संसारका भयानक ९ विमान दुर्घटना

A+ A A-

पोखरादेखि मुस्ताङका लागि उडेकाे तारा एयरको ट्विनअटर विमान आज बिहानैदेखि सम्पर्कविहीन छ । विमान मुस्ताङको मानापाथी हिमालको फेदीमा दुर्घटनामा परेकाे आशंकामा खाेजी भइरहेकाे छ ।विमानमा सवार २२ जनाकाे अवस्थाबारे आधिकारिक जानकारी प्राप्त छैन ।

धेरै हवाई दुर्घटना हुने मुलुकहरूकाे सूचीमा नेपाल पनि पर्छ । नेपाली आकाश असुरक्षित भनेर युरोपबाट नेपालले प्रतिबन्ध नै झेल्नुपरेकाे छ । ७३ वर्षकाे यात्रा पूरा गरिसकेकाे नेपाली हवाई क्षेत्र मात्र हाेइन, इतिहास हेर्ने हो भने युराेपसहित संसारका अन्य ठाउँमा नेपालका भन्दा भयानक दुर्घटना भएका छन् । यहाँ नेपालसहितका विभिन्न देशमा भएका ९ दुर्घटनाबारे संक्षिप्त चर्चा गरिएको छ ।

ताजिक एयर

२८ अगस्ट १९९३ । ताजिक एयरको एउटा विमान खोरोग एयरपोर्टको रनवेबाट टेक अफ गरिरहेको थियो । तर, त्यसले टेक अफमा बढी समय लियो । ढिलो गरी उडान भरेको विमान ओभर लोड भएपछि क्र्यास भयो । जसमा ८६ यात्रु थिए । तीमध्ये ५२ यात्रुको ज्यान गयो । यसलाई ताजकिस्तानको सबैभन्दा भयानक दुर्घटना मानिएको छ ।

एयर इन्डिया

१६ अगस्त १९९१ । एयर इन्डिया फ्लाइट २५७ बोइङ ७३७ । यो एउटा सर्ट डिस्टेन्स फ्लाइट थियो । इम्पाल एयरपोर्टका लागि यो कोलकाताबाट १२ बजे उडेको थियो । तर, पौने १ बजे इम्पाल एयरपोर्टसँग यसको सम्पर्क टुट्यो । जब फ्लाइट २५७ इम्पाल एयरपोर्टमा ल्याण्ड हुनका लागि तल झुकिरहेको थियो । अचानक त्यसले आफ्नो सन्तुलन गुमायो र जोडसँग जमिनमा खस्यो । यो घटनामा विमानमा सवार सबै ६३ जना यात्रुकै मृत्यु भयो ।

एयर फ्रेन्च

२६ जून १९८८ । एयर फ्रेन्च फ्लाइट २९६, एयरबस ए ३२० । यो दुर्घटना धेरै मानिसको आँखैअगाडि भएको थियो । उडान भर्ने क्रममा एउटा रुखमा ठोक्किएर यो विमान क्र्यास भएको थियो । यो घटनामा थुप्रै यात्रुले ज्यान गुमाए भने ५० भन्दा बढी यात्रु घाइते भए ।

एक्स ५०

४ डिसेम्बर २००३ । बोइङ एक्स ५० ए । यो एयरक्राफ्ट उडान भरेपछि आफ्नो रनवेमा ल्याण्ड गरिरहेको थियो । तर, यसले प्राविधिक खराबीका कारण सन्तुलन गुमायो र जमिनमा खसेपछि यसको प्रोपाइओसमा आगो लाग्यो । यो घिस्रिँदै अघि बढिरहेको थियो । त्यही समयमा विमानकाे फ्लेन्ज बाहिर निस्कियो र इन्जिनमा आगो लाग्नबाट जोगियो । यो दुर्घटनाबाट सबै यात्रु बाँच्न सफल भए ।

बाेइङ ७२७

२७ अप्रिल २०१२ । बोइङ ७२७ । विमान आकाशबाट जमिनमा खसेर ४ टुक्रा भयो । यो फ्लाइट क्र्यास एउटा ‘प्लान्ड क्र्यास’ थियो । प्लान्ड क्र्यास अर्थात् एउटा परीक्षण थियो । त्यो विमानमा कोही यात्रु थिएनन् । डिस्कभरी च्यानलले यो परीक्षण गरेको थियो । जब कुनै प्लेन क्र्यास हुन्छ, त्यस्तो अवस्थामा मान्छे कसरी बाँच्न सक्छ, भन्ने थाहा पाउन क्र्यास गराइएकाे थियाे । यो परीक्षणमा खासगरी प्लेनभित्र धेरै प्रकारका क्यामेरा जडान गरिएको थियो । प्यासेन्जरको सिटमा मान्छेका रूपमा डमीलाई बसाइएको थियो ताकि यो हेर्न सकियोस् । क्र्यासको समय यात्रुको मुभमेन्ट कस्तो हुन्छ, त्यो डमीको बडी कता ढल्किन्छ, त्यहीअनुसार प्लेनको आन्तरिक संरचना विकास गर्न सकियोस् । टेक अफको समय यो प्लेनमा पाइलट त थिए तर क्रयास गराउनुअघि नै पाइलट प्लेनबाट निस्किसकेका थिए । त्यसपछि रिमोर्टमार्फत प्लेनलाई चलाइएको थियो । परीक्षण भए पनि यो निकै भयानक थियो ।

बेल्जियम एयरफाेर्स

२४ अप्रिल २००२ । बेल्जियम एयरफोर्स । स्टन्ड प्राक्टिसका क्रममा यसको इन्जिनमा आएको खराबीले यो विमान जमिनतिर झर्न थाल्यो । पाइलटले यसलाई नियन्त्रण गर्ने प्रयास गरे पनि अन्ततः यसको पछाडिको भाग जमिनमा ठोक्कियो । त्यसपछि प्लेनमा आगो लाग्यो । प्लेनमा आगो लागेका कारण ३ जना पाइलट प्यारासुटबाट फाल हाने । तीमध्ये २ जना सकुशल रहे भने १ पाइलटलाई गम्भीर चोट लाग्यो ।

ट्रान्स एसिया एयरवेज

४ फेब्रुअरी २०१५ । ट्रान्स एसिया एयरवेज । विमानमा लगभग ५८ प्यासेन्जर थिए । सङसाङ एयरपोर्टबाट कीलुङ रिभरको आकाश हुँदै गइरहेको थियो । यो प्लेन टेकअफ भएको ३ मिनेटभित्रै पाइलटको सम्पर्क रेडियो टावरसँग टुटेको थियो । प्लेन जमिनमा खस्दै गरेको दृश्य हाइवेमा यात्रा गरिरहेका कैयौँ मानिसले आफ्ना क्यामेरामा कैद गरेका थिए ।

पाकिस्तान एयरलाइन्स

काभ्रेको भट्टेडाँडामा सन् १९९२ मा पाकिस्तान एयरलाइन्सको एयरबस–३१० जहाज खसेकाे थियाे । जसमा परी एक सय ५७ जनाकाे मृत्यु भयाे । भट्टेडाँडामा भएको दुर्घटना नेपालमा अहिलेसम्म भएकामध्ये सबैभन्दा ठूलो हवाई दुर्घटना मानिन्छ । त्यही वर्ष नुवाकोटको घ्याङफेदीका थाई एयरवेजको विमान दुर्घटना भएर एक सय १३ जनाले ज्यान गुमाएका थिए ।

यूएस-बंगला

याे दुर्घटना त्रिभुवन अन्तर्राष्ट्रिय विमानस्थलमा मार्च २०१८ मा भएकाे थियाे । बंगलादेशबाट काठमाडाैं आएको यूएस-बंगला एयरलाइन्सको विमान त्रिभुवन विमानस्थलमा क्र्यास भएकाे थियाे । दुर्घटनामा परी विमानका सबै ५१ जना यात्रुकाे मृत्यु भएकाे थियाे ।

प्रकाशित मिति: आइतबार, जेठ १५, २०७९ १८:४१