झापाको बिर्तामोडमा बलियाे मानिएकाे गठबन्धन कसरी हार्‍याे ? एमालेकी पवित्रा बनिन् मेयर

झापाको बिर्तामोडमा बलियाे मानिएकाे गठबन्धन कसरी हार्‍याे ? एमालेकी पवित्रा बनिन् मेयर

A+ A A-

झापाको बिर्तामोड नगरपालिकाको मेयर र उपमेयरमा नेकपा एमालेले जित हात पार्‍यो । अघिल्लाे पटक पनि एमालेले जितेकाे थियाे ।

मेयरमा एमालेकी पवित्रा महताराले नेपाली कांग्रेसका भोजराज सिटौलालाई तीन हजार ७ सय ५८ मतले हराइन् । उनले १६ हजार ५ सय २० मत प्राप्त गर्दा सिटौलाको १२ हजार ७ सय ६२ मत मात्र पाए ।

यसअघिको कार्यकालमा बिर्तामोडको उपप्रमुख रहेकी महतारा जिल्लामा नगरपालिकाको प्रमुखमा निर्वाचित हुने पहिलो महिला बनेकी छन् । उनी झापामा मात्र होइन साविककाे मेची अञ्चलमै मेयर जित्ने पहिलो महिला हुन् ।

यसैगरी, उपप्रमुखमा नगेन्द्र संग्रौलाले १५ हजार ५ सय ८६ मत प्राप्त गरी विजयी भए भने, उनका निकटतम प्रतिस्पर्धी माओवादीका सीपी कडरियाले आठ हजार ४ सय ५१ मत मात्र ल्याएर हारे ।

झापाको बिर्तामोडमा एमालेका ४ जना केन्द्रीय नेता छन् भने, यो नगरमा एमालेकै केन्द्रीयस्तरका अरु पनि केही नेता बसोबास गर्छन् । एमालेका प्रदेश–१ प्रमुख देवेन्द्र घिमिरे, अग्नि खरेल, दुर्गाप्रसाद प्रसाईं, अर्जुन राई र नरेश खरेलले पनि बिर्तामोड नगरपालिकामा एमालेलाई जिताउन आफ्नो सबै समय र शक्ति खर्चिए ।

साथै, प्रदेश सांसद एकराज कार्की र प्रदेश कमिटी सदस्य उमानाथ ओली पनि यो स्थानीय निर्वाचनमा एमालेलाई जिताउने घर–दैलो कार्यक्रममा खटिएका थिए ।

अहिलेको अवस्थामा यो जित सामान्य विषय नभएको मेयरमा विजयी पवित्रा बताउँछिन् ।

गत स्थानीय निर्वाचनमा समेत यो नगरपालिकामा एमालेले जितेर राम्रो काम गरेकै कारण यो पटक पनि जनताले एमालेलाई नै रोजेको बताउँदै उनले पार्टी, व्यक्ति र स्वार्थमाथि उठेर काम गर्ने बचन गरिन् ।

गठबन्धन हार्नुको मुख्य कारण

बिर्तामोड नगरपालिकामा ५७ हजार ४ सय ९ मतदाता छन् । यहाँ विगतदेखि नै एमाले र कांग्रेस मुख्य प्रतिस्पर्धी हुन् । बिर्तामोड नगरपालिकामा कांग्रेस, माओवादी, एर्कीकृत समाजवादी र राप्रपाले एमालेविरुद्ध गठबन्धन गरेका थिए ।

बिर्तामोड नगरपालिकामा कांग्रेसले ९ हजार, माओवादीले ५ हजार, एसले ३ हजार र राप्रपाले २ हजार मतदाता आफनो पार्टीको रहेको दाबी गरेका थिए । गठबन्धनभित्रका पार्टीहरूको दाबीलाई आधार मान्ने हो भने पनि बिर्तामोड नगरपालिकामा गठबन्धनको २० हजार मत आउनुपर्ने हो ।

तर, पराजित मेयरका उम्मेदवार सिटौलाले १२ हजार ७ सय ६२ मत मात्र पाए । यो नगरपालिकामा गठबन्धनको सबै मत गठबन्धनकै उम्मेदवारलाई नखसेको स्वीकारछन् माओवादीबाट पराजित उपमेयरका उम्मेदवार सीपी कडरिया । प्राप्त मत परिमाणको समीक्षा अब गठबन्धनले बसेर गर्ने उनले शिलापत्रलाई जानकारी दिए ।

गठबन्धनको धेरै मत बदर र गठबन्धनका बारेमा मतदाता शिक्षा दिन नसक्दा हार ब्येहोर्नुपरेको उनको भनाइ छ ।

बिर्तामोड नगरपालिकामा एमालेले आफ्नो मतदाता १० हजार भएको बताउँदै आए पनि १६ हजार ५ सय २० मत मेयरमा विजयी पवित्राले पाइन् । उनले एमालेको मतदाता संख्याभन्दा ६ हजार बढी ल्याएको मत गठबन्धनकै रहेको गठबन्धनकै नेताहरूले दाबी गरेका छन् ।

बिर्तामोडमा कांग्रेसले गठबन्धन गर्दा मेयरमा गलत व्यक्ति उठाएको र त्यसको फाइदा एमालेले लिएको कांग्रेसका एक नेताले विश्लेषण गरे । 'भोजराज सिटौला जीको व्यक्तित्वमाथि प्रश्न उठिरहेका बेला कांग्रेसले उहाँलाई मेयरको टिकट दिएपछि नै गठबन्धन हार्छ भन्ने चर्चा भएकाे र कांग्रेस कार्याकर्तामा आस मरेको थियाे', उनले भने ।

कन्द्रीय शक्तिका भरमा गलत व्यक्तिलाई टिकट दिदाँ हार व्येहोर्नु परेको उनको भनाइ छ । सिटौला कांग्रेस प्रदेश–१ का सभापति उद्धव थापा निटक हुन् । नेतृत्वले सही मान्छेलाई नउठाउँदा बिर्तामोडमा कांग्रेसले एउटा राम्रो मौका गुमाएको उनी बताउँछन् ।

प्रकाशित मिति: शुक्रबार, जेठ ६, २०७९ १७:०५