केपी ओलीकाे गृहजिल्लामा माओवादी निल, राप्रपाले शक्ति बढाउँदा एमालेलाई धक्का

केपी ओलीकाे गृहजिल्लामा माओवादी निल, राप्रपाले शक्ति बढाउँदा एमालेलाई धक्का

A+ A A-

झापाका अधिकांश स्थानीय तहमा पाँचदलीय गठबन्धन भए पनि नेकपा माओवादी केन्द्रका उम्मेदवारहरू सफल हुन सकेनन् । आठवटा स्थानीय तहमा माओवादी र कांग्रेसबीच गठबन्धन भएकाे थियाे । तर, मतपरिणामले गठबन्धनबाट कांग्रेसलाई फाइदा हुँदा माओवादीले घाटा बेहाेरेकाे छ ।

माओवादी राप्रपाभन्दा पनि पछाडि परेकाे छ । कांग्रेसले प्रमुख जितेका पालिकामा उपप्रमुखमा भने एमाले र राप्रपाले जितेका छन् । उपमेयर पदमा माओवादीका उम्मेदवार धेरै रहे पनि उनीहरूले जित निकाल्न नसकेका हुन् ।

साेमबार बिहान सार्वजनिक भएकाे परिणामअनुसार गौरादहमा एमालेले जितेकाे छ । मतगणाना भइरहेकाे मेची नगरपालिकामामा पनि एमालेकाे अग्रता छ । मेची, बिर्तामोड, भद्रपुर, अर्जुनधारा र गौरादह नगरपालिकामा कांग्रेससँग गठबन्धन गर्दा माओवादीले उपमेयर पाएको थियो भने कमल, शिवसतासी र बुद्धशान्ति गाउँपालिकामा पनि माओवादीले उपाध्यक्ष पाएको थियो । तर यी कुनै पनि ठाउँमा माओवादी उम्मेदवारले जित निकाल्न सकेनन् ।

कांग्रेसले बुद्धशान्ति, कचनकवल, गौरिगञ्ज, कमल, झापा गाउँपालिकका साथै, भद्रपुर नगरपालिकामा जितेको छ । कांग्रेसले मेयर जितेका यी पालिकामा उपमेयर तथा उपाध्यक्ष माओवादी केन्द्रकाे भागमा परेकाे थियाे । तर गठबन्धनका उम्मेदवारलाई हराउँदै यी पालिकामा एमालेले उपप्रमुख तथा उपाध्यक्ष जितेकाे हाे ।

एमालेले गाैरादह, बाह्रदशी, विर्तामोड, शिवसताक्षी, अर्जुनधारा र कन्काईमा प्रमुख पद जितेकाे छ । यीमध्ये कन्काईमा कांग्रेसले उपप्रमुख जितेको छ भने अरुमा एमालेले उपप्रमुख पनि जितेकाे छ । एमाले अध्यक्ष केपी ओलीकाे गृहनगर दमकमा भने सत्ता गठबन्धन विजयी भयाे । कमल गाउँपालिका, भद्रपुर नगरपालिका र झापा नगरपालिकामा भने एमालेले गुमायाे ।

हल्दीबारी गाउँपालिका र दमक नगरपालिका राप्रपाले मेयरमा जितेको छ । दमकमा कांग्रेसले उपमेयर जितेको छ । समग्र नतिजा हेर्दा झापामा माओवादीभन्दा राप्रपा बलियो देखिएकाे छ । गत निर्वाचनमा राप्रपाले कचनकवल र हल्दिबारीमा जित निकालेको थियो । त्यस्तै गौरिगञ्ज नगरपालिकाको मेयर र उपमेयर राप्रपाले जितेको थियो । राप्रपाले यसपटक केपी ओलीकाे गृहनगर दमक र हल्दीबारीमा झण्डा गाडेकाे हाे । त्यस्तै कृष्ण सिटौलाको गृहनगर भद्रपुरमा राप्रपाले उपमेयर जितेको छ ।

झापामा कांग्रेसी मतदाताले माओवादी केन्द्रका उम्मेदवारलाई मतदान गर्न त्यति नरुचाएको जस्तो देखिएको माओवादी केन्द्रका केन्द्रीय सदस्य रन्जित तामाङ बताउँछन् । उनका अनुसार कांग्रेसबाट धोकाभन्दा पनि मतदाता शिक्षाको चेतनाकाे कमी भएकाे पाइएकाे छ ।

‘झापामा गठबन्धनसँग असन्तुष्ट मत एमाले र राप्रपामा गयो । त्यसको फाइदा पनि तिनै पार्टीले लिए’ उनले भने, ‘गठबन्धनमा माओवादी भने इमान्दार देखियाे ।’ स्थानीय निर्वाचनमा पार्टीभन्दा पनि व्यक्तिलाई मतदाताले हेर्ने हुँदा कतिपय स्थानीय तहमा अपेक्षा भन्दा फरक नतिजा आएकाे कांग्रेसका क्षेत्रीय सभापति इन्द्र बुढाथोकी बताउँछन् ।

प्रकाशित मिति: सोमबार, जेठ ९, २०७९ १०:५४