जसले नगरपालिकामा जागिर खाँदै गरेकी थिइन् उपमेयरकाे तयारी

A+ A A-

स्थानीय तह चुनाव नजिकिँदै थियो । शंखरापुर नगरपालिकामा नेपाली कांग्रेस र एकीकृत समाजवादी (एस)बीच गठबन्धन हुने भयो । प्रमुखमा एसको तर्फबाट लक्ष्मीप्रसाद श्रेष्ठ र उपप्रमुखमा कांग्रेसकी समिता श्रेष्ठलाई उम्मेदवार बनाउने निर्णय भयाे ।

३८ वर्षकी समिता नगरपालिकाकाे याेजना शाखाकी कर्मचारीका रूपमा काम गरिरहेकी थिइन् । अघिल्लाे चुनावमा उपमेयरकाे टिकट पाउने आस गरेकी उनलाई कांग्रेसले निराश पारेकाे थियाे । त्यसपछि नगरपालिकामै जागिर खाँदै उनी यसपालिका लागि तयारीमा जुटेकी थिइन् । नभन्दै, पार्टीले यसपालि पत्यायाे । अनि गठबन्धनबाट प्रमुख पदका उम्मेदवारले हारे पनि समिताले उपप्रमुखमा भने बाजी मारिन् ।

नगरपालिकाको योजना शाखामा काम गर्दा नगरवासीहरूकाे मन जितेकाले चुनावी परिणाम आफ्नाे पक्षमा आएकाे समिताकाे भनाइ छ । भन्छिन्, ‘मैले अघिल्लो चुनावमा उम्मेदवारी नदिएकाले अझ धेरै सिक्न पाएँ । मानिसहरूलाई सेवा, सहयोग गर्न पाएँ । त्यसैले उपमेयर बन्न सहज भयो ।'

योजना शाखा कर्मचारीदेखि उपप्रमुखसम्मको यात्रा

समिता साँखुकी बासिन्दा हुन् । स्वास्थ्य शिक्षामा स्नातक गर्दै गरेकी उनी शंखरापुरको सबै समस्या र सम्भावना बुझेको दाबी गर्छिन् । स्थानीय तह पुनर्संरचना हुनुअघि उनी वज्रयोगिनी गाउँपालिकामा सामाजिक परिचालकको रूपमा काम गर्थिन् । शंखरापुर नगरपालिका घोषणा भएपछि उपमेयर भएर काम गर्ने उनको थियो ।

समिता करिब तीन वर्षअघि नगरपालिकाको योजना शाखामा सहायक कम्प्युटर अपरेटरको रूपमा काम गर्न पुगेकी हुन् । त्यहाँ सेवा लिन आउने कोही फर्कन नपरोस् भन्ने चाहन्थिन् । कार्यालयमा कतिपय सेवाग्राहीहरू त्यहाँको व्यवस्था नबुझेर अल्मलिएका उनी देख्थिन् । त्यसरी अलमलिएकाहरूलाई कार्यालयको प्रक्रियाबारे बुझाइदिन्थिन् ।

‘नगरपालिकामा कर्मचारीको रूपमा काम गरेको हुनाले मलाई त्यहाँको प्रक्रियाबारे धेरै थाहा भयो । उपमेयर भएमा अझ राम्रो काम गर्न सक्ने आत्मविश्वास पलायो’, समिता भन्छिन्, ‘परिवर्तन गर्ने आँट थियो र उम्मेदवारी दिएँ ।’

अन्तिम मतपरिणाम आउँदा उनकाे पक्षमा ६ हजार ३ सय ६२ मत थियाे । उनकी प्रतिस्पर्धी थिइन् राप्रपाकी उम्मेदवार विजयकुमारी वाइबा । समिताले झण्डै दोब्बर मतले उनलाई हराइन् । विजयकुमारीले ३ हजार २ सय ९८ मत मात्र पाइन् ।

उपमेयरको रूपमा काम गर्दा आफू कहिल्यै शंखरापुरका बासिन्दाकाे भावनाविपरीत नजाने उनी बताउँछिन् । घरदैलो कार्यक्रममा जाँदा पनि मतदाताले आफ्नो उम्मेदवारीलाई लिएर खुसी व्यक्त गरेको उनको भनाइ छ । ‘नानी पो उठ्नुभएको भनेर धेरै जना खुसी हुनुभएको थियो’, उनले घरदैलोको अनुभव सुनाइन्, ‘कति स्थानीयवासीले त घरदैलोकै समयमा पहिला झन्झटबिना काम गरिदिएको भन्दै मलाई धन्यवाद दिन पनि आउनुभयो ।’

काठमाडौंभित्रको नगरपालिका भए पनि शंखरापुरमा अन्य नगरपालिकाभन्दा धेरै काम हुन बाँकी रहेको समिताले बताइन् । नगरपालिकाको समस्या हल हुँदै गरेको भए पनि त्यसको गति साह्रै सुस्त भएको उनको गुनासो छ । खानेपानीको समस्याले स्थानीयलाई सधैँ पिराेलेकाले हल गर्नमा जोड दिने उनको योजना छ ।

‘घरदैलोमा हुँदा अधिकांशले खानेपानीपछि सडकको समस्या पनि देखाउनुभयो । नगरपालिकामा सहजै एम्बुलेन्स गुड्ने सडक पनि छैन’, उनी भन्छिन्, ‘काठमाडौंभित्रको नगरमा यस्तो गम्भीर समस्या अझै समाधान नहुनु दुःखको कुरा हो । हामी यिनै कुरालाई जोड दिनेछौँ ।’

शंखरापुर नगरपालिकामा कमजोर आर्थिक अवस्था भएकाहरूले आफ्ना बालबच्चाका लागि छात्रवृत्तिको माग गरेको उनी बताउँछिन् । वडामा आपत्‌विपत् आइपर्दालाई कम्तीमा एउटा स्वास्थ्य चौकी हुनुपर्ने धेरैको माग छ । 'महिला दिदीबहिनीहरूले पनि सीपमूलक तलिम चाहियाे भनिरहनुभएकाे छ । मैले उहाँहरू सबैका मागलाई मनन गरेकी छु', उनले भनिन् ।

प्रकाशित मिति: शुक्रबार, जेठ १३, २०७९ १०:००