बागमतीमा बजेटपछि सरकार परिवर्तनको संकेत, मुख्यमन्त्री बन्लान् बानियाँ ?

A+ A A-

बागमती प्रदेशमा सरकार परिवर्तन हुने संकेत देखिएको छ । गठबन्धनका दलबीच भएको पूर्ववत् सम्झौताअनुसार सरकार परिवर्तनको गृहकार्य भइरहेको हो ।

बागमतीमा हाल गठबन्धनको नेकपा (एकीकृत समाजवादी) ले सरकारको नेतृत्व गरिरहेको छ । गत ११ कात्तिकमा एकीकृत समाजवादीका केन्द्रीय उपाध्यक्षसमेत रहेका राजेन्द्रप्रसाद पाण्डे बागमतीको मुख्यमन्त्रीमा नियुक्त भएका थिए । अब गठबन्धनको नेपाली कांग्रेसले प्रदेश सरकारको नेतृत्व गर्ने दाबी गरिरहेको छ । कांग्रेसबाट संसदीय दलका नेता इन्द्रबहादुर बानियाँ मुख्यमन्त्री बन्ने कांग्रेस स्रोतले जानकारी दिएको छ ।

११ कात्तिकमा पाण्डे मुख्यमन्त्री बन्नुअघि आर्थिक वर्ष २०७९/०८० को बजेट ल्याएपछि सरकारको नेतृत्व हस्तान्तरण गर्ने गरी लिखित सहमति भएको कांग्रेस स्रोतको दाबी छ । सोही सहमतिअनुसार सरकार परिवर्तन हुनुपर्ने कांग्रेसको अडान छ ।

‘हालका मुख्यमन्त्री पाण्डे र बानियाँबीच काठमाडौंमा सहमति भएको हो । बजेट ल्याएपछि सरकारको नेतृत्व हस्तान्तरण गर्ने र त्यसपछि चुनावी सरकार कांग्रेसको नेतृत्वमा हुने सहमति भएको हो । सहमतिअनुसार अब बानियाँ मुख्ममन्त्री बन्नुहुन्छ,’ कांग्रेस स्रोतले शिलापत्रसँग भन्यो ।

मुख्यमन्त्री पाण्डेले भने आधा–आधा कार्यकाल सरकार चलाउने सहमति नभएको बताउँदै आएका थिए । शुक्रबार प्रदेशसभामा कुरा गर्दै पाण्डेले सरकार परिवर्तनबारे केन्द्रको निर्णय मानेर अघि बढ्ने प्रतिक्रिया दिए ।

विगतको सहमतिअनुसार सरकार परिवर्तन हुने सम्भावना कति छ ? भनेर प्रश्न गर्दा पाण्डेले भने, ‘सरकार परिवर्तन भएपछि थाहा पाइहाल्नु हुन्छ नी । केन्द्रले जे निर्णय गर्छ त्यही हुने हो । प्रदेशले भनेर हुने पनि होइन ।’ पाण्डेले सहमति नभएको आफ्नो पुरानो दाबीलाई शुक्रबार भने दोहोर्‍याएनन् ।

भावी मुख्यमन्त्रीका रूपमा चर्चा भएका बानियाँ भने सरकार परिवर्तन हुने विगतको सहमति कार्यान्वयन हुनुपर्ने बताउँछन् । ‘पहिला सम्झौता जे अनुसार भएको हो, त्यही कार्यान्वयन हुनु पर्दछ । सम्झौताअनुसार गठबन्धन सरकार अगाडि बढ्छ,’ बानियाँले भने, ‘राजनीतिमा सम्झौता, समझदारी र विश्वास भन्ने हुन्छ । राजनीतिक संस्कारअनुसार त्यसलाई पालना गर्नुपर्छ ।’

उनले सम्झौताबारे प्रष्ट नखुलाए पनि सरकारको नेतृत्व कांग्रेसले गर्न पाउनुपर्ने शिलापत्रलाई बताए । बानियाँले सम्झौता कार्यान्वयन नभए नेकपाकालीन केपी शर्मा ओली-प्रचण्ड प्रकरण दोहोरिने चेतावनीसमेत दिए ।