविद्यालय र कलेजहरूमा पठाउने व्यवसाय गर्ने अनुमति लिएर खुलेका शैक्षिक परामर्श संस्थाहरूले वैदेशिक रोजगारीमा पठाउने भन्दै ठगी गर्दै आएका छन् ।

‘सरकारले वैदेशिक रोजगारीमा कामदार पठाउन म्यानपावर कम्पनीलाई मान्यता दिएको छ । वैदेशिक रोजगार ऐनमा रोजगारीको प्रलोभनमा पारी ठग्ने शैक्षिक परामर्श संस्था, ट्राभल एजेन्सी र अन्य संस्था तथा व्यक्तिहरूलाई कारबाही गर्न समस्या भइरहेको छ । तर, पछिल्लो समय यिनै संस्थाले रोजगारीका नाममा ठगी गर्ने क्रम बढ्दो छ,’ विभागका महानिर्देशक पौडेलले भने ।

उनले थपे, ‘शैक्षिक परामर्श संस्था, ट्राभल एजेन्सी र व्यक्तिबाट ठगिएका कतिपय पीडितसँग प्रमाण हुँदैन । फेरि सरकारले सबै ठगीलाई वैदेशिक रोजगारीसँग जोडेर हेर्न पनि समस्या भइरहेको छ । हाल देखिएका समस्या भने समाधान गरिँदैछ ।’

वैदेशिक रोजगारीका लागि विदेश पठाउने भन्दै चैत र वैशाख महिनामा मात्र १५ करोडभन्दा बढी ठगीको मुद्दा परेको विभागले जनाएको छ । चालु आवको १० महिनामा शैक्षिक परामर्श संस्था, ट्राभल एजेन्सी र व्यक्तिगत रूपबाट ठगिएका उजुरी नै सबैभन्दा बढी परेको विभागले जनाएको छ ।

चालु आवको चैतसम्म औसत मासिक ६ करोड रुपैयाँ बराबरको ठगीका उजुरी पर्ने गरेकोमा चैतमा मात्र १० करोड पुगेको विभागको उजुरी शाखाको तथ्यांक छ । विभागका अनुसार रोजगारीका नाममा शैक्षिक परामर्श संस्था, ट्राभल एजेन्सी र व्यक्तिबाट ठगिएका ३ हजारभन्दा बढी पीडितले विभागमा एक्लै र सामूहिक उजुरी दिएका छन् ।

प्रकाशित मिति: शुक्रबार, जेठ २०, २०७९ १४:३८