काे हुन् भरतपुरकाे उपमेयर बनेका चित्रसेन अधिकारी ?

A+ A A-

भरतपुर महानगरको उपमेयरमा सत्ता गठबन्धनका चित्रसेन अधिकारी विजयी भएका छन् । राप्रपाकी हिमला गुरुङलाई भारी मतान्तरले हराउँदै अधिकारी विजयी भएका हुन् । भरतपुरमा सत्ता गठबन्धनविरुद्ध राप्रपा र एमालेले तालमेल गरेका थिए ।

मतगणनाको सुरुवातदेखि नै हिमलासँग मतान्तर बढाउँदै लगेका अधिकारी भारी मतका साथ विजयी भए । यसअघि वडाध्यक्ष रहेका उनले यसपटक उपमेयरमा 'इन्ट्री' मारेका छन् । अधिकारी कांग्रेसकाे भरतपुर महानगरका सभापति समेत हुन् । चितवन कांग्रेसका सभापति राजेश्वर खनाल निकट मानिने अधिकारीले सभापति देउवालाई विश्वासमा लिएर टिकट हात पारेका थिए ।

जिल्लामा गठबन्धनको किचलो चलिरहँदा उनले माहाैल ठीक पार्ने आश्वासन दिँदै देउवालाई फकाएर टिकट ल्याउन सफल भएकाे चर्चा छ ।

राजनीतिक यात्रा

२०२४ साल जेठ १ गते भरतपुर- २९ पार्वतीपुरमा जन्मेका अधिकारीले २०३८ सालबाट राजनैतिक यात्रा थालेका थिए । उनी २०४२ सालको सत्याग्रहमा सहभागी भएका थिए । २०४६ सालको जनआन्दोलनका क्रममा हिरासतमा लामो समय बिताएका अधिकारी पार्टीका सबै कार्यक्रमहरूमा अग्रपंक्तिमा रहेर नेतृत्व गर्दै आइरहेका छन् । उनले राजनीतिशास्त्रमा स्नातक गरेका छन् ।

नेपाली कांग्रेसकाे ११औँ महाधिवेशनमा क्षेत्रीय प्रतिनिधि, १२औँ महाधिवेशनमा क्षेत्रीय सदस्य हुँदै राजनीतिक यात्रा थप अगाडि बढाएका अधिकारी १३औँ महाधिवेशनमा जिल्ला सदस्य हुँदै १४औँ महाधिवेशनमा आएर भरतपुर महानगरको सभापति बनेका थिए ।

२०७४ सालको स्थानीय निर्वाचनमा भरतपुर–२१ को वडाध्यक्षम निर्वाचित भएका उनको कार्यकाल भने विवादरहित रहेन । वडाध्यक्षमा हुँदै गर्दा उनीमाथी आर्थिक अनियमितताको आरोपमा अख्तियार दुरुपयोग अनुसन्धान आयोगले छानबिनसमेत गरेको थियो ।

प्रकाशित मिति: मंगलबार, जेठ १०, २०७९ ०७:०७