आयोगले निर्णय नगर्दा अदालत पुग्यो बुढीगंगाको मतदान विवाद, कहिले हुन्छ निर्णय ?

आयोगले निर्णय नगर्दा अदालत पुग्यो बुढीगंगाको मतदान विवाद, कहिले हुन्छ निर्णय ?

A+ A A-

निर्वाचन आयोगले निर्णय नगर्दा बाजुराको बुढीगंगा नगरपालिकाको मतदान विवाद अदालत पुगेको छ । आयोगले टुंगो लगाउन नसकेपछि एमालेका मेयर उम्मेदवार रामबहादुर बानियाँले मतगणनाको माग गर्दै बुधबार उच्च अदालत दिपायलमा रिट दर्ता गरेका छन् ।

‘जनताले हालेको मतको चाँडोभन्दा चाँडो गणना होस् भनेर रिट हालेको हुँ’, शिलापत्रसँग बानियाँले भने । तर, कांग्रेसका प्रतिनिधिहरूले भने धाँधली भएको भन्दै पुनः मतदानको माग गरेका छन् । गत ३० वैशाखमा मतदान सकिएपछि धाँधली भएको भन्दै कांग्रेसले विरोध जनाएपछि मतगणना स्थगित भएको थियो ।

नगरपालिकाको १० वटै वडामा मतदान रद्द गरेर पुनः मतदान गर्ने कि पुरानै मतदानलाई सदर गर्ने भन्नेबारे निर्णय लिन आयोगले २ जेठमा निर्वाचन आयुक्त सगुन शमशेर जबराको नेतृत्वमा छानबिन समिति बनाएको थियो । तीन दिनभित्र प्रतिवेदन बुझाउन समितिले समय पाए पनि १० दिन बितिसक्दा समेत आयोगले निर्णय दिन सकेको छैन ।

तर, आयोगको प्रवक्ता शालिग्राम शर्मा पौडेलले केही दिनमै आयोगले निर्णय गर्ने बताउँछन् । ‘स्थलगत अध्ययन भइसकेको छ, आयोगले आजभोलि नै निर्णय गर्छ,’ उनले शिलापत्रसँग भने ।

के हो विवाद ?

दबाब र प्रभावमा परेर बुढीगंगाको विवाद चुलिएको एमालेका मेयर उम्मेदवार बानियाँ बताउँछन् । शान्तिपूर्ण भएको मतदानबारे निर्वाचन अधिकृत कृष्ण सापकोटाले गलत रिपोर्टिङ गरेर १० वटै वडाको मतदान स्थगित भएको भन्दै मुख्य निर्वाचन अधिकृतको कार्यालयमा निवेदन गराएको बानियाँको आरोप छ । अधिकार नै नभएको मान्छेले अधिकारको दुरुपयोग गरेको उनको आरोप छ ।

अधिकृत सापकोटाले गरेको निर्णयलाई नै सदर गर्दै मुख्य निर्वाचन कार्यालयले पनि मतदान स्थगित भनेर आयोगमा सूचना पठाएको आधारमा मतगणना स्थगित गरिएको बानियाँ बताउँछन् । ‘सुरक्षा समितिको बैठक साँझ ६ः३० बजे बसेको थियो, कृष्ण सापकोटाले ६ः४८ बजे मुख्य निर्वाचन कार्यालयलाई चिट्ठी पठाएको देखिएको छ’, बानियाँले भने ।

सुरुमा बुढीगंगाको निर्वाचन अधिकृतको जिम्मेवारी निरञ्जन स्थापितलाई दिइएको थियो । तर, उनले स्वास्थ्यको कारण देखाउँदै राजीनामा दिएपछि सापकोटा अधिकृत बनेका थिए । त्यतिमात्रै नभएर मतपेटिका सिल हुने बेला सुरक्षाकर्मीलाई फिर्ता बोलाइएको बानियाँ बताउँछन् ।

‘मतदानमै खटिएका सुरक्षाकर्मी नै असुरक्षित भएको भन्दै फिर्ता बोलाइएको थियो’, उनले भने, ‘उनीहरूले मतपेटिका फिर्ता त ल्याए तर यसलाई पुष्टि गर्न बीचमा कर्फ्यूसम्म पनि लगाइयो ।’

तर, कांग्रेस प्रवक्ता डा. प्रकाशशरण महत एमालेले बुथ कब्जा गरेकाले बुढीगंगामा पुन: मतदानको गर्नुपर्ने बताउँछन् । सानेपामा आयोजित पत्रकार सम्मेलनमा प्रवक्ता महतले तत्काल पुन: मतदानको व्यवस्था मिलाउन निर्वाचन आयोगलाई आग्रह गरेका थिए । कांग्रेस मुख्यसचिव कृष्णप्रसाद पौडेलले पनि केही दिनअघि विज्ञप्ति जारी गरी बुढीगंगामा पुन: मतदान गराउन माग गरेका थिए ।

'बुढीगंगा नगरपालिकाका विभिन्न मतदान केन्द्रमा नेकपा एमालेका कार्यकर्ताहरुले कांग्रेसका उम्मेदवार र प्रतिनिधिहरूलाई आक्रमण गरी घाइते बनाउने, मतदान केन्द्रबाट लखेट्ने, थुनछेक गर्ने र मतदान केन्द्र आफ्ना कार्यकर्ताको नियन्त्रणमा राखी (बुथ कब्जा गरी) फर्जी मत हालेको घटनाप्रति कांग्रेसको गम्भीर ध्यानाकर्षण भएको छ,' मुख्यसचिव पौडेलले जारी गरेको विज्ञप्तिमा भनिएको, 'कांग्रेस त्यसरी कब्जा गरिएका मतदान केन्द्रमा शान्तिपूर्ण रूपमा पुनः मतदानको व्यवस्था तत्काल मिलाउन निर्वाचन आयोगसमक्ष अनुरोध गर्दछ ।'

विवादमा मुछिएपछि निर्वाचन अधिकृत सापकोटाले राजीनामा दिएका थिए । यसरी विवाद र अन्योल सिर्जना भएसँगै त्रिवेणी नगरपालिकाका निर्वाचन अधिकृत पुष्पराज पाण्डेलाई गत १० जेठदेखि निर्वाचन आयोगले बुढीगंगा नगरपालिकाको पनि जिम्मेदवारी दिएको छ ।

बाजुराका मुख्य निर्वाचन अधिकृत माधवप्रसाद घिमिरेका अनुसार मतदान सकिएर मतपेटिकाको सुरक्षित संकलन र ढुवानी हुने क्रममा नेपाल प्रहरी र सशस्त्र प्रहरीले ढुवानी नै नगरी मतपेटिका मतदानस्थलमा छोडेर गएका थिए ।

कांग्रेससहित अन्य राजनीतिक दलका प्रतिनिधिहरूले पनि मतदानमा धाँधली भएको आरोप लगाएपछि जिल्ला सुरक्षा समिति बाजुरा र निर्वाचन अधिकृतको कार्यालयले नगरपालिकामा पुनः मतदान गर्ने कि पुरानै मतदानलाई सदर गर्ने भन्ने विषयमा निर्णय दिन मुख्य निर्वाचन अधिकृतको कार्यालयमार्फत निर्वाचन आयोगलाई पत्र पठाएको थियो ।

३० वैशाखमा भएको चुनावमा बुढीगंगामा ८० प्रतिशत मत खसेको थियो । यद्यपि कांग्रेसका मेयर उम्मेदवार रंगबहादुर खातीको वडा नम्बर ४ मा भने ९९.४२ प्रतिशत मत खसेको बानियाँ बताउँछन् ।

प्रकाशित मिति: बिहीबार, जेठ १२, २०७९ १६:३४