२४ वर्षपछि दमकमा एमालेको किल्ला भत्काउने राम थापा काे हुन् ?

A+ A A-

एमाले अध्यक्ष तथा पूर्वप्रधानमन्त्री केपी शर्मा ओलीको गृहनगर दमक नगरपालिकाको मेयरमा राप्रपाका रामकुमार थापा निर्वाचित भएका छन् । मेयरमा निर्वाचित थापाले १७ हजार ५२५ मत प्राप्त गर्दा निकटतम प्रतिद्वन्द्वी एमालेकी गीताकुमारी पौडेल अधिकारीले १६ हजार ९ सय ६६ मत पाइन् ।

थापा कांग्रेस, माओवादीसहितको ६ दलीय गठबन्धनबाट चुनावी मैदानमा थिए भने एमाले एक्लै एक्लै प्रतिस्पर्धा थियो । गत निर्वाचनमा दमकका मेयर रोमनाथ ओलीभन्दा उपमेयर विजेता अधिकारीले १ हजार ८ सय १९ मत बढी पाएकी थिइन् । उनले १२ हजार ६२५ मत ल्याएर जितेकी थिइन् । अहिले भने उनी ५ सय ५९ मतान्तरले हारिन् ।

उपमेयरमा कांग्रेसकी रेगिना भट्टराई १७ हजार ५२ मत प्राप्त गरी विजयी भएकी छन् । उनका प्रतिस्पर्धी एमालेका अम्बिकाप्रसाद खनालले १६ हजार ५ सय ७४ मत ल्याएर पराजित भए ।

जहिल्यै दोस्रो थापा यो पटक मेयर बने

२०४९ सालयता थापा दमकको मेयरमा लड्दै आए पनि सबै चुनावमा पराजित भएका नेता हुन् । यो पटक भने उनले कांग्रेस, माओवादी, एकीकृत समाजवादी र अन्य साना दलको साथ पाएपछि मेयर जितेका हुन् । तीन दशकयता राप्रपाको सक्रिय राजनीति गर्दै आएका उनी दमकमा राप्रपाबाट एक्लै चुनावमा लड्दा सधैँ दोस्रो हुन्थे ।

२०४९, २०५४ र २०७४ मा भएका तीनवटै स्थानीय चुनावमा दमकको प्रमुख र उपप्रमुख एमालेले जितेको थियो । यी तीनवटै स्थानीय निर्वाचनमध्ये २०५४ र २०७४ मा थापा एमालेका तत्कालीन मेयर रोमनाथ ओलीसँग लडेका थिए । दुईवटै चुनावमा थापा ओलीसँग हारेका थिए ।

'दमकसँग मेरो जन्मिँदैको सम्बन्ध छ । त्यही भएर जति पटक पराजित भए पनि दमकमा सक्रिय राजनीति गर्न छाेडेको थिइनँ', उनी भन्छन्, 'अब जनताले नयाँ अनुभूति गर्नेगरी काम गर्छु ।' उनले आफूले सुशासन र विकासमा जाेड दिने बताए ।

‘अब म सिंगो दमकवासी र गठबन्धनको प्रतिनिधि हुँ । त्यसैले सबैलाई सही र उचित हुने काम गर्छु । सबैको साथ र सहयोगसँगै सरसल्लाह लिएर मात्र अघि बढ्छु’, उनले भने ।

एमालेलाई दोस्रो पटक झट्का

राप्रपाले २०७४ सालको प्रतिनिधिसभा तथा प्रदेशसभा निर्वाचनमा एमालेलाई सघाएको थियो । त्यो निर्वाचनमा एमाले अध्यक्ष केपी ओलीले राप्रपा र माओवादीको साथ पाएर चुनावमा जितेका थिए । झापाको साविक निर्वाचन क्षेत्र नम्बर-७ बाट २०६४ मा भएको संविधानसभाको पहिलो निर्वाचनमा एमाले अध्यक्ष ओलीलाई माओवादीका विश्वदीप लिङ्देनले हराएका थिए ।

माओवादीका सामान्य नेताले ओलीलाई चुनाव हराएपछि त्यो बेला ठूलै खैलाबैला मच्चिएकाे थियाे । अहिले स्थानीय तहमा पनि उनै ओलीको निर्वाचन क्षेत्रमा एमालेलाई गठबन्धनले पराजित गरेको छ । एमालेले हारेको भन्दा पनि नयाँ पाठ सिक्ने अवसर पाएको मेयरमा पराजित गीता अधिकारी बताउँछिन् । ‘एमालेले एक्लै सबै पार्टीसँग लड्दा पनि थोरै मतले हार्नुपर्‍यो । यो हार होइन, एमालेको जित हो । एमाले अब झन् दमकको विकास र यहाँका जनतासँग सहकार्य गर्न लागिपर्छ’, उनले भनिन् ।

प्रकाशित मिति: शुक्रबार, जेठ ६, २०७९ १४:१२