विश्वप्रकाश–सिटाैला द्वन्द्वकाे फाइदा उठाउँदै मेचीनगरमा एमालेकाे शानदार पुनराेदय

विश्वप्रकाश–सिटाैला द्वन्द्वकाे फाइदा उठाउँदै मेचीनगरमा एमालेकाे शानदार पुनराेदय

A+ A A-

२०५४ सालमा एमालेका रविन कोइराला मेचीनगर नगरपालिकामा मेयरमा निर्वाचित भएका थिए । त्यसको २५ वर्षपछि यो नगरपालिकामा एमालेले मेयर र उपमेयर जित्दै पुनराेदय गरेकाे छ । एमालेका गोपालचन्द्र बुढाथोकी भारी मतका साथ सत्ता गठबन्धनलाई हराउँदै मेयरमा निर्वाचित भए । उनले कांग्रेसका उम्मेदवार इन्द्रबहादुर बुढाथोकीलाई हराए । उनी कांग्रेसकाे प्रदेश–१ क्षेत्रीय सभापति हुन् ।

विजयी भएका एमालेका बुढाथोकीले कांग्रेसका इन्द्रबहादुरलाई ५ हजार १ सय ६७ मतान्तरले हराए । गत स्थानीय निर्वाचनमा कांग्रेसले एमालेका उम्मेदवारलाई ४ हजार ५ सय ३५ को मतान्तरले हराएको थियो । कांग्रेसका विमल आचार्यले एमालेका केन्द्रीय नेता विष्णु प्रसाईंलाई हराएका थिए ।

यसपटक गठबन्धनबाट उम्मेदवार बनेका कांग्रेसका बुढाथोकीले २१ हजार ३ सय ११ मत पाँउदा एमालेका बुढाथोकीले २६ हजार ४ सय ७८ मत पाएर मेयर जिते । मेचीनगरमा कुल ६३ हजार ६८८ मत खसेको थियो ।

यस्तै, उपमेयरमा पनि एमालेकै मिना पोखरेल उप्रेती भारी मतका साथ विजयी भइन् । उनले २१ हजार ५ सय ९० मत पाउँदा गठबन्धनबाट माओवादी केन्द्रका प्रकाश भण्डारीले १२ हजार ८ सय १८ मत पाए ।

झापाको व्यापारिक केन्द्र मानिने मेचीनगर कांग्रेस महामन्त्री विश्वप्रकास शर्माको निर्वाचन क्षेत्र हो । प्रदेश १ को सांसदबाट राजीनामा दिएर मेयरमा उठेका बुढाथोकी कांग्रेसभित्रकै अन्तर्घातका कारण हारेकाे चर्चा चलेकाे छ ।

कांग्रेस महामन्त्री विश्कप्रकाश शर्मा र पूर्वमहामन्त्री कृष्णप्रसाद सिटौलाको लडाइका कारण मेचीनगरमा कांग्रेसले लज्जास्पद पराजय भाेग्नुपरेकाे कार्यकर्ताहरू बताइरहेका छन् । मेयरसहित कांग्रेसले मेचीनगरमा आठवटा वडा पनि गुमाएकाे छ । कांग्रेसकै पकड रहेका वडाहरूमा पनि एमालेले बाजी मारेकाे छ ।

मेचीनगर नगरपालिकामा ९० हजार २ सय २ मतदाता छन् । जसमा कांग्रेसको आन्तरिक आकलनमा २२ हजार मतदाता छन् । गठबन्धन हुँदा माओवादीको ११ हजार र नेकपा एसको ५ हजार मतदाता थपिँदा ३८ हजार मतसहित विजयी हुने कांग्रेसको विश्लेषण थियो । तर, कांग्रेसले गठन्धन गर्दा समेत २१ हजार ३ सय ३१ मत मात्र पायो ।

उम्मेदवारी दर्ता गर्दा महामन्त्री शर्मानिकट प्रमुखका उम्मेदवार इन्द्र बुढाथोकी र सिटौलानिकट केशवराज पाण्डे समूहबीच विवाद भएको थियो । मनोनयन दर्ताका लागि पहिला सिटाैलानिकट उम्मेदवार निर्वाचन कार्यालय पुगेर पार्टीले आफ्नो नाम सिफारिस गरेको दाबी गरेका थिए । तर पछि पार्टीले शर्मानिकट उम्मेदवार बुढाथाेकी नै आधिकारिक भएकाे भन्दै पत्र पठाएकाे थियाे । याे विवादले कांग्रेसभित्र अन्तर्घात हुने आकलन गरिएकाे थियाे । निर्वाचनमा के भयो समीक्षा गर्न बाँकी रहेको पराजित उम्मेदवार बुढाथोकीले बताए ।

१० वडामा एमालेकाे प्यानलै

मेचीनगर नगरपालिकामा ७७ जना जनप्रतिनिधि मध्ये यसपटक एमालले मेयर–उपमेयरसहित ६८ वटा स्थान हासिल गरेको छ । १५ वटा वडामध्ये ३ वटा कांग्रेस, एउटा माओवादी केन्द्रबाहेक सबै वडा एमालेले कब्जा गरेको छ । त्यसमा पनि १० वटा वडामा एमालेले प्यानलै जितेको छ ।

मेचीनगर–१, २, ३, ४, ५, ७, ९, १०, ११, १२ र १३ नम्बर वडा एमालेले हात पारेको छ । जसमा २ नम्बर वडा बाहेक अरु सबै वडामा प्यानलै जितेको हाे । कांग्रेसले मेचीनगर–६, ८ र १५ तथा माओवादी केन्द्रले १४ नम्बर वडा हात पारेको छ ।

गत निर्वाचनमा कांग्रेसले ४, ५, ६, ७, ९, १० र १७ गरी सातवटा वडा जितेको थियो भने एमालेले १, २, ३, ८, ११, १३ र १४ गरी सात वडामा जित हासिल गरेको थियो । माओवादी केन्द्रले १२ नम्बर वडा जितेको थियो ।

प्रकाशित मिति: मंगलबार, जेठ १०, २०७९ ११:३७