कुवेत र कतारमा ३२ डिग्री तापक्रममा काम लगाउन पाइँदैन, ४० डिग्रीमा काम गर्न बाध्य नेपाली

कुवेत र कतारमा ३२ डिग्री तापक्रममा काम लगाउन पाइँदैन, ४० डिग्रीमा काम गर्न बाध्य नेपाली

A+ A A-

कतार र कुवेतमा कार्यरत श्रमिकलाई गर्मीयाममा ३२ डिग्रीभन्दा माथिको तापक्रममा काम लगाउन प्रतिबन्ध लगाइएको छ । यी देशले श्रम कानुनमै यो नियम बनाएर कार्यान्वयनमा ल्याएका छन् ।

कतार र कुवेत रोजगारीमा कार्यरत विदेशी कामदार भने अहिले पनि ४० डिग्रीभन्दा धेरै तापक्रममा काम गर्न बाध्य रहेको पश्चिमा सञ्चारमाध्यमहरूले औँल्याउँदै आएका छन् ।

कतारको प्रशासनिक विकास श्रम तथा सामाजिक मामिला मन्त्रालयले सन् २०२२ मा पनि गर्मी महिनाका लागि काम गर्ने समय तोकेको छ । कतारमा १ जूनदेखि १५ सेप्टेम्बरसम्म बिहान १० देखि ३ः३० बजेसम्म बाहिर घाम पर्ने खुला क्षेत्रमा काम लगाउन नपाइने नियम ल्याएको छ ।

यो निर्णयले प्रत्यक्ष घाममा काम गराउने कम्पनी र संस्थाहरू दैनिक काम गर्ने घण्टा निर्दिष्ट गर्न बाध्य हुनेछन् । तर, कतारमा कार्यरत विदेशी कामदार ४० डिग्रीभन्दा माथिको तापक्रममा काम गर्न बाध्य रहेको विभिन्न श्रमसम्बन्धी संस्थाले आरोप लगाउँदै आएका छन् ।

उच्च गर्मीमा बाहिर काम गर्दा श्रमिकको ज्यान जाने खतरा हुने भएकाले कतार सरकारले घाममा काम लगाउन प्रतिबन्ध लगाएको हो । तर, कम्पनीहरूले सरकारको नियमविपरीत विदेशी कामदारलाई चर्को घाममा काम लगाउने गरेको आवाज एम्नेस्टी इन्टरनेसनलले उठाउँदै आएको छ । कतारमा चर्को घामकै कारण धेरै विदेशी श्रमिकले ज्यान गुमाइरहेको इन्टरनेसनलका विभिन्न अध्ययनले औँल्याएका छन् ।

कतार सरकारले ल्याएको कानुन कार्यान्वयन नहुँदा अहिले पनि त्यहाँ कार्यरत नेपाली श्रमिकले ४० डिग्रीको चर्को घाममा काम गर्न बाध्य हुनुपरेको श्रम तथा आप्रवासनविज्ञ एवं एम्नेस्टी इन्टरनेसनल नेपालका पूर्वनिर्देशक रामेश्वर नेपालले जानकारी दिए ।

कतारमा कार्यरत नेपाली अहिले पनि चर्को घाममा काम गर्दागर्दै ढल्ने र बेहोस हुने घटना धेरै रहेको उनको भनाइ छ । सरकारी श्रम सम्झौता कमजोर हुँदा त्यसको मारमा नेपाली कामदार परेको उनी औँल्याउँछन् ।

कतारस्थित नेपाली दूतावासका अनुसार कतारमा अहिले साढे ४ लाख नेपाली कार्यरत छन् । जसमा ११ हजार ९० जना महिला छन् । कतारमा ७५ प्रतिशत नेपाली कामदार निर्माणक्षेत्रमा कार्यरत रहेको दूतावासले जनाएको छ ।

कतार सरकारले ल्याएको नियम राम्रो भए पनि त्यहाँका कम्पनीले उक्त कानुनको पालना नगर्दा विदेशी कामदार मारमा पर्ने गरेको दूतावासको भनाइ छ । कतारले सन् २०२१ मा चर्को घाममा काम लगाउने २ हजार ३ सयवटा निर्माण र सप्लाई कम्पनीलाई कारबाहीसँगै जरिवानासमेत गरेको त्यहाँको श्रम विभागले जनाएको छ ।

कुवेतको ‘पब्लिक अथोरिटी फर म्यानपावर’ले चर्को घाममा काम गर्नका लागि रोक लगाउने निर्णय गरेको म्यानपावरलाई उद्धृत गर्दै अरब टाइम्सले जनाएको छ ।

यो निर्णय १ जूनदेखि ३१ अगस्टसम्म लागू हुनेसमेत समाचारमा जनाइएको छ । म्यानपावरको निर्णयअनुसार बिहान ११ बजेदेखि ४ बजेसम्म ३२ डिग्रीको तापक्रममा खुल्ला क्षेत्रमा कामदारलाई काम लगाउन रोक लगाइएको छ ।

कुवेतमा विभिन्न क्षेत्रमा करिब ८० हजार नेपाली कार्यरत रहेको कुवेतस्थित नेपाली दूतावासको तथ्यांक छ ।

चर्को गर्मीमा काम गर्ने कामदारका शरीरमा पानीको मात्रा कम हुने र त्यसले कामदारको किड्नीमा प्रत्यक्ष असर पर्ने विश्व स्वास्थ्य संगठनले औँल्याएपछि कुवेतले सन् २०१९ देखि चर्को घाममा काम लगाउन नपाउने नियम बनाएर लागू गर्दै आएको हो ।

कुवेतमा पनि धेरै नेपाली निर्माण क्षेत्र र खुल्ला क्षेत्रमा नेपाली कार्यरत रहेको कुवेतस्थित नेपाली दूतावासले जनाएको छ ।

कुवेत सरकारले विदेशी कामदारको सुरक्षाका लागि ३२ डिग्री भन्दा बढी तापक्रममा काममा नलगाउने नियम ल्यायो तर रोजगारदाता कम्पनीहरूले अटेरी गर्दा विदेशी कामदार मारमा पर्ने गरेको कुवेतस्थित नेपाली दूतावासका राजदूत दुर्गाप्रसाद भण्डारी बताउँछन् ।

कुवेतमा चर्को घाममा काम गर्न बाध्य हुनुपरेको गुनासो लिएर नेपाली श्रमिकहरू दूतावासमा धाउने गरेको उनले बताए । कामदारको गुनासो आएपछि नेपाली दूतावासले पनि कुवेती सरकारका सम्बन्धित निकायमा गुनासो र उजुरी पुर्‍याएर सहयोग गर्दै आएको राजदूत भण्डारीको भनाइ छ ।

प्रकाशित मिति: शुक्रबार, जेठ १३, २०७९ १४:०४