एमालेकै गढमा विजयलाई कम मत, प्रचण्डले एमालेकाे भाेट किनेकाे देवी ज्ञवालीकाे दाबी

एमालेकै गढमा विजयलाई कम मत, प्रचण्डले एमालेकाे भाेट किनेकाे देवी ज्ञवालीकाे दाबी

A+ A A-

भरतपुर महानगरपालिकामा एमालेकै गढ मानिएका वडाबाट मेयरका उम्मेदवार विजय सुवेदीको मत कम आएको छ । गणना जारी रहेका वडा नम्बर ११ र १२ मा एमालेका वडाध्यक्षका उम्मेदवारहरूले राम्रो मत ल्याए पनि सुवेदीलाई भने कम मत खसेको छ । तीनै वडाबाट सत्ता गठबन्धनकी उम्मेदवार रेनु दाहालले बढी मत पाएकी छिन् ।

भरतपुर ११ मा ६ हजार ५ सय ६३ मत गन्दा रेनुले यस वडामा १ सय ७० मत बढीले अघि थिइन् । यो वडामा ९ हजार ८१ मत खसेको थियो । यता १२ मा खसेको ४ हजार ५ सय ३१ मतमध्ये ३ हजार १ सय ९४ मतगणना हुँदा रेनुभन्दा विजय १ सय ९९ मतले मात्रै अगाडि छन् । आफ्नै वडा १२ बाटसमेत सुवेदीले अपेक्षाकृत मत प्राप्त गर्न सकेनन् ।

भरतपुर महानगरपालिकाको वडा १० सम्म गणना हुँदा रेनु विजयभन्दा ३ हजार २ सय ४ मतले अगाडि थिइन् । एमालेले आफ्नो गढ मानेका दुई वडामा मत गनिसक्दा रेनुसँग मतान्तर झिनो अन्तरले मात्रै बढाएका छन् । यता काँगेसबाट बागी उम्मेदवार बनेका जगन्नाथ पाैडेलले भने आफ्नो मत बढाइरहेका छन् । उनले यी दुई वडामा हालसम्म गनिएको मतमध्ये ९ सय ७४ मत पाएका छन् ।

नेकपा एमालेका नेता देवी ज्ञवाली ११ र १२ नम्बरमा सोचेअनुरुप मत ल्याउन नसकेको स्वीकार गर्छन् । उनका अनुसार अघिल्लो स्थानीय निर्वाचनमा आफूले तत्कालीन प्रतिस्पर्धी रेनु दाहाल भन्दा राम्रो मत ल्याएको यी वडामा अहिले एमालेकै मत काटिएको छ । ‘पहिले र अहिलेको परिस्थिति फरक छ । पहिले वडामा गठबन्धन थिएन अहिले छ तर यहाँ आर्थिक चलखेलको कारणले आफ्नै मतदातालाई एमालेले टिकाउन नसकेको महसुस भएको छ,’ उनले भने ।

११ र १२ नम्बर वडाअध्यक्षमा एमालेले विजयउन्मुख मत ल्याए पनि मेयरमा मत ल्याउन नसक्दा एमालेलाई सकस पर्ने देखिएको छ ।

मेयर प्रत्यासीलाई कुन वडामा कति मत ?

वडा १ मा रेनु दाहालले १२ सय ८ मत पाउँदा विजय सुवेदीले १ हजार ८७ र जगन्नाथ पौडेलले ४ सय ३० मत प्राप्त गएका छन् । वडा नम्बर २ मा रेनुले १७ सय १० मत ल्याउँदा विजयले १८ सय २८ र जगन्नाथले ४ सय ९४ मत पाएका छन् । यस्तै, वडा नम्बर ३ मा रेनुले ९ सय ७६ मत ल्याएकी छिन् भने त्यसवडामा विजयले १ हजार २९ मत पाएका थिए ।

वडा ३ बाट जगन्नाथले भने ६ सय ५८ मत ल्याएका थिए । वडा ४ मा रेनुले १८ सय २४ मत ल्याउँदा विजयले १७ सय ४५ मत प्राप्त गरिन् भने जगन्नाथले १२ सय ६ मत प्राप्त गरे । वडा ५ मा रेनुले १७ सय ५३ मत ल्याउँदा विजयले १४ सय ९ र जगन्नाथले ८ सय १५ मत प्राप्त गरे । यता वडा ६ मा भने रेनुले १४ सय ९९ मत ल्याउँदा विजयले ११ सय ६० मत ल्याए । जगन्नाथले ९ सय १ मत प्राप्त गरे ।

वडा ७ मा रेनुले १८ सय ३२ मत ल्याउँदा, विजयले १४ सय १७ र जगन्नाथले ७ सय ४२ मत प्राप्त गरेका थिए । वडा ८ मा रेनुले १९ सय ७९ मत ल्याउँदा विजयले १२ सय ५० मत ल्याए भने जगन्नाथले ५ सय ४६ मत प्राप्त गरेका थिए । यस्तै वडा नम्बर ९ बाट रेनुले १७ सय ५३ मत पाउँदा विजयले १४ र १६ र जगन्नाथले ४ सय ९१ मत ल्याए । वडा नम्बर १० मा रेनुले १९ सय ९३ मत पाउँदा विजयले १८ सय ५९ मत ल्याएका थिए भने जगन्नाथले ९ सय ६९ मत प्राप्त गरेका थिए ।

प्रकाशित मिति: शुक्रबार, जेठ ६, २०७९ १३:१७