अब १५ लाख वृद्धवृद्धाका हातमा ४ हजार भत्ता पुग्ने, दुई वर्ष उमेर घटाउँदा २ लाख लाभान्वित थपिए

अब १५ लाख वृद्धवृद्धाका हातमा ४ हजार भत्ता पुग्ने, दुई वर्ष उमेर घटाउँदा २ लाख लाभान्वित थपिए

A+ A A-

सरकारले साउनदेखि ६८ वर्षकै उमेर वृद्धभत्ता दिने भएको छ ।

प्रधानमन्त्री शेरबहादुर देउवाको विशेष जोडबलमा वृद्धभत्ता पाउने उमेर घटाइएको हो । यसअघि देउवा प्रधानमन्त्री हुँदा ६५ वर्षमा वृद्धभत्ता दिने घोषणा गरेका थिए । तर, त्यसपछिको सरकारले यो निर्णय उल्ट्याएको थियो ।

पाँचदलीय गठबन्धनको नेतृत्व गरेर प्रधानमन्त्री बनेपछि देउवाले पुनः सोही कार्यक्रम दोहोर्‍याउन पहल थालेका थिए । वृद्धभत्ता पाउने उमेर ६५ वर्षमा झार्ने तयारी गरिए पनि विज्ञ र अर्थका अधिकारीले दीर्घकालीन खर्च धेरै बढ्ने सुझाव दिएका थिए ।

अहिले ७० वर्षलाई ६८ वर्षमा झारिएसँगै वृद्धभत्ताबाट लाभान्वित हुनेको संख्या एकैपटक करिब २ लाखले बढेको छ । पञ्जीकरण विभागका अनुसार अहिले १३ लाख ८ हजार जना ७० वर्ष उमेर पुगेका नागरिक वृद्धभत्ताको सामाजिक सुरक्षा कार्यक्रमबाट सूचिकृत छन् ।

पञ्जीकरण विभागका अधिकारीका अनुसार ६५ देखि ७० वर्ष उमेर समूहका ५ लाख नागरिक र ६८ देखि ७० वर्ष उमेर समूहका २ लाख भएको तथ्यांक संकलन गरिएको छ ।

यसअघि ६५ वर्षमा वृद्धभत्ता दिन र एक हजार बढाउँदा बढ्ने भारको विषयमा पञ्जीकरण विभागसँग जानकारी मागिएको थियो । पञ्जीकरण विभागले वार्षिक करिब ३५ अर्ब भार थपिने आकलन गरेको थियो । यसमा थप एक हजार वृद्धभत्ता पनि जोडिएको थियो ।

'भत्ता नबढाई २ वर्ष उमेर घटाउँदा वृद्धभत्ता लिनेको संख्या करिब २ लाख बढ्ने अनुमान गरिएको,' पञ्जीरकण विभागका एक अधिकारीले भने, 'हाम्रो आंकलनअनुसार करिब २ लाख ६८ वर्षे व्यवस्थाले बढेका छन् । सरदर आयु बढेका कारण ७० वर्षमाथिको जनसंख्या पनि प्रत्येक वर्ष बढ्दो छ ।'

अहिलेको अवस्थामा वृद्धभत्ता दिने उमेर ६८ वर्षमा झार्दा वार्षिक ८ अर्बको दायित्व भार थपिएको छ ।

सामाजिक सुरक्षाका कार्यक्रममध्ये सबैभन्दा बढी वृद्धभत्तामा व्यभार थपिएको छ । अहिले सामाजिक सुरक्षा भत्ताबाट लाभान्वित हुनेमा ३६ प्रतिशत वृद्धवृद्धा रहेका छन् भने २२ प्रतिशत क्षेत्र तोकिएका बालबालिका रहेका छन् ।

सामाजिक सुरक्षा योजनामा मात्रै कर्मचारीको निवृत्तिभरणसहित सरकारले वार्षिक २ खर्ब ५४ अर्ब रुपैयाँ भन्दा बढी बजेट खर्च गर्दै आएको छ ।

प्रकाशित मिति: आइतबार, जेठ १५, २०७९ १८:१९