भिजिट भिसाका नाममा मानव तस्करी गर्ने पाँच जना पक्राउ, कराेडाैं ठगीकाे उजुरी

भिजिट भिसाका नाममा मानव तस्करी गर्ने पाँच जना पक्राउ, कराेडाैं ठगीकाे उजुरी

A+ A A-

नेपाल प्रहरीको केन्द्रीय अनुसन्धान ब्युरोले नेपालीहरूलाई भिजिट भिसामा यूएई पुर्‍याई अलपत्र पार्ने मुख्य तस्करहरूलाई विभिन्न स्थानबाट पक्राउ गरेको छ । भिजिट भिसामा मानव तस्करी गर्दै आएका म्यानपावरका एजेन्ट, केही ट्राभल एजेन्सी, कन्सल्टेन्सी र केही व्यक्तिहरूलाई नेपाल प्रहरीले रेड कर्नर नोटिस नै जारी गरेको थियो ।

सोही नोटिसअनुसार मधुविलास सापकोटा, खुमबहादुर खड्का र सन्तोष प्याकुरेललाई पक्राउ गरेको ब्युरोले जनाएको छ । यस्तै, मुख्य अभियुक्त त्रिनेत्र म्यानेजमेन्ट कन्सल्टेन्सीका सञ्चालक कोमलराज उपाध्यायलाई दुई महिनाअघि नै यूएई प्रहरीले दुबईमा पक्राउ गरी थुनामा राखेको छ । ब्युरो प्रहरीले उपाध्यायकी श्रीमती रञ्जनालाई पनि आइतबार सर्लाहीबाट पक्राउ गरेको छ । उनी पनि भिजिट भिसामा नेपालमै बसेर कामदार पठाउँदै आएकी थिइन् ।

उनीहरूले भिजिट भिसाको नाममा करिब २ करोड ५० लाख ठगी गरेको भन्दै ७६ जना पीडितले उजुरी दिएका थिए । ब्युरो प्रहरीका अनुसार पक्राउ परेका व्यक्तिहरूले गएको दुई वर्षमा ५ हजारभन्दा धेरै नेपालीहरूलाई रोजगारीको प्रलोभनमा पारी यूएई पठाएको अनुमान छ । यो विषयमा अध्ययन भइरहेको ब्युरो प्रहरीले जनाएको छ ।

केन्द्रीय अनुसन्धान ब्युरोका एसएसपी कुवेर कडायतले आइतबार श्रम, रोजगार तथा सामाजिक सुरक्षामन्त्री कृष्णकुमार श्रेष्ठलाई भेटी भिजिट भिसामा यूएई पुर्‍याएर अलपत्र पार्ने काममा संलग्न मुख्य अभियुक्तहरूलाई पक्राउ गरिएको जानकारी दिएका थिए ।

उनीहरूलाई रोजगारीका नाममा मानव तस्करी र मानव बेचबिखनसम्बन्धी मुद्दा लगाउने तयारी भइरहेको श्रम मन्त्रालयले जनाएको छ ।

साथै, रोजगारीको प्रलोभन देखाएर नेपाली युवालाई भिजिट भिसामा यूएई पुर्‍याउने कार्यमा संलग्न रहेका अन्य दुई दर्जन ट्राभल एजेन्सी, एजेन्ट र केही व्यक्तिहरूको खोजी भइरहेको अनुसन्धान ब्युरोका एसएसपी कुवेरले श्रममन्त्रीलाई जानकारीसमेत गराएका थिए ।

प्रतिव्यक्ति साढे ३ लाख लिएर तस्करी

यूएईमा आकर्षक रोजगारीमा लगाइदिने भन्दै ‘भिजिट भिसा’मा यूएईसहित विभिन्न मुलुकमा पुर्‍याएर दलालले अलपत्र पारेको उजुरी दैनिक श्रम मन्त्रालयको कल सेन्टरमा आउने गरेको छ ।

यूएई भिजिट भिसामा पुर्‍याइएका नेपाली महिलाहरूलाई खाडीका अन्य देशमा समेत लैजाने गरेको कल सेन्टरमा उजुरी आउने गरेको श्रम मन्त्रालयले जनाएको छ । कल सेन्टरमा दैनिक रोजगारीका नाममा तस्करीमा परेका ४० जनाभन्दा धेरै व्यक्तिले इमेल र फोनमार्फत उजुरी गर्दै आएका छन् ।

भिजिट भिसाका नाममा तस्करीमा परेका व्यक्तिसँग सम्बन्धित एजेन्ट र दलालले प्रतिव्यक्ति साढे ३ लाखभन्दा बढी लिने गरेको अनुसन्धानका क्रममा भेटिएको वैदेशिक रोजगार विभागले जनाएको छ ।

विभागका अनुसार भिजिट भिसामा जाने व्यक्तिलाई नक्कली कम्पनीको डिमाण्ड तयारी गरेर ठगी गरेको समेत पाइएको विभागले जनाएको छ । अलपत्र परेर फर्किएका व्यक्तिले नगद नै ५ लाखसम्म तिरेको उजुरी र समस्या लिएर धाउने गरेको विभागका महानिर्देशक शेषनारायण पौडेल बताउँछन् ।

पछिल्लो समय श्रम मन्त्रालयले विभागमा प्रहरीको सेल नै राखेर रोजगारीका नाममा भइरहेको ठगी, तस्करी र अन्य विकृति नियन्त्रण गर्न प्रहरी परिचालन गर्दै आएको छ । विभाग र प्रहरीले पछिल्लो समय रोजगारीका नाममा मानव तस्करीमा संलग्न २५ जनाभन्दा धेरै दलाल पक्राउ गरेर मुद्दा चलाइएको विभागले जनाएको छ ।

भिजिट भिसाका नाममा मानव तस्करी गर्ने म्यानपावर कम्पनी, कन्सल्ट्यान्सी, ट्राभल्स सञ्चालक, दलाल र बिचौलियालाई कारबाहीको दायरामा ल्याएर कारबाही गरिने श्रम, रोजगार तथा सामाजिक सुरक्षामन्त्री कृष्णकुमार श्रेष्ठले बताए । रोजगारीका नाममा भइरहेको मानव तस्करी र अन्य विकृत्ति नियन्त्रण गर्न सम्बन्धित निकायलाई निर्देशन दिइसकिएको उनको भनाइ छ ।

प्रकाशित मिति: मंगलबार, जेठ १७, २०७९ १३:५२