विष्णु पौडेलको क्षेत्रमा एमाले पराजित, २५ वर्षपछि कांग्रेसले जित्यो बुटवल

A+ A A-

नेकपा एमालेका उपाध्यक्ष तथा पूर्व अर्थमन्त्री विष्णु पौडेलको गृहनगर तथा निर्वाचन क्षेत्र रहेको बुटवल उपमहानगरमा एमालेलाई हराउँदै नेपाली कांग्रेसले जित हाँसिल गरेको छ । योसँगै बुटवलमा नेकपा एमालेको २५ वर्षको बिरासत ढलेको छ ।

नेकपा एमालेले पटक पटक जित्दै आएको रुपन्देहीको बुटवल क्षेत्रमा यो पटक भने नेपाली कांग्रेसका बुटवलका मेयरका उम्मेदवार खेलराज पाण्डेले ७५३३ मतान्तर सहित विजयी भएका छन् । पाण्डे विजयी भएसँगै बुटवलको नेतृत्वको अब कांग्रेसको हातमा गएको छ । प्रजातन्त्र आएपछि एक कार्यकाल स्थानीय तहमा नेतृत्व गरेको कांग्रेसले २५ वर्षपछि बुटवल क्षेत्रको नेतृत्व गर्ने भएको हो ।

बुटवलमा खसेको कुल ६३ हजार १ सय १६ मतमध्ये खेलराजको भागमा ३० हजार १ सय ३० मत आएको छ । जुन कुल मतको ४७.७३ प्रतिशत हो । नेकपा एमालेका उम्मेलवार बाबुराम भट्टराईले २२ हजार ५ सय ९७ मत पाएका छन् । उनलाई एमालेकै उपमेयर उम्मेदवार भन्दा पनि कम मत आएको छ । यस्तै राप्रपाका उम्मेदवार मृगेन्द्र शेरचनले ४ हजार २ सय ९७ मत पाएका छन् ।

यता उपमेयरमा भने नेकपा एमालेकी साबित्रादेवी अर्याल विजयी भएकी छन् । उनी २४ हजार ९ सय ४ मत ल्याउँदै बिजयी भएकी हुन् । गठबन्धनमा नेकपा एकीकृत समाजबादीबाट चिन बहादुर गुरुङले १६ हजार ९ सय ८० मत ल्याएका छन् भने राप्रपाकी भगवती पाण्डेले ६ हजार ५ सय २९मत ल्याएकी छन् ।

उपमहानगरका १९ वडामध्ये नेपाली कांग्रेसले ११ वडाहरू जितेको छ । नेकपा एमालेले ५, माओवादी केन्द्रले १, एकीकृत समाजवादीले १ र एक वडा स्वतन्त्र उम्मेदवारले जितेका छन् ।

२०७४ सालको पहिलो स्थानीय तहको निर्वाचनमा कांग्रेस–माओवादी गठबन्धनका उम्मेदवारहरूलाई पराजित गरी एमालेबाट मेयरमा शिवराज सुवेदी र उपमेयरमा गुमादेवी आचार्य निर्वाचित भएका थिए ।

मेयर सुवेदीले गएको निर्वाचनमा २३ हजार २४९ मत प्राप्त गरी निकटतम प्रतिद्वन्द्व कांग्रेसका खेलराज पाण्डेलाई पराजित गरेका थिए । पाण्डेको मत २० हजार ८५१ थियो । मेयरमा २ हजार ३९८ मतको अन्तर थियो ।

यस्तै उपप्रमुखमा आचार्यले २५ हजार ३०१ मत ल्याएर विजयी भएकी थिइन् । माओवादी केन्द्रका जगत बहादुर पोखरेलले १४ हजार ७९२ मत मात्र थियो । पोखरेल नेकपा विभाजनपछि एमालेमा रहेका छन् । त्यस्तै १९ वटा वडा रहेको बुटवलमा १५ वटामा एमाले वडा अध्यक्षमा पनि जित निकालेको थियो ।

यस्तो छ बुटवलमा राजनीतिक बिगत
बुटवल देशकै पुरानो नगरपालिका मध्येको हो । बुटवल विक्रम संवत् २०१६ सालमा नगरपालिका बनेको थियो । बुटवलमा प्रजातन्त्र आएपछिको २०४९ सालको स्थानीय तहको निर्वाचनमा नेपाली कांग्रेसका सूर्य प्रसाद प्रधानले मेयर जितेका थिए । २०५१ एमालेका मोदनाथ प्रश्रित सांसद हुँदै शिक्षामन्त्रीसम्म बने । ०५६ सालमा संसदको निर्वाचनमा सूर्य प्रधानले जिते । उनले विष्णु पौडेललाई पराजित गरेका थिए ।

०५४ को तत्कालीन स्थानीय चुनावमा पनि बुटवलमा एमालको तर्फबाट मेयरमा भोजप्रसाद श्रेष्ठ र उपमेयरमा विमलबहादुर शाक्य निर्वाचित भएका थिए ।

बुटवलबाट एमाले उपाध्यक्ष पौडेलले २०६४, २०७० र २०७४ को निर्वाचन लगातार भारी मतका साथ निर्वाचित भएर ‘हयाट्रिक’ गरेका छन् । पौडेलले ०६४ सालमा सूर्य प्रसाद प्रधान र ०७० को दोस्रो संविधानसभा निर्वाचनमा तत्कालीन माओवादीका नेता तथा हाल जसपा नेता डा. बाबुराम भट्टराई र सूर्य प्रसाद प्रधानलाई भारी मतका साथ बुटवलबाट पराजित गरेका थिए । ०७४ मा भने कांग्रेसका युवराज गिरीलाई पौडेलले पराजित गरेका थिए ।

को हुन बुटवलको मेयर जितेका पाण्डे
२०२६ साल फागुन ५ गते बुवा लिलाबल्लभ पाण्डे र आमा तारादेवी पाण्डेको कोखबाट स्याङ्जाको साविक आलमदेवी २ (हाल कालिगण्डकी २) मा जन्मिएका पाण्डे हाल बुटवल उपमहानगरपालिका वडा नं ८ सुख्खानगरका बासिन्दा हुन्।

१३ वर्षको उमेरमै २०३८ सालमा बुटवलमा झरेका पाण्डेले पार्टी राजनीति बुटवलबाटै सुरू गरे पनि विद्यार्थी संगठनमा आवद्ध भई स्याङ्जाबाटै राजनीतिक यात्रा सुरू गरेका थिए।

आदर्श मावि स्याङ्जाबाट २०३९ सालमा नेपाल विद्यार्थी संघको सदस्यता लिएका पाण्डे २०४० सालमा पाल्पाको जेभिटी स्कुलमा पढ्दा नेविसंघकै समितिमा आबद्ध भए।

त्यसपछि २०४३ सालमा त्रिभुवन विश्वविद्यालयअन्तर्गत पाल्पा क्याम्पसमा विज्ञान संकायको इकाइ सदस्य, २०४४ सालमा अमृत साइन्स क्याम्पसमा नेविसंघको सचिव, २०४७ सालमा बुटवल बहुमुखी क्याम्पसको नेविसंघ उपसभापति र २०५२ सालमा रूपन्देहीको नेविसंघ सचिव भए।

विद्यार्थी राजनीतिपछि तरूण दलमा आबद्ध भएका पाण्डे २०५९ सालमा नेपाल तरूण दल रूपन्देहीको अध्यक्ष, २०६० सालमा नेपाल तरूण दल केन्द्रीय सदस्य भए भने २०६७ सालमा नेपाली कांग्रेस बुटवल नगर सभापति भए।

२०६७, २०७२ र २०७८ सालमा भएका अधिवेशनबाट पाण्डे निरन्तर नेपाली कांग्रेस बुटवल नगर समितिको सभापति रहेर पार्टी र सामाजिक काममा क्रियाशील छन्। श्रीमती सीता भट्टराई पाण्डे र छोरा अभिषेक पाण्डेका साथ बुटवलमा बसोबास गर्दै आएका पाण्डेले स्नातक तहसम्मको अध्ययन गरेका छन्।

प्रकाशित मिति: शनिबार, जेठ ७, २०७९ १६:२३