सगरमाथामा ओलीको तस्वीर फहराउने युवन्तिकालाई हजुरआमाले भनेकी थिइन्– मरिहाल्याै भने नामै रहन्छ

सगरमाथामा ओलीको तस्वीर फहराउने युवन्तिकालाई हजुरआमाले भनेकी थिइन्– मरिहाल्याै भने नामै रहन्छ

A+ A A-

इलामकाे सूर्याेदय नगरपालिका–१०, फिक्कल नयाँ चोककी २८ वर्षीया युवन्तिका तामाङले विश्वकाे सर्वाेच्च शिखर सगरमाथाको चुचुरोमा पाइला टेकेकी छिन् । तामाङले ३० वैशाख शुक्रबार बिहान ६ः५० बजे सगरमाथा शिखरमा पाइला टेकेकी हुन् । उनले एसियन ट्रेकिङको सहयोगमा सगरमाथा आरोहणमा गएकी हुन् ।

बच्चादेखि नै विश्वका अग्ला हिमशृंखला चढ्ने सपना र रहर उनमा थियो । सोहीअनुसार युवन्तिकाले यसअघि ६ हजार १ सय १९ मिटर उचाइको लोगुचे हिमालको सफल आरोहण गरिसकेकी थिइन् । ५ अक्टोबर २०२१ मा सगरमाथानजिकैको लोगुचे आरोहण गरेर फर्किएकी उनले यो वर्ष सगरमाथामा पाइला राखिन् ।

युवन्तिका सगरमाथा शिखरमा पाइला टेक्ने इलामकै पहिलो महिलासमेत बनिन् । हिमाल आरोही युवन्तिका राजनीतिमा समेत सक्रिय छिन् ।

युवा संघ नेपाल जिल्ला सचिवालय सदस्यसमेत रहेकी युवन्तिकाले सगरमाथाको शिखरमा राष्ट्रिय झण्डा र पूर्वप्रधानमन्त्री तथा नेकपा (एमाले) अध्यक्ष केपी शर्मा ओलीको तस्वीरलाई पनि चुचुरोमा फहराएकी छिन् । साथै, उनले युवा संघ नेपालको झण्डासमेत सगरमाथाको चुचुरोमा फहराएर फर्केकी छिन् ।

गत चैतमा इलाम क्षेत्र नम्बर २ का प्रतिनिधिसभा सदस्य सुवासचन्द्र नेम्वाङले तामाङलाई राष्ट्रिय झण्डा र आफ्नो पार्टीको झण्डा प्रदान गरी सगरमाथा आरोहणका लागि बिदाइ गरेका थिए ।

परिवारको सहयोग हिमाल चढ्न ऊर्जा भयो

युवन्तिकालाई हिमशृंखला चढ्न परिवारको पूर्ण रूपमा सहयोग थियो । उनले हजुरआमादेखि अन्य सबै सदस्यको सहयोग पाइन् ।

सर्वोच्च शिखर सगरमाथा चढ्ने प्रथम नेपाली महिला पासाङ ल्हामु शेर्पाबारे विद्यालयमा पढेपछि हिमाल चढ्ने सपना र लक्ष्य बोकेको युवन्तिकाले बताइन् । स्व. शेर्पाले १० वैशाख २०५० मा सगरमाथाको सफल आरोहण गरेर फर्किंदै गर्दा बाटोमै मृत्यु भएको थियो ।

युवन्तिकाले सगरमाथा चढ्न तालिम लिँदालिँदै हजुरआमाले ‘हिमाल चढ्दा–चढ्दै मरिहाली भने यसको नाम चर्चा र साहसी महिलामा गनिने’ भन्दै हौसला दिएको बताइन् ।

हजुरआमाले त्यस्तो भनेको सुनिरहँदा सगरमाथा चढ्ने हौसला झन् बढेको उनी बताउँछिन् । तामाङले परिवारबाट सहयाेग हुँदैन कि डर मनमा भए पनि उत्साहका साथ सहयोग पाएपछि सबै पीडा बिर्सिएर लक्ष्यमा केन्द्रित भएको बताइन् ।

परिवार भनेको ठूलो शक्ति र ऊर्जाको स्रोत हो । परिवारको सहयोग पाएकै कारण सर्वोच्च शिखर सगरमाथामा पाइला टेक्न सफल भएको उनले बताइन् । ‘मेरो परिवार भनेको इलाम पनि हो । इलाम र प्रदेश –१ लाई पर्यटन प्रवर्द्धन र विकासका लागि विश्वका सातवटा अग्ला हिमशृंखला चढ्ने लक्ष्य रहेकाे उनले बताइन् ।

'सर्वोच्च शिखर सगरमाथा चढेँ । अब अरु हिमाल चढ्ने तयारी र योजनामा लागेको छु’, उनले भनिन्, ‘इलामवासीका लागि मेरो आरोहण गर्व गर्ने विषय हो । धेरै इलामेलीले यही भन्दै बधाई दिइरहेका छन् । आँटिली इलामे चेली युवन्तिका भनेको सुन्दा मनैदेखि खुसी लाग्छ ।’

तीन महिना हिमाल चढ्ने तालिम लिएकी उनले सगरमाथा चढ्दा करिब ४० लाख रुपैयाँ खर्च गरेको जानकारी दिइन् । सबै शुभचिन्तकहरूले आर्थिक सहयोग र हौसला दिएकै कारण आफू सफल भएको उनको भनाइ छ ।

‘सर्वोच्च शिखर सगरमाथाको चुचुरोमा पुगेपछि उत्साह हुन्छ । त्यहाँ टेकेपछि यस्तो लाग्छ, यहाँबाट स्वर्गमा पुगेजस्तो हुन्छ । तर, फर्किंदा धेरै जोगिनुपर्ने हुन्छ । धेरै उत्साहले समस्या निम्त्याउन सक्ने रहेछ । सुरक्षित भएर फर्किनुपर्छ’, उनले भनिन् ।

हिमाल चढ्न भनेजस्तो सजिलो त छैन । तर, हिम्मतचाहिँ सहजै रूपमा गर्नुपर्ने उनको सुझाव छ । पत्थरसँगै हिउँ काट्दै पाइला चल्नुपर्छ । यो सम्झिन थाल्यो भने हिमाल चढ्न नसकिने दाबी छ ।

अब इलाममै सक्रिय राजनीतिसँगै समाजसेवामा लाग्ने उनको योजना छ । इलामलाई एउटा पर्यटक हव र कृषिको उत्पादन केन्द्र बनाउन गाउँ–गाउँसम्म पुग्ने उनले बताइन् ।

प्रकाशित मिति: बुधबार, जेठ १८, २०७९ १६:१५