कांग्रेसले टिकट खोसेपछि स्वतन्त्र उठे, एमाले र कांग्रेसलाई उछिनेर जिते वडाध्यक्ष

कांग्रेसले टिकट खोसेपछि स्वतन्त्र उठे, एमाले र कांग्रेसलाई उछिनेर जिते वडाध्यक्ष

A+ A A-

ललितपुर महानगरपालिका वडा नम्बर १३ मा गणेश केसीलाई दिइसकेकाे टिकट नेपाली कांग्रेसले खोसिदिएको थियो । माइन्युट गर्ने बेला पार्टीले एकाएक जितेन्द्र गजुरेललाई वडाध्यक्ष उम्मेदवार बनाएपछि केसीले कांग्रेस नै त्यागे । र एमाले, कांग्रेसलाई चुनौती दिँदै स्वतन्त्र उम्मेदवारी दिए । अन्ततः उनलाई टिकटमा नपत्याएको कांग्रेसलाई तेस्रो बनाएर केसीले ललितपुर महानगरपालिका वडा नम्बर १३ काे अध्यक्ष जिते ।

८ सय ६८ मतसहित वडाध्यक्षमा निर्वाचित गणेशले एमालेका निरन केसीलाई १ सय ७९ मतले हराएका हुन् । उनले कांग्रेसका उम्मेदवार जितेन्द्र गजुरेललाई २ सय २६ मतले पछि पारे ।

पहिलाेपल्ट हाेइन

त्यसो त गणेश स्वतन्त्रबाट चुनाव लडेको यो पहिलोपटक भने होइन । ०४९ सालमा पहिलोपटक उनी स्वतन्त्रबाटै वडाध्यक्ष भएका थिए । ‘बहुदलपछिको पहिलो चुनाव थियो त्यो’, गणेश सम्झन्छन्, ‘तर हाम्रो वडामा सधैँ बाहिरबाट ठूलाठूला नेता आउने, चुनाव जितेर अन्तै गइदिने । यस्तो हुँदा हाम्रो वडामा कहिल्यै विकास भएन ।’

०४९ सालमा नेता केशवबहादुर विष्टले बोलाएर गणेशलाई टिकट लिन प्रस्ताव गरे । गणेश अलमलमा परे । ‘मेरो त राजनीति गर्ने सोच पनि छैन, म लड्दिनँ’, उनले टिकट लित अस्वीकार गरे, ‘चुनाव लड्नलाई पैसा चाहिन्छ । मसँग त पैसा पनि छैन । भर्खरको युवा छु । मलाई गाह्रो हुन्छ ।’

जति नै प्रतिवाद गरे पनि कर गरेपछि गणेशले भोलि बिहानसम्म सोचेर निर्णय दिन्छु भनेर त्यहाँबाट हिँडे । साथीभाइले बाटोभरि गणेशलाई हौसाए, ‘दाइ तपाईं नै हुनुपर्छ वडाध्यक्ष । हाम्रो वडामा न पिच छ न ढल । हामीलाई सधैँ झुक्याउने मात्रै आए ।’

उनी सोचमग्न भए ।

घर आएर गणेशले सबैभन्दा पहिले आमासँग सोधे, ‘हजुरसँग ३०/३५ हजार छ ?’

‘किन र ?’ आमाले आश्चर्य मान्दै सोधिन् ।

‘म चुनाव लड्न लागेको । मसँग पैसा छैन अहिले’, गणेशले यति भनिसक्दा आमाले ३५ हजारसहित आशीर्वाद पनि दिइन् ।

विष्टले टिकट दिन बोलाएका थिए । पैसा र जनताको साथ भएपछि गणेशले कुनै पार्टीको टिकटबाट नलडेर स्वतन्त्रबाट उठ्ने प्रण गरे ।

भर्खरभर्खर बहुदल आएर कांग्रेस र एमालेको दबदबा भएको बेला स्वतन्त्रबाट उठेका गणेशले ८५ मतले जिते ।

त्यसयता वडा नं १३ लाई विकासमा अग्रगामी बनाएको उनको दाबी छ । ८ मिटरका बाटाहरू खोल्ने, पिच, ढल बत्तीदेखि लिएर समग्र विकासमा वडालाई अगाडि बढाएको उनी बताउँछन् ।

तर, स्वतन्त्रबाट जितेर वडाध्यक्ष बनेको ६ महिना पनि नबित्दै केसी एकाएक कांग्रेसमा प्रवेश गरेको समाचार गोरखापत्रलगायत पत्रिकामा आए । समाचार पढेर आफैँ छक्क परेका गणेश त्यसदिन एकाबिहानै पत्रिका लिएर तत्कालीन पार्टी सभापति ओमकारकोमा गए ।

‘यो के हो ? जे पायो त्यही छपाइदिने ? एकपटक मलाई सोध्नुभयो ?’ गणेशले सोधे ।

‘मलाई थाहा थियो तिमी मान्छौँ भनेर’, ओमकारले जवाफ दिए ।

गणेश झोक्किए । विभिन्न नेताहरूले चरणबद्ध छलफलपछि अन्ततः उनलाई कांग्रेस पार्टीमा प्रवेश गराएरै छाडे । आखिर कामै गर्ने त हो भन्दै उनी पार्टीमा प्रवेश गरे ।

त्यसपछि ०५४ को स्थानीय चुनावमा कांग्रेसले गणेशलाई नै वडाध्यक्षको टिकट दियो । गणेशले पनि दुईतिहाइले जिते ।

त्यसपछि रिक्त स्थानीय तहमा ०७४ मा पनि पार्टीले गणेशलाई टिकट त दियो तर सबै कांग्रेसीले अर्कै पार्टीलाई सहयोग गर्दै हिँडेको गणेशको गुनासो छ । त्यसैले पनि गत चुनावमा आफूले हारेको बताउँछन् ।

हारेका गणेशलाई यसपटक पार्टीले टिकट देला कि नदेला ? भन्ने थियाे । तर, टिकट लिन पटकपटक आह्वान गरेको पार्टीले भोलिपल्टै आफ्नो नाम हटाएको खबर गणेशलाई आयो ।

‘तपाईंहरूले संगठनलाई के गर्न खोज्नुभएको. ? संगठनलाई धुजाधुजा पार्न खोज्नुभएको ?’, पार्टीका नेतासँग झोक्किएका गणेश त्यसदिन राम्ररी सुत्न पनि सकेनन् ।

तर बिहानीपख ढुक्क हुनुस् भन्दै एक पछि अर्को फोन आउन थाल्यो । ‘टिकट दिए दिनुस् होइन भने म ब्ल्याकमा किन्छु । अथवा बुद्ध एयरको टिकट किन्छु’, झोँकमा ठट्टा मिसाउँदै उनले भनिदिए ।

केही क्षणमा बधाइसहित गणेशलाई फोन आयो । टिकट लिन सभापति जितेन्द्र मल्लिकको घरमा गणेशलाई बोलाइयो । सबैले बधाई दिए । हात मिलाए । टिकट दिए । सदस्य कसलाई उठाउने सोध्न थाले । उनले केही नाम सिफारिस गरे । पाँच पदका लागि टिकट थमाएर गणेशलाई माइनुट गरुञ्जेल उनीहरूले पर्खिए ।

एक्कासि पार्टी सभापतिको फोन आएर माइनुटको काम रोकियो ।

फोनको पखाईमा रहेका गणेशलाई अनौठो सन्देश आयो- टिकट जितेन्द्र गजुरेललाई पो दिएछन् । चिरिबावुको ठाउँमा मेयरमा टिकट नपाएपछि आफूलाई वडाध्यक्ष उम्मेदवार नबनाएर जितेन्द्र गजुरेललाई बनाइएकाे गणेशले थाहा पाए ।

गणेश तुरुन्तै जिल्ला सभापति जितेन्द्र मल्लिकको घर पुगे । 'यो के बच्चा खेलेको हो ?' रिसले चुर भएका गणेशले सोधे ।

अपमानित महसुस गरिरहेका गणेशलाई तारन्तार शुभेच्छुकहरूको फोन आउन थाल्यो ।

महिला समूहका दिदीबहिनीले समेत वडाध्यक्षमा उठ्न आग्रह गरे । कांग्रेसका दुई केन्द्रLय नेताहरूले नै पछि नहट्न हाैसला दिए ।

अन्ततः गणेशले पार्टीबाट राजीनामा दिएर स्वतन्त्रमा यसपटकको स्थानीय तहको चुनावमा उठे । राजीनामा दिँदै गर्दा गणेशलाई लागेको थियो, पार्टीले आफ्नो कामको मूल्यांकन गरेरै भए पनि यसो नगर्नुस् भन्ला ! यत्रो संगठन बनाएर छाडेर नजानु भन्छ भन्ने उनलाई लागेको थियो । तर, गणेशलाई पार्टीको एउटा औपचारिक फोन आएन ।

‘आजको मितिसम्म पनि कसैले फोन गर्ने गर्नुभएन’, गणेशले भने ।

तर भित्रभित्रै गणेशलाई मेयरको सल्लाहकार बनाइदिने, उचित सहुलियत दिन्छु भन्ने लोभलालच भने आइरहे ।

उम्मेदवारी मनोनयन गर्ने दिन ! शुभेच्छुक दिदीबहिनी रुँदै गणेशलाई समर्थन गर्न आए । ‘रुनुपर्ने केही छैन । जित्ने हामीले नै हो’, गणेशले थमथमाए ।

हुन त गणेशलाई जित्छु भन्ने नै लागेको थियो तर पार्टीको ओतमा संगठन गरेका गणेशको नामसँग वर्षौंदेखि रुख चिन्ह जोडिएको थियो । तर यसपटक स्वतन्त्रबाट उठ्ने भएपछि पुतली चिन्हलाई मतदातासमक्ष पुर्‍याउन निकै कठिन भएको उनी बताउँछन् ।

‘निर्वाचन आयोगले चिन्ह ढिला दियो । अनि छोटो समयमा हरेक घरमा त्यो चिन्ह पुर्‍याउनचाहिँ साह्रै गाह्रो भयो’, रातदिन खटिएर सहयोग गर्ने साथीभाइप्रति धन्य हुन्छन् उनी ।

विजयी भएपछि गणेशलाई लागेको छ, ‘काम त मैले गरेको रहेछु । जनताले मलाई दिलमा सजाएका रहेछन् ।’ वडाबासीसँग धन्य नभइरहनै सक्दैनन् उनी ।

त्यसो त वडा नं १३ लाई नमुना वडा बनाएको उनको दाबी छ । ‘मन्दिर सारेर क्षमापूजा गरेरै भए पनि सडक र सम्पदालाई सँगसँगै विकास गरेको छु’, उनले भने । अब कुसुन्ती हाइटको बाटो, आकाशेपुल र खानेपानीको सवालमा काम गर्ने गणेशको अठोट छ ।

१ सय ५० भोट आउँछ होला, किन उठेको भनेर खिसीटिउरी गर्नेलाई यो जितले सबक सिकाएको उनको बुझाइ छ । ‘८६ भोट बदर हुँदा पनि १८६ भोटले मैले जितेको छु’, उनले भने ।

आफू र बालेन साहजस्ता स्वतन्त्र उम्मेदवार अब एकजुट हुनुपर्ने गणेश बताउँछन् । ‘हामी कसैको दास होइनौँ । कसैले उठ् भन्यो भने उठ्ने, कसैले टिकट बेच्ने, कोही रक्सी खाएको भरमा टिकट लिने...’

राजनीतिले कर्मशील मान्छेलाई समेत खेलौना बनाउन खोजेको उनको आरोप छ । ‘उनीहरू राजनीतिक मान्छे होइनन्, अराजक हुन् । चिरीबावुलाई हराउने नाममा संगठनलाई धुजाधुजा पार्ने र व्यक्तिगत रिसिइबी साँध्नेको राजनीतिक चेत कस्तो होला ?', उनले भने ।

प्रकाशित मिति: मंगलबार, जेठ १०, २०७९ १३:२०