राजनीतिमा उदाए ‘गुण्डा नाइके’ दावा लामा, अर्का राधे फेरि प्रहरी खोरमा

A+ A A-

काभ्रेको भुम्लु गाउँपालिकाको अध्यक्षमा माओवादी केन्द्रका प्रेमबहादुर भुजेल र उपाध्यक्षमा कांग्रेसका जितेन्द्रमान तामाङ उर्फ दावा लामा’ निर्वाचित भएका छन् ।

अध्यक्षमा निर्वाचित भुजेलले एमालेका प्रेमकुमार तामाङलाई हराएका हुन् । भुजेलले ५ हजार ७७२ मत प्राप्त गर्दा उनका निकटतम प्रतिद्वन्द्वी एमालेका तामाङले ४ हजार ५६८ मत पाए ।

त्यस्तै, उपाध्यक्षमा एमालेकी कल्पनाकुमारी श्रेष्ठलाई हराउँदै कांग्रेसका दावा लामा विजयी भएका हुन् । उनले ६ हजार ०९८ मत पाउँदा श्रेष्ठले ४ हजार २९ मत पाइन् । उपाध्यक्षमा विजयी दावा आपराधिक पृष्ठभूमिबाट राजनीतिमा उदाएका हुन् ।

२०७३ सालपछि भारतको सिक्किम बस्दै आएका दावा केही समयअघि मात्रै नेपाल आएर कांग्रेसको भ्रातृ संगठन तरुण दलको राजनीतिमा होमिएका थिए । यसअघि दावा तरुण दल काभ्रेको अध्यक्ष र बागमती प्रदेशको उपसंयोजकसमेत भइसकेका छन् ।

गत २१ माघमा कांग्रेस केन्द्रीय तरुण विभागले दावालाई उपसंयोजकको जिम्मेवारी दिएको थियो ।त्यसयता भने उनी काभ्रेको राजनीतिमा सक्रिय छन् । प्रहरीको सूचीमा दावा लामा पहिलो श्रेणीका गुण्डा नाइके हुन् ।

उनले २०६७ सालदेखि विभिन्न समयमा झै-झगडा र लागुऔषध अभियोगलगायत कसुरमा करिब दुई वर्ष जेल सजाय भोगिसकेका छन् । प्रहरीका अनुसार त्यो बेला उनी क्यासिनोमा मिटर ब्याजमा पैसा लगाउने काम गर्थे ।

काभ्रेको साविक भुम्लुटार गाविसका दावा सुरुमा प्रहरी इन्काउन्टरमा मारिएका कुमार श्रेष्ठ ‘घैंटे’ मार्फत गुण्डागर्दीको दुनियाँमा प्रवेश गरेको अपराध अनुसन्धानमा लामो समय काम गरेका एक प्रहरी अधिकारी बताउँछन् ।

अपराधको दुनियाँमा प्रवेश गरेको केही समयमै चर्चामा आएका दावा पछि घैंटेसँगको सम्बन्ध छाडेर काभ्रेकै अर्का गुण्डा नाइके गणेश लामाको काभ्रेली समूहमा लागेका थिए । गणेश लामाको सहयोगी उमेश लामामार्फत गणेशको समूहमा पुगेका दावा त्यहाँ पनि धेरै समय टिक्न सकेनन् । पछि आफ्नै नयाँ समूह बनाएर आपराधिक गतिविधिमा लागे ।

सुरुमा उनको समूहमा अभिमानसिंह बस्नेत, प्रेम ठकुरीलगायतका केही आपराधिक गतिविधिमा लागेका युवा थिए । दावा दोस्रो संविधानसभाको चुनावअघि काभ्रे क्षेत्र नम्बर १ का सांसद तीर्थ लामामार्फत कांग्रेसमा प्रवेश गरेका थिए ।

दावामाथि २९ चैत २०७३ मा बौद्ध नयाँबस्ती दिव्य पार्टी प्यालेसभित्रै रहेको जिम क्लब जाँदै गर्दा अर्का गुण्डा नाइके समीरमानसिंह बस्नेत समूहका लोप्साङ लामाले गोलीसमेत प्रहार गरेको थियो । त्यसपछि प्रहरीले गुण्डा नाइकेहरूलाई इन्काउन्टर गर्न थालेपछि उनी भारत पुगेका थिए । २०७२ यता प्रहरीको इन्कान्टरमा धादिङका दिनेश अधिकारी ‘चरी’, नुवाकोटका कुमार श्रेष्ठ ‘घैंटे’, रुपन्देहीका मनोज पुन र ओम आले मारिएका छन् ।

दावालाई गोली हान्ने समीरमानसिंह समूहका लोप्साङ, समीरसहित सात जना निर्माण व्यवसायी संघका अध्यक्ष शरद गौचनको हत्या अभियोगमा जेलमा छन् । दावालाई १६ भदौ २०७५ मा दुबईबाट दिल्ली जाने क्रममा भारतीय प्रहरीले इन्दिरा गान्धी अन्तर्राष्ट्रिय विमानस्थलबाट पक्राउ गरेको थियो । भारतमा उनीमाथि सट्टेबाजीको अभियोग लागेको थियो ।

आपराधिक पृष्ठभूमिकै राजीव गुरुङ उर्फ दीपक मनाङे राजनीतिमा प्रवेश गरेर सांसद जित्दै हाल गण्डकी प्रदेशको खेलकुदमन्त्री छन् । त्यस्तै, गणेश लामा पनि कांग्रेसको केन्द्रीय सदस्यमा निर्वाचित भएका छन् ।

अर्का गुण्डा नाइके धादिङका राधाकृष्ण भण्डारी उर्फ ‘राधे’ लाई भने प्रहरीले पक्राउ गरेको छ । उनी बिहीबार मात्र छुटेको धादिङका प्रहरी प्रवक्ता डीएसपी जोगेश्वर भण्डारीले जानकारी दिए । प्रहरीले राधेलाई धादिङबेँसीस्थित नीलकण्ठ- ३ का स्वतन्त्र उम्मेदवार राजकुमार श्रेष्ठलाई ज्यान मार्ने धम्की दिएको आरोपमा पक्राउ गरेको थियो ।

राधे पनि कांग्रेस धादिङको राजनीतिमा सक्रिय छन् । कांग्रेसको आसन्न १४औँ महाधिवेशनमा उनी महाधिवेशन प्रतिनिधिमा निर्वाचित भएका थिए। धादिङ क्षेत्र नम्बर १ बाट खस आर्यतर्फबाट राधेले महाधिवेशन प्रतिनिधि जितेका थिए । राधे तरुण दल धादिङका उपाध्यक्ष हुन् । गुण्डागर्दी गरेको अभियोगमा ‘राधे’ पटक-पटक पक्राउ पर्दै छुट्दै आएका छन् ।

पछिल्लो समय २३ असोज ०७७ मा राधे धादिङ सिद्धलेक गाउँपालिकाका जनप्रतिनिधिलाई धम्की दिएको उजुरीका आधारमा पक्राउ परेका थिए । सिद्धलेक गाउँपालिकामा अवैध रूपमा सञ्चालन गरेको राधेको क्रसर उद्योग जनप्रतिनिधिले बन्द गराउन खोजेपछि उनीहरूबीच विवाद भएको थियो ।

राधेमाथि धादिङकै आयुष तामाङमाथि खुकुरी प्रहार गरेकोदेखि ०७० मा धादिङबाट काठमाडौं आउँदै गर्दा धादिङकै ‘चरी’लाई गोली हानेको अभियोग छ । पछि चरी समूहले राधेमाथि गोंगबुको एक रेस्टुरेन्टमा खुकुरी प्रहार गरेको थियो ।

प्रकाशित मिति: शुक्रबार, जेठ ६, २०७९ १०:१८