अमेरिकामा पीएचडी गर्दै गरेका दिदीबहिनी आमाबुबासहित मुक्तिनाथ दर्शन गर्न उडेका थिए जाेमसाेम

अमेरिकामा पीएचडी गर्दै गरेका दिदीबहिनी आमाबुबासहित मुक्तिनाथ दर्शन गर्न उडेका थिए जाेमसाेम

गणेशनाराणय र रश्मी

A+ A A-

मुस्ताङमा बेपत्ता भएको तारा एयरको विमान सोमबार बिहान दुर्घटनाग्रस्त अवस्थामा फेला परेको छ । विमानमा चालक दलका तीन सदस्यसहित २२ जना सवार थिए । उनीहरू सबैकाे दुर्घटनामा ज्यान गएको छ ।

पोखराबाट मुस्ताङको जोमसोमका लागि उडेको तारा एयरको ९ एन एईटी विमान आइतबार बिहान १०ः०७ बजे जोमसोम विमानस्थलको टावरबाट सम्पर्कविच्छेद भएको थियो । विमान मुस्ताङको थासाङ गाउँपालिका– २ मा मानापाथी हिमालको फेदमा दुर्घटनाग्रस्त अवस्थामा फेला परेको हो ।

दुर्घटनामा परेर पाइलट प्रभाकर घिमिरे, को–पाइलट उत्सव पोखरेल र एयर होस्टेज किस्मी थापाले ज्यान गुमाएका छन् । उनीहरू बाहेक गोरखा शहीद लखन गाउँपालिका–५ तीनमानेका स्थानीयवासी गणेशनारायण श्रेष्ठको परिवारका चार जना पनि विमान दुर्घटनामा परेका छन् ।

दुर्घटनामा परेर मृत्यु हुनेमा गणेशनाराणयसहित उनकी श्रीमती रश्मी, छोरीहरू रोजिना र रविनाको विमान दुर्घटनामा ज्यान गएको छ । शहीद लखन गाउँपालिका अध्यक्ष रशेमबाबु थापा मगरका अनुसार उनीहरू पारिवारिक घुमघामका लागि मुस्ताङ उडेका थिए ।

‘गणेशनारायणका छोरीहरू दुवै जना अमेरिका थिए । केही दिनअघि मात्रै नेपाल आएका हुन् । नेपाल आएको मौकामा मुक्तिनाथ दर्शन गर्ने भनेर गएका रहेछन्,’ अध्यक्ष मगरले भने ।

रोजिना र रविना ३० वैशाखमा मात्रै अमेरिकाबाट नेपाल आएका थिए । परिवारिक स्रोतका अनुसार ५ वर्ष पहिला अमेरिका पुगेकी रोजिना जेनेटिक विषयबाट पीएचडी गर्दै थिइन् भने रविना इन्फर्मेसन टेक्नोलोजी (आईटी) पढ्दै थिइन् । रविना एक वर्षअघि मात्रै अमेरिका गएकी थिइन् ।

गणेशनारायणका दुई छोरीसहित एक छोरा छन् । छोरा रोशन पनि अमेरिकामै बस्दै आएका छन् । पेसाले कम्प्युटर इन्जिनियर गणेशनाराण पछिल्लो समय काठमाडौंको बागबजारमा असिफ सञ्चालन गरेर बसेका थिए ।

दुवै छोरीहरू अमेरिकाबाट नेपाल आएपछि उनीहरूकै आग्रहमा मुस्ताङ उडेका थिए । विमान दुर्घटना परेको खबरपछि अमेरिकामा रहेका छोरा रोशन नेपाल फर्किंदैछन् । श्रेष्ठका आफन्त विजय पुडासैनीले रोशन नेपाल फर्किएरहेकाे जानकारी दिए । ‘रोशन नेपाल फर्किंदैछ । आज बेलुकासम्म पुग्छ हाेला', उनले भने, 'गाउँमा श्रेष्ठको परिवार शिक्षित परिवारका रूपमा कहलिएकाे थियाे । उनीहरूको दुर्घटनाको खबरले गाउँ नै शाेकमा डुबेको छ ।’