यार्सा संकलकसँगै लेकमा बास बसेर तारा एयरको दुर्घटनाग्रस्त जहाज भेट्टाएका सुमित (भिडियो)

यार्सा संकलकसँगै लेकमा बास बसेर तारा एयरको दुर्घटनाग्रस्त जहाज भेट्टाएका सुमित (भिडियो)

A+ A A-

आइतबार बिहान बेपत्ता भएको तारा एयरको विमान २४ घण्टापछि मुस्ताङको थासाङ गाउँपालिका– २, मानापाथी हिमालनजिकैको पहाडमा फेला पर्‍यो ।

स्थानीय सुमित गौचन र यार्सा टिप्न गएका किसानहरूले दुर्घटनास्थल पत्ता लगाएका थिए । उनीहरूले सोमबार बिहान दुर्घटनास्थल पहिचान गरेर खबर गरेपछि सेनाको हेलिकोप्टरसहित उद्धार टोली घटनास्थल पुगेको थियो । तर, आइतबार मौसमको खराबीले हेलिकोप्टर र पैदल गएको सुरक्षाकर्मीको टोलीले जहाज फेला पार्न नसकेपछि फर्किएको थियो ।

यसरी पत्ता लाग्याे दुर्घटनास्थल

मानापाथी हिमालनजिक दुर्घटना भएको आशंकापछि थासाङका सुमित गौचनसहितको युवा टोली पनि जहाजको खोजीमा जुट्यो । सिमसिम पानी परिरहेकाे र कुहिराेले नजिकैको मानिस पनि देख्न मुस्किल थियो । उनको टोलीले पनि आइतबार साँझसम्म दुर्घटनास्थल पहिचान गर्न सकेन । सँगै गएका साथीहरू बीच बाटोबाटै फर्किए । तर, सुमितको मन फर्किन मानेन ।

उनी अझै खोज्न उकालो लागे । ६ घण्टाको जंगलको बाटो पैदल हिँडेपछि उनी यार्सा संकलकहरू भएको ठाउँ पट्केमा पुगे ।

सुमित गौचन ।

सुमितले भिडियोमा बेलुका भनेका छन्, ‘४ हजार ५ सयको उचाइमा छु । खाना खाएको छैन । यहाँ हाम्रो दाइभाइ हुनुहुन्छ । ६ घण्टा जंगलको बाटो हिँडेर आइपुगेको छु । अरु साथी फर्किए ।’

सोमबार बिहान ५ बजे नै दुर्घटनास्थलमा पुग्ने लक्ष्यसहित उनी यर्सा संकलकको पालमा ओत लागेर बसे । ‘बिहान ५ बजे उठेर दुर्घटनास्थलमा पुग्छौँ । यहाँबाट दुर्घटनास्थल पुग्न २ घण्टा जति लाग्छ । पुगेपछि जिल्ला प्रहरी कार्यालयमा खबर गर्छौं,’ सुमितले भिडियोमा भनेका छन् ।

बिहान ५ बजे नै उनीसहित यार्सा संकलक टाेली घटनास्थलतर्फ लाग्यो । उनको टोलीले मानापाथी हिमालनजिकै सानोसरे भन्ने ठाउँमा दुर्घटनाग्रस्त जहाज फेला पार्‍यो । सुमितले सोमबार बिहान ७ बजे थासाङ गाउँपालिकाका अध्यक्ष प्रदीप गौचनलाई फोनबाट जहाज भेटिएको जानकारी गराए । त्यसपछि सेनाको हेलिकोप्टरसहितको टोली फेरि दुर्घटनास्थलतर्फ गयो ।

यार्सा टिप्न गएका व्यक्तिहरूकाे भनाइ उद्धृत गर्दै गाउँपालिका अध्यक्ष गौचनले भने, ‘यार्सा टिप्ने भाइहरूको टाउकै नजिकबाट जहाज उडेको रहेछ । त्यसपछि मानापाथी हिमाल नजिकैको पहाड सानोसरेमा गएर ठोक्किएछ । सुमितले बिहान ७ बजे जहाज भेटिएको जानकारी गराएका थिए ।’

अहिले पनि उद्धारको काम भइरहेको छ । अध्यक्ष गौचनका अनुसार, अहिलेसम्म १६ जनाको शव फेला परेको छ भने १० जनाको शव कोबाङ ल्याइसकिएको छ । ‘शव खोज्ने काम भइरहेको छ । अप्ठ्यारो पहाड भएकाले खोज्न कठिन भएको हो,’ उनले भने ।

भेटिएका शव भने काठमाडौं ल्याउने तयारी भइरहेको छ । जहाजमा चालक दलका तीन सदस्यसहित १९ यात्रु थिए । पोखराबाट आइतबार बिहान ९ः५५ बजे जोमसोमका लागि उडेको तारा एयरको ९ एनएईटी विमान बिहान १०ः०७ बजे जोमसोम विमानस्थलको टावरबाट सम्पर्कविच्छेद भएपछि दुर्घटनामा परेको थियो ।