रोजगार गन्तव्य देश यूएईमा मङ्कीपक्स भेटियो, नेपालमा भित्रिन नदिने प्रयास भइरहेको छ : स्वास्थ्य मन्त्रालय

रोजगार गन्तव्य देश यूएईमा मङ्कीपक्स भेटियो, नेपालमा भित्रिन नदिने प्रयास भइरहेको छ : स्वास्थ्य मन्त्रालय

A+ A A-

नेपाली कामदारहरूको प्रमुख श्रम गन्तव्य देश यूएईमा एक जनामा मङ्कीपक्स भेटिएको छ । यो रोग यूएईमा पहिलोपटक देखिएको हो ।

पश्चिमी अफ्रिकाबाट फर्किएकी २९ वर्षीया एक महिलामा मङ्कीपक्सको संक्रमण देखिएपछि यूएईमा त्रास फैलिएको यूएईको स्वास्थ्य निर्देशनालयलाई उद्धृत गर्दै गल्फ न्युजले जनाएको छ ।

यूएईका स्वास्थ्य अधिकारीहरूले यो विषयलाई गम्भीरताका साथ लिएर नियन्त्रणका लागि जुटेको छ । यस्तै, मङ्कीपक्सबारे सरकारले जारी गर्ने स्वास्थ्य मापदण्ड हेर्दै गर्न र हल्लाको पछि नलाग्न पनि यूएई सरकारले त्यहाँका नागरिकलाई आग्रह गरेको छ ।

युरोप र अफ्रिकाबाट यूएई रोजगार, अध्ययन र अन्य पेसा–व्यवसायका लागि जाने विदेशी नागरिकले अनिवार्य दुई साता क्वारेन्टाइन बस्नुपर्ने समेत व्यवस्था त्यहाँको सरकारले गरेको छ ।

यूएईमा पहिलो पटक मङ्कीपक्स देखिएका कारण त्यहाँ रहेका नेपालीहरूमा समस्या नभएको यूएईस्थित नेपाली दूतावासले जानकारी दिएको छ । साथै, यूएईमा रहेका नेपालीहरूलाई सचेत रहनसमेत आग्रह गरेको दूतावासले जनाएको छ ।

मङ्कीपक्स नियन्त्रण गर्न निगरानी बढाएको छौंँ : स्वास्थ्य मन्त्रालय

मङ्कीपक्सको संक्रमण फैलिन सक्ने भन्दै सरकारले विदेशबाट आउने नेपाली तथा विदेशी नागरिकलाई अनिवार्य क्वारेन्टाइन बस्न सूचनामार्फत जानकारी गराएको छ ।

स्वास्थ्य तथा जनसंख्या मन्त्रालयले गत साता नै सूचना जारी गदै विदेशबाट आउने नेपाली र विदेशी नागरिकहरूले कम्तिमा दुई हप्ता अनिवार्य क्वारेन्टाइनमा बस्ने, सकेसम्म बाहिरी कुनै पनि सामानहरू नछुने र छोइहाले साबुनपानीले तत्काल सफा गर्नुपर्ने जानकारी गराएको हो ।

मङ्कीपक्सको संक्रमणबाट बच्न व्यक्तिगत सरसफाइ र क्वारेन्टाइनमा बस्ने कुरालाई ध्यान दिनुपर्ने स्वास्थ्य तथा जनसंख्या मन्त्रालय सहप्रवक्ता डा.समीरकुमार अधिकारीले जानकारी दिए ।

विश्व स्वास्थ्य संगठनको केन्द्रीय, क्षेत्रीय र नेपालमा भएको कार्यालयसँग नियमित सम्पर्कमा रहेर प्राप्त प्राविधिक सुझावका आधारमा आवश्यक कदमसँगै निर्णय गर्दै जाने उनले बताए ।

‘मङ्कीपक्सको संक्रमणबाट बच्न सरकारले आवश्यक कदम चालिसकेको र सीमा नाकाहरूमा निगरानी बढाएको छ । अन्तर्राष्ट्रिय विमानस्थलदेखि नेपाल–भारत सिमानमा समेत मङ्कीपक्सको संक्रमण भित्रिन नदिन निगरानी बढाइएको छ,’ उनले भने ।

मङ्कीपक्स मध्य र पश्चिम अफ्रिकी देशहरूका घना जङ्गलमा रहेका जनावरहरूको सम्पर्कमा आउने मानिसहरूमा हुन सक्ने भाइरस हो ।

प्रायः मुसा प्रजातिका जनावरहरूमा यो भाइरस हुने भएकाले ती जनावरहरूको शरीरबाट निस्किएका थुकका छिटाहरू, र्‍याल, तरल पदार्थ र प्रत्यक्ष सम्पर्क जस्ता माध्यमबाट सर्ने गर्छ ।

मुसा प्रजातिका मरेका वा त्यस्ता जनावरहरूको मासु प्रयोग गर्ने मानिसहरूमा यो संक्रमण फैलिने गरेको छ । संक्रमित मान्छेबाट मान्छेमा संक्रमण हुने सम्भावना न्यून रहेको अहिलेसम्मको अध्ययनले देखाएको छ ।

प्रकाशित मिति: बिहीबार, जेठ १२, २०७९ १४:०६