गायत्रीसँगको त्रिकोणात्मक प्रेम सम्बन्धले निम्त्याएको जीवनको त्यो बीभत्स हत्या

गायत्रीसँगको त्रिकोणात्मक प्रेम सम्बन्धले निम्त्याएको जीवनको त्यो बीभत्स हत्या

A+ A A-

५ जेठमा काठमाडौं दक्षिणकाली– १, पावर हाउसनजिक बागमती नदी किनारमा सड्न लागेको एउटा शव फेला पर्‍यो । मृतकको टाउकोको भाग मात्रै बाहिर थियो । शवको अन्य भाग भने सिरकको खोल र म्याट्रेसले बेरेर तीन ठाउँमा बाँधेर फालिएको थियो ।

शवलाई सानो बनाउन घुँडा खुम्च्याएर तिघ्रासम्म सलले बाँधिएको थियो । शवको प्रकृति हेर्दा योजनाबद्ध तरिकाले हत्या गरेर फालिएको भनेर शंका गर्न प्रहरीलाई गाह्रो थिएन । शवको मुचुल्ला उठाउन उपत्यका अपराध अनुसन्धान कार्यालय बानेश्वरको प्रहरी टोली र प्रहरी वृत्त कीर्तिपुरको टोली खटिएका थिए ।

मृतकको साथबाट फेला परेका कागजातका आधारमा प्रहरीले शवको पहिचान गर्‍यो । मृतकले घाँटीमा लामाहरूले लगाउने माला, कालो कोट, कालै इस्टकोट र कालो पाइन्ट लगाएका थिए । कोटको खल्तीमा राष्ट्रवादी नागरिक समाजको परिचयपत्र भेटिएको थियो । सो परिचयपत्रमा सिन्धुपाल्लोक बराम्चे– ५, जीवन लामा लेखिएको थियो ।

सोही कागजातका आधारमा अनुसन्धान गरेको उपत्यका अपराध अनुसन्धान कार्यालयको टोलीले शव फेला परेको दुई सातापछि हत्यामा संलग्नहरू तीन जनालाई पक्राउ गर्न सफल भएको छ ।

उपत्यका अपराध अनुसन्धान कार्यालयका प्रखुम वरिष्ठ प्रहरी उपरीक्षक (एसएसपी) वसन्त कुँवरका अनुसार पक्राउ पर्नेहरूमा ललितपुर गोदावरी नगरपालिका– ६ का गायत्री नगरकोटी, मकवानपुर गाउँपालिका– ६ का कान्छामान थोकर र सोही स्थानका दीपक लामा वाइबा छन् ।

उनीहरूमध्ये थोकर र गायत्रीलाई प्रहरीले ६ जेठमै पक्राउ गरेको थियो भने वाइबालाई दुई सातापछि मंगलबार पक्राउ गरेको हो । पक्राउ परेकामाथि प्रहरीले कर्तव्य ज्यान मुद्दामा अनुसन्धान थालेको छ ।

यसरी भएको थियो हत्या

सिन्धुपाल्लोक बराम्चे– ५, जीवन लामा भनिने कान्छा लामा तामाङ राष्ट्रवादी नागरिक समाज पार्टीका सदस्य हुन् । उक्त पार्टी राजसंस्थाबारे आस्था राख्ने पार्टी भए पनि देखिने गरेर सार्वजनिक रूपमै आएको ठूलो पार्टी भने होइन ।

उक्त पार्टीको सदस्यबाहेक ४० वर्षीय जीवन लामा झारफुक गर्ने धामी पनि हुन् । उनकी श्रीमती भने नेपाली सेनाको एक अवकाशप्राप्त जर्नेलको घरमा घरायसी काम गर्छिन् । हत्या आरोपमा पक्राउ परेकी गायत्रीसँगको सम्बन्ध भने जीवनको लामो होइन । तर, गायत्री पनि राष्ट्रवादी नागरिक समाज पार्टीकी सदस्य हुन् ।

एउटै पार्टीका सदस्य भएका कारण उनीहरूको भेट ५ चैतमा प्रचारप्रसारका लागि तराईको पूर्वी जिल्ला भ्रमणका क्रममा भयो । पार्टीको प्रचारमा गएका उनीहरू २२ चैतमा मात्रै काठमाडौं फर्किए ।

त्यही क्रममा गायत्री र जीवनबीच प्रेम सम्बन्ध बढ्यो । ४० वर्षीया गायत्री अविवाहित थिइन् । भक्तपुरको एक घरमा कोठा भाडामा लिएर बसेका जीवनले घरधनीलाई समेत आफ्नी जेठी श्रीमती भनेर नै चिनाएका थिए ।

जीवनले श्रीमती नभएको मौका पारेर गायत्रीलाई २४ चैतको राति आफ्नै कोठामा राखेका थिए । २५ चैतमा गायत्री र जीवन भक्तपुरबाट सँगै सोह्रखुट्टे नयाँबजारस्थित गायत्रीको कोठा पुगे । योबीच उनीहरूको प्रेम झाङ्गिइसकेको थियो । प्रेमलाई विवाहमै टुङ्गाउने उनीहरूको योजना थियो ।

त्यसैका लागि गायत्रीले आफ्नो भाइलाई भेटाउने भन्दै नयाँबजारको विष्णुमती नदी पुलसँगै बनेको बालाजु संरक्षण समिति एवं श्री शिव मन्दिर गंगा पहलमान पौवा परिसरको भवनमा कोठा भाडामा बस्ने मकवानपुरका कान्छामान थोकरको कोठामा पुर्‍याइन् ।

गायत्रीले थोकरलाई भाइ भनेर नै चिनाएकी थिइन् । तर, थोकर र गायत्री साढे दुई वर्षदेखि प्रेम सम्बन्धमा थिए । तर, त्यो सम्बन्ध बाहिर कसैले थाहा नपाऊन् भन्ने उनीहरूको चाहना थियो । जीवनले थोकरलाई गायत्रीकै भाइको रूपमा बुझेका थिए । त्यो दिन उनीहरूको भेटघाट सामान्य रूपमा भएर जीवन आफ्नो कोठा फर्किए ।

गायत्रीसँग जीवनको संवाद निरन्तर थियो । २५ चैतमा पहिलो पटक थोकरको कोठामा पुगेका जीवन दोस्रो पटक गायत्रीलाई श्रीमती बनाएर भित्र्याउने उद्देश्यले २८ वैशाखमा उनको कोठामा पुगे । गायत्रीकै अनुरोधमा जीवन दुलहाझैँ ठाँटिएर कोट पाइन्ट लगाएर थोकरको कोठा पुगे । गायत्रीलाई समेत उनले नयाँ लुगा बोकेका थिए । तर, गायत्री कोठामा थिइनन् ।

जीवन पुगेको केही समयपछि गायत्री मकवानपुरकै अर्का ४० वर्षीय दीपक लामा वाइबा लिएर कोठा पुगिन् । गायत्रीले जीवनसँग विवाह होइन, उनको हत्या गर्ने उद्देश्यले विवाहको आस देखाएर थोकरको कोठामा बोलाएकी थिइन् ।

सोही योजनाअनुसार गायत्रीले प्रचारको बेला आफूलाई जीवनले बलात्कार गरेको र काठमाडौं आएर पनि आफ्नै कोठामा लगेर बलात्कार गरेको भन्दै कुटपिट गरिन् । त्यसपछि दीपक वाइबा, थोकर र गायत्री तीनै जना मिलेर जीवनको टाउकोमा हम्मरले पटक–पटक प्रहार गरेर हत्या गरेको प्रहरी अनुसन्धानले देखाएको छ ।

हत्यापछि जीवनको शवलाई २८ वैशाखको राति बोरामा सिरकले बेरेर विष्णुमती नदीमा फालेका हुन् । प्रहरीको अनुसन्धानले थोकरसँगको गायत्रीको प्रेम र जीवन लामा जोडिँदाको त्रिकोणात्मक सम्बन्धका कारण उनको हत्या हुन पुगेको जनाएको छ ।

प्रकाशित मिति: बुधबार, जेठ १८, २०७९ १७:५८