भरतपुरकाे मेयरमा रेनु दाहाल विजयी, यस्ताे छ उनकाे राजनीतिक विगत

A+ A A-

भरतपुरको मेयरमा रेनु दाहाल पुनः निर्वाचित भएकी छिन् । २०७४ सालको स्थानीय चुनाव जितेर भरतपुरको प्रमुखमा एक कार्यकाल बिताइसकेकी दाहाल दोस्रोपटक मेयरमा निर्वाचित भएकी हुन् । दाहालले निकटतम प्रतिद्वन्द्वी नेकपा एमालेका विजय सुवेदीलाई भारी मतान्तरले पछि पार्दै विजयी भएकी हुन् । अहिले मतगणनाकाे कार्य सकिए पनि रुजु गर्ने कार्य भइरहेकाेले परिणाम घाेषणामा ढिलाइ भइरहेकाे छ ।

भरतपुरको मेयरमा दलगत र स्वतन्त्र गरेर २७ जनाले उम्मेदवारी दर्ता गराएका थिए । १ लाख २७ हजार ८३९ मत खसेको थियो । २९ वडामध्ये विजय र रेनुबीच सुरुमा मतान्तर खोसाखोस चले पनि वडा नम्बर ४ को गणना सुरु भएपछि भने रेनुले आफ्नो मत बढाउँदै गइन् ।

२,३ र १२ नम्बर वडामा विजयले लिड गरेका थिए भने अन्य वडामा रेनुले मतान्तर बढाउँदै जाँदा विजय भारी मतले हार्न पुगे। सत्ता गठबन्धनको विरुद्ध कांग्रेसका बागी भुँइकटहर चिह्न लिएर चुनावमा होमिएका जगन्नाथ पौडेल उठ्दा रेनुलाई कांग्रेसको धेरै मत काटिने र अप्ठ्यारो पर्ने आकलन गरिए पनि त्यस्तो हुन भने नसकेको मतपरिणामले देखाएको छ ।

सत्ता गठबन्धनसँग असन्तुष्ट कांग्रेस बाहेक एमालेकै भोट समेत रेनुलाई आएको मतगणनाको परिणामले देखाएको छ । एमालेले राप्रपासँग चुनावी तालमेल गरे पनि सत्ता गठबन्धनसँग फराकिलो मतले पराजय भोगेको छ । अघिल्लो स्थानीय चुनावमा एमालेका देवी ज्ञवालीलाई दाहालले २०३ को झिनो मतान्तरले मात्रै हराउँदा अहिलेको परिस्थिति भने फरक छ ।

रेनु दाहालको राजनीतिक यात्रा

२०७४ को स्थानीय चुनावमा निर्वाचित भएर ५ वर्ष भरतपुरको मेयरका रूपमा काम गरिसकेकी रेनु भरतपुर–१४ शिवनगरको भीमसेन नगरमा विक्रम सम्वत् २०३३ साल असार २३ गते जन्मेकी हुन् । रेनु पूर्वप्रधानमन्त्री तथा माओवादी केन्द्रका अध्यक्ष पुष्पकमल दाहालकी दोस्रो सन्तान हुन् । सशस्त्र द्वन्द्वकाे समयमा बुवा प्रचण्ड र आमा सितासँगै देशभित्रै तथा प्रवासमा विभिन्न स्थानमा पुगेकी उनले युद्धकै कारण घर छाेड्न पर्दा एसएलसी भन्दा माथिल्लो अध्ययन गर्ने अवसर भने पाइनन् ।

हाल माओवादी केन्द्रको केन्द्रीय सदस्य रहेकी दाहालले २०५१ सालमा पार्टी सदस्यता लिएकी थिइन् । दाहाल २०५२ सालको माओवादी सशस्त्र द्वन्द्वकालमा भूमिगत भएकी थिइन् । भूमिगतकालमा भारतका विभिन्न प्रान्तहरूमा पार्टीको सेक्रेटरी र महिला विभागकाे जिम्मेवारी वहन गरेको अनुभव उनीसँग छ । साथै देशको विकट ग्रामीण क्षेत्रमा संगठनात्मक काममा उनी सक्रिय थिइन् । पार्टीकाे रोल्पा जिल्ला सह–इन्चार्जको रूपमा समेत उनले काम गरेकी छन् । दाहाल पहिलो संविधानसभामा मा समानुपातिकबाट सभासद् भएकी थिइन् भने दोस्रो संविधानसभाको निर्वाचनमा भने नेपाली कांग्रेसका नेता प्रकाशमान सिहसँग पराजित भएकी थिइन् ।

प्रवासमा अखिल महिला समाजकी केन्द्रीय समिति अध्यक्ष, अखिल नेपाल महिला संघ क्रान्तिकारीकी महासचिव रहेकी दाहाल काठमाडाैं जिल्ला सचिव हुँदै हाल चितवन जिल्ला इन्जार्ज छिन् । २०७४ सालको स्थानीय तह निर्वाचनमा एमालेका देवी ज्ञवालीलाई हराउँदै भरतपुर महानगरको मेयर बनेकी थिइन् । गएको ५ वर्ष भरतपुरको भौतिक विकासमा महत्त्वपूर्ण काम गरेकाे उनकाे दाबी छ । उनै रेनु फेरि भरतपुरकाे मेयरमा निर्वाचित भएकी छन् ।

प्रकाशित मिति: मंगलबार, जेठ १०, २०७९ ०६:२८