दोधारमा राजपा : कांग्रेससँग मोर्चाबन्दी कि समाजवादीसँग एकीकरण ?

A+ A A-

राष्ट्रिय जनता पार्टी (राजपा) नेपालभित्र केपी शर्मा ओली नेतृत्वको सरकारलाई दिएको समर्थन फिर्तासँगै नेतृत्वमा विवाद चुलिँदै गएको छ । पार्टी अध्यक्ष मण्डल नै ध्रुविकृत बनेको छ ।

अध्यक्ष मण्डलका सदस्य तथा संसदीय दलका नेता महन्थ ठाकुरसहित अध्यक्ष मण्डलका संयोजक अनिल झा र सदस्य राजकिशोर यादव प्रमुख प्रतिपक्षी दल कांग्रेससँग मिलेर सरकारलाई गलाउने पक्षमा छन् ।

यता, प्रभावशाली नेता राजेन्द्र महतो, शरतसिंह भण्डारी र महिन्द्र राय यादव भने अर्को मधेसकेन्द्रित दल समाजवादी पार्टी नेपालसँग पार्टी एकता गर्नुपर्ने पक्षमा छन् ।

राजपासँगको एकीकरणका बारेमा पटक–पटक छलफल भएपछि तत्कालीन संघीय समाजवादी फोरमका अध्यक्ष उपेन्द्र यादवले बाबुराम भट्टराई नेतृत्वको नयाँ शक्ति पार्टीसँगको एकीकरणलाई पछि धकेलेका थिए ।

समाजवादी पार्टीसँग वार्ता र छलफल गर्नका लागि पार्टीले अध्यक्ष मण्डलका सदस्य राजेन्द्र महतोलाई जिम्मेवारी दिएको थियो । महतोले अनौपचारीक रुपमा उपप्रधानमन्त्री समेत रहेका समाजवादीका अध्यक्ष उपेन्द्र यादवसँग गोप्य छलफल गरीसकेका छन् ।

महतो, भण्डारी र राय कांग्रेससँगको मोर्चाबन्दी दिगो नहुने, राजनीतिक शक्ति आर्जन गर्न नसकिने पक्षमा छन् । तर, ठाकुर, झा र यादव भने सत्तारुढ दलसँग विपक्षी दलको हैसियतले पनि राजपाले एकीकरणको लागि थप वार्ता गर्नुको औचित्य नहुने भन्ने पक्षमा छन् ।

‘पार्टी अध्यक्ष मण्डलका कुन सदस्यले कोसँग भेट गर्नुभयो वा के कुरा गर्नुभयो भन्ने कुरा व्यक्तिगत हो’, अध्यक्ष मण्डलका संयोजक अनिल झाले भने, ‘कुनै पार्टीसँग एकीकरणका लागि अहिले औपचारिक वार्ता भएको पार्टी अध्यक्ष मण्डललाई थाहा छैन् ।’

राजपाले वार्ताको लागि भनेर गठन गरेको वार्ता टोलीले बारम्बार छलफल गरेको र त्यसको विषयमा अध्यक्ष मण्डलमा छलफल हुन बाँकी रहेको एक नेताले बताए । राजपा वार्ता टोलीका सदस्यहरुले समाजवादी पार्टीका अध्यक्ष उपेन्द्र यादव र डा.बाबुराम भट्टराईसँग पटक–पटक छलफल गरिरहेका छन् ।

तत्कालीन संघीय समाजवादी फोरमसँग एकीकरणका लागि राजपाले गहन छलफल र वार्ता चलाइरहेको बेला पूर्वप्रधानमन्त्री डा. बाबुराम भट्टराई नेतृत्वको नयाँ शक्ति पार्टीबीच एकता भएपछि राजपा नेताहरु यादवसँग चिडिएका थिए ।

समान उद्देश्य, सिद्धान्त र विचार बोकेका दलहरुबीच एकता प्रकृयालाई खुल्ला गर्दै प्रकृया अघि बढाउने निर्णय राजपाले गरिसकेको छ । तर, फोरमले एक्कासी नयाँ शक्तिसँग एकीकरण गरेपछि नेतृत्व व्यवस्थापनामा समस्या देखिने भन्दै राजपा वरिष्ठ नेताहरु पछि सरेका हुन् ।

राजपा संसदीय दलका नेता महन्थ ठाकुरलाई समाजवादीसँग एकीकरण गर्दा कुन पद दिएर मिलाउने भन्ने समस्या सघन हुँदै गएको छ । त्यसैले राजपाका शीर्ष नेताहरु समाजवादी पार्टीले सरकार छोडेर आए मात्र एकीकरणको प्रक्रियाको विषयमा छलफल गर्ने अडानमा छन् ।

पार्टी शीर्ष नेताहरुबीच भएको अन्तरविरोध र विवादको रुपमा २१ असारमा दलका नेता ठाकुरसँगै अध्यक्ष मण्डलका संयोजक अनिल झा र सदस्य राजकिशोर यादवले प्रमुख प्रतिपक्षी दलका नेता तथा कांग्रेस सभापति शेरबहादुर देउवासँग भएको दुई घण्टा लामो छलफललाई लिन सकिन्छ ।

ठाकुरसहित तीन नेताले प्रतिपक्षी दल देउवासँग वार्ता अघि बढाइरहँदा यता नेता राजेन्द्र महतो र शरतसिंह भण्डारीलगायतले भने डा. बाबुराम भट्टराई र उपेन्द्र यादवसँगको बारम्बार गोप्य छलफल गरेका थिए ।

दुई वर्ष तीन महिनाअघि मधेसकेन्द्रित ६ दल मिलेर गठन भएको राजपाको महाधिवेशन आगामी असोज/कार्तिकमा गर्ने भनिएको छ ।

प्रकाशित मिति: सोमबार, असार ३०, २०७६ ०४:५६