*गंगा वरदानसँग गाँजा संवाद

A+ A A-

छपनीले छान छान..., कहाँमा काट्यो बेतको लौरी, अल्लारे जोवन यस्तै छ, छेउकाटी रुमाल चट्टै ।

अघिल्ला पुस्ताका धेरैको जिब्राेमा झुण्डिएको तर पछिल्ला पुस्ताले बिर्सिएका यी गीतका गायक हुन गंगा वरदान ।

ठेट नेपाली शब्दमा गीत गाउने वरदान झट्ट हेर्दा विश्वचर्चित गायक बब मार्लीजस्ता देखिन्छन् । फुलेकाे लामा दारी पालेका । खबटे मुहार । धेरेले उनलाई पहिलोपटक देख्दा दिने उपाधि हो ‘मान्छे त पुरै गँजडीजस्तो’

उमेरले उनी ६५ नाघे । गीत उत्तिकै गाइरहन्छन् । धेरैले थाहा नपाएको उनको एउटा परिचय हो, गँजडी ।

के वरदान यो अभियोग स्वीकार गर्न तयार छन्? उनलाई किन लाग्छ गँजडीको आरोप ?

हालैको भेटमा उनले आफ्नो गाँजा अनुभव यसरी सुनाए :

अनि शुरु भो गाँजा सेवन..

भोजपुरको दिङ्लामा हुँदै गाँजा खान सुरु गरें । भर्खर एसएलसी पास भएको थिएँ । त्यहीबेला बुबा बित्नुभो । म १७ वर्षको मात्रै थिएँ ।

बाउ (बुबा) बितेपछि एकखालको एक्लोपनले गाँज्याे ।

त्यसबेला गाउँका बुढापाका खुब गाँजा खान्थे । मलाई भने खान मन लाग्दैनथ्यो । त्यसबेला काठमाडौंबाट मेरो भतिज पनि गाँउ पुग्यो । उसले पनि गाँजा लिएर आएको रहेछ । मलाई थाहा थिएन, भतिजसँगै गाउँका केही साथीभाई पनि गाँजा खाँदा रहेछन् ।

साथीभाइसंँगको लहैलहैमा लागेर एक दुई सर्काे तान्न थालिएछ । बिस्तारै बानी नै पर्यो । त्यही बानी आज ५० वर्षमा टेकेछ ।

स्वास्नी पालेको नदेख्ने गाँजा खाएको देख्ने ?

ड्रग्स खाएर पागल भएर सुधार केन्द्रमा बसेका धेरै देखेको छु । मलाई हेर्नुस् न, के भएको छ ? अहिलेसम्म कुनै रोग छैन । मैले कुनै पनि गीतको रोयल्टी अहिलेसम्म पाएको छैन । तैपनि श्रीमती पालेर बसेकै छु । स्वास्नी (श्रीमती) पालेको नदेख्ने गाँजा खाएको देख्ने ?

संसारका साहित्यकार, लेखक, गीतकार सबैले गाँजा खान्छन् । तर, मलाई नै किन लेजेन्ड भनिएको हो ? अचम्म लाग्छ बा ।

मलाई जहाँ पनि ढोका खुल्ला हुन्छ

खाउँखाउँ लागेको बेला गाँजा खाना नपाएको दिन कयौं छन् । तर, गाँजा खोजेरै चाँहि हिड्दिनँ । मलाई जहाँ पनि ढोका खुल्ला छ । म कसैलाई गाँजा ल्याइदे, ख्वाइदे पनि भन्दिनँ ।

दुई वर्ष अघिसम्म कसैले गाँजा किन्दिने पनि थिए । तर, अहिले किनेरै खान्छु । मजस्ता नियमित गाँजा खाने धेरै छन् । जाउँ हजुर खाउँ भन्दाभन्दै जुटि पो हाल्छ त गाँजा ।

पुलिस पनि टाप कसेछ

म गाँजा खान्छु भन्ने कुरा अब नौलो रहेन । यतिसम्मकी पुलिसलाई पनि थाहा छ । एकताका धरान गीतभवन चोकमा एउटा आएर गाँजा दियो । पुलिस आयो समात्न खोज्यो । मैले उल्टै प्रश्न गरें–कसले खान्न गाँजा ? दुनियाँ गाँजा खाएर पागल भएर हिँड्दा केही नहुने गंगा वरदानले खाँदा पागल भयो ?

आँखा चिम्मेर गाली देको, अनि एकछिनपछि यसो आँखा खोलेको त पुलिस अघि टाप कसेछ । म चोकमै धुवाँ उडाउन थालिहालें ।

गाँजाले शान्ति मिल्छ

गाँजा नखाइ चार महिनासम्म बस्नुपर्यो एकपटक । तर यो निरन्तर दोहोरिएको छैन । मलाई गाँजाले शान्ति र आनन्द दिन्छ । खाँदा कसैको पनि याद आउँदैन । अर्कै दुनियाँमा पुगिन्छ ।

सेक्स होइन गाँजा रोज्छु

तपाईंलाई गफ दियो बुढाले भन्ने लाग्ला । तर सुन्नुस्, म गाँजा र सेक्समध्ये एउटा रोज भन्दा गाँजा रोज्ने मान्छे हो । उमेरमा पनि म सेक्स धेरै गर्दिनथेँ ।

तपाईंलाई थाहै छ नि (फिस्स हाँस्दै) सेक्स बदनामको बाटो, गाँजा आनन्दको स्राेत ।

म उमेरमा पनि सेक्सको पछि लागिनँ, हिडिनँ । आफ्नो इच्छाको कुरा हो । अझै पनि धेरै युवती छन् । तर नम्बर लिने र म्यासेज गर्ने गर्दिनँ । मेरो स्वभाव त्यस्तो छैन । मेरो ठाउँमा अरु भएको भए सँगै बस्थे । मेरो नैतिकताले दिँदैन । मेरो श्रीमती परिवार छन् ।

मन्त्रीसँगपनि गाँजा खाइयो

पञ्चायतकालका मन्त्रीहरुसँग पनि गाँजा खाएको छु । अहिले ती गाँजाखाने मित्रहरु कता हराए, भेट्दै भेट्दिनँ । मलाई राम्ररी थाहा छ, मसँग गाँजा खाएकाहरु राम्रा ठाउँमा पुगेका छन् । तर, उनीहरुलाई म ठूलाे मान्दिनँ ।

मसँग गाँजा खाने धेरै छन् । साँच्चै भन्ने हो भने गनेर भ्याउने अवस्था नै छैन । गाँजा खाएर सानो र ठूलो मान्छे भन्ने हुँदैन । को छ ठूलो मान्छे देखाउनुस् त ? जागिर नखाई र कसैलाई नलुटी कसले श्रीमती पालेको छ ? तर, गाँजा खाएर पनि बिहानदेखि बेलुकासम्म क्यास (पैसा) खर्च गर्ने हिम्मत कोही छ भने त्यो गंगा वरदान मात्र हो ।

गाँजाले को बिग्रियो?

ट्याब खाएर धेरै बदनाम भएका छन् । तर म चाँही गाँजा खाएर मन शान्त पारेर कुटीमा बस्ने हो । गाँजा खाएर संसारमा कोही पनि बिग्रिएका छैनन् । यो त औषधि पो हो त ।

ट्याव खाने काम लाग्दैनन्

म कसैलाई गाँजा नखाउ भन्दिनँ । आफ्नो इच्छाको कुरा हो । मनले माग्यो भने खाइदिए हुन्छ, बालै भएन ।

गाँजा खाएर कोही मरे मर्छन, मलाई मतलब छैन् । तर, खाएर बदमासी गर्नुभएन । लिमिटमा खानुपर्छ । ट्याब खाने मान्छे चाँहि काम लाग्दैन, लेखेर राख्नुस् ।

र अर्को कुरा, गाँजा खान पनि अनुशासन चाहिन्छ ।

फिदिमको गाँजा रसिलो

सबै ठाउँमा एकै नाशको गाँजा पाइँदैन । हावापानी अनुसार फरक-फरक हुन्छ । सप्तरी, धनकुटा छिन्ताङको गाँजा रसिलो हुन्छ । फिदिमको गाँजा पनि मलाई रसिलो लाग्छ ।

२०४६ सालदेखि मैले कपाल काटेको छैन । गाँजा खानाकै लागि कपाल र दाह्री पालेको होइन । फेरि शिव भक्त भएकाले कपाल दारी राखेको हो ।

मलाई एक्लो पारियो

म शुद्ध मन भएको मान्छे । मैले जस्तो अरुले बोल्न सक्दैन । अरुको झोला बोक्ने र चाकरी गर्नेले मलाई रुचाउँदैनन् । शब्द कसले लेख्न सक्छ ? जसले पायो त्यसले गीत बोल्न सक्छ ?

मसँग गाँजा खाने साथीहरु मन्त्रीसम्म भए । म गायक भएँ । यति मात्रै फरक हो । मैले कसैलाई लुट्न र ढाँट्न सकिनँ । बरु आफैं लुटिएको छु । त्यसैले पनि म एक्लो भएँ ।

घर गृहस्थी त्याग्यो भन्छन् । तर मेरा पनि वाध्यता छन् क्या ! मलाई दरबारमा पनि गीत गाउन बोलाएका थिए । तर गइनँ । यस्ता अवसर धेरै गुमाएको छु । त्यसैले मलाई घरगृहस्थी त्यागेको भन्न मिल्दैन । मलाई एक्लो पारिएको हो ।

दिनमा ६० पटकसम्म गाँजा खाएको छु

विवाह गर्नु पहिले दिनको ५०/६० पटक गाँजा खान्थेँ । जोगीसँग बसेर पनि खाएँ । बेलुका १२ बजे सम्म पनि खान्थेँ । मेची–महाकाली यात्रा गर्दा गंगा वरदानसँग बस्दा गाँजा खान र गीत सुन्न पाइन्छ भनेर झुम्मिने धेरै थिए । मैले सबैको आर्शिवाद पाएको छु ।

बिस्तारै कम गर्दैछु

अहिले श्रीमतीसँग बस्छु । गाँजा कति खाने भन्ने मनको कुरा पनि हो । दिनको ५/६ चिलिम खान्छु । कहिले साथीभाई भेट्दा मात्रै खान्छु । पहिलेभन्दा धेरै कम गरेको छु ।

मेरो श्रीमतीलाई मेरो बानी सबै थाहा छ । उसलाई मेरो श्रीमान कस्तो छ भनेर थाहा हुन्छ । इसाराले नै कुरा बुझ्छिन् । उनले सधैं राम्रो मान्छेसँग बसेर खानुस् भन्छिन् । हाम्रो जोडी देख्दा दुनियाँ छक्क पर्छन् । हामी सँगै घुम्न जान्छौं ।

गाँजा खाएपछि खाना रुच्छ भन्नु भ्रम हो । मलाई दुई मुठीको भात पनि रुच्दैन । मलाई मिठो चाहिन्छ, थोरै रुच्छ । मलाई जवानीमा पनि गाँजा खाँदा भात रुचेन ।

*(धुमपान र मद्यपान स्वास्थ्यका लागि हानिकारक छ । शिलापत्रले धुमपानको प्रवर्द्धन गर्न नभइ ओझेलमा परेको एउटा स्रष्टाको दैनिकीलाई मात्र पाठकमाझ प्रस्तुत गरेका हाैं । यसलाई गंगा वरदानको स्वभाव र बानीका रुपमा मात्र बुझिदिन अनुरोध छ)

प्रकाशित मिति: सोमबार, असार ३०, २०७६ ०३:५९