जुम्लाका ८ वटै स्थानीय तहको मतगणना सकियो, कहाँ कसको जित ?

A+ A A-

जुम्लाको आठ वटै स्थानीय तहको मतगणना सकिएको छ । जसमध्ये ५ स्थानीय तहमा नेपाली कांग्रेस विजयी भएको छ । दुई स्थानीय तहमा नेकपा माओवादी केद्रले तिजेको छ ।

जुम्लाको एक मात्र चन्दननाथ नगरपालिका चन्दननाथमा स्वतन्त्र उम्मेदवार विजयी भएका छन् । कांग्रेसले तीन पालिकामा उपप्रमुख जितेको छ । त्यस्तै नेकपा माओवादी केन्द्रले दुई प्रमुख र चार उपप्रमुख जितेको छ । नेकपा एकीकृत समाजवादीले एक उपप्रमुख जितेको छ ।

चन्दननाथ नगरपालिका

चन्दननाथ नगरपालिकामा नेपाली कांग्रेसले टिकट नदिएपछि स्वतन्त्र उम्मेदवारी दिएका राजुसिंह कठायत विजयी भएका हुन् । कठायतले २४०३ मत प्राप्त गरेका छन् । नेपाली कांग्रेसबाट मेयर पदका उम्मेदवार बनेका पदम बहादुर शाहीले २३४१ मत ल्याए ।

चन्दननाथ नगरपालिकामा उपप्रमुखमा कांग्रेसकी रामदेवी खड्का विजयी भएकी छन् । खड्काले २८०८ मत मत प्राप्त गरेकी छन् । त्यस्तै नगरउप्रमुखका प्रतिस्पर्धी समाजवादीका भीमबहादुर थापाले १६८६ मत प्राप्त गरेका छन् ।

गुठीचौर गाउँपालिका

जुम्लाको गुठीचौर गाउँपालिका अध्यक्षमा कांग्रेसका दानबहादुर बुढा विजयी भएका छन् । कांग्रेसका बुढाले १७७५ मत प्राप्त गरी विजयी भएका हुन् । उनका निकटतम प्रतिद्वन्द्वी एकीकृत समाजवादीका उम्मेदवार जनक थकालीले १६०४ मत प्राप्त गरे ।

उपप्रमुखमा एकीकृत समाजवादीकी शान्तिकुमारी मल्ल भण्डारी विजयी भएकी छन् । उनले १५०३ मत पाइन् । उनका निकटतम प्रतिद्वन्द्वी नेकपा माओवादी केन्द्रका उम्मेदवार राजकन्य बुढाले १२१४ मत प्राप्त गरेकी छन् ।

तिला गाउँपालिका

जुम्लाको तिला गाउँपालिकाको अध्यक्षमा माओवादी केन्द्रका मोतीलाल रोकाया र उपाध्यक्षमा गोरीकला बुढा (कल्पना) विजयी भए । रोकाया कांग्रेसका एकराज उपाध्यायलाई २१ मतअन्तरले पछि पार्दै विजयी बनेका हुन् । उनले १९३६ मत प्राप्त गरेका छन् । उनका निकटतम प्रतिद्वन्द्वी कांग्रेसका उपाध्यायले १९१५ मत पाए ।

त्यस्तै उपाध्यक्षतर्फ माओवादी केन्द्रकी गोरीकला बुढा (कल्पना) विजयी भइन् । उनले २००४ मत प्राप्त गरिन् । उनकी निकटतम प्रतिद्वन्द्वी कांग्रेसकी सुष्मा श्रेष्ठले १८०७ मत प्राप्त गरिन् ।

तातोपानी गाउँपालिका

त्यस्तै जुम्लाको तातोपानी गाउँपालिकामा नेपाली कांग्रेसका नन्दप्रसाद चौलागाईं विजयी भए । उनले माओवादी केन्द्रका जुम्ला संयोजक वीरबहादुर कुँवरलाई भारी मतान्तरले हराउँदै विजयी भएका हुन् । उनले २३२० मत पाए । उनका निकटतम प्रतिद्वन्द्वी माओवादी केन्द्रका वीरबहादुर कुँवरले १८०६ मत पाए ।

त्यस्तै उपाध्यक्षतर्फ माओवादी केन्द्रकी रेवती रावल विजयी भएकी छन् । उनले १७५८ मत प्राप्त गरिन् । उनका निकटतम प्रतिद्वन्द्वी कांग्रेसकी विन्दु अधिकारीले १३१२ मत प्राप्त गरेकी हुन् ।

सिँजा गाउँपालिका

त्यस्तै सिँजा गाउँपालिकाको अध्यक्षमा माओवादी केन्द्रका पूर्णप्रसाद धिताल विजयी भए । धितालले नेपाली कांग्रेसका नन्दराम बुढालाई ११८ मतान्तरले पछि पार्दै विजय हासिल गरेका हुन् । उनी १९४९ मत ल्याएर विजयी भएका हुन् भने उनका निकटतम प्रतिद्वन्द्वी नेपाली कांग्रेसका नन्दराम बुढाले १८३१ मत ल्याएर पराजित भएका हुन् ।

त्यस्तै उपाध्यक्षमा माओवादी केन्द्रकै शितली रोकाया १९५६ मतले विजयी भइन् । उनकी निकटतम प्रतिद्वन्द्वी नेपाली कांग्रेसका रजनकली शाहीले १०६९ मत ल्याएर पराजित भएकी हुन् ।

पातारासी गाउँपालिका

त्यस्तै जुम्लाको पातारासी गाउँपालिकाको अध्यक्षमा नेपाली कांग्रेसका पूर्णसिंह बोहरा विजयी भए । बोहराले २७६८ मत प्राप्त गरे । अध्यक्षमा प्रत्याशी नेकपा माओवादीका हरिबहादुर बुढाले २६६८ मत प्राप्त गरे ।

उपाध्यक्षमा नेकपा माओवादी केन्द्रका जुनमाया रोकाया विजयी भइन् । रोकायाले २७५४ मत ल्याएकी छन् । त्यस्तै उपाध्यक्षमा नेपाली कांग्रेसका शान्ति बुढाले २४६३ मत पाइन् ।

कनकासुन्दरी गाउँपालिका

कनकासुन्दरी गाउँपालिकाको अध्यक्षमा नेपाली कांग्रेसका दामोदर आचार्य विजयी भए । उपाध्यक्षमा नेपाली कांग्रेसकै प्रेमकली बुढा विजयी भएकी हुन् । आचार्यले २८०६ मत पाए भने उपाध्यक्ष बुढाले २३८० मत पाएको निर्वाचन अधिकृतको कार्यालयले जनाएको छ ।

अध्यक्षका प्रत्याशी माओवादी केन्द्रका धनबहादुर रावतले २५६२ र उपाध्यक्षमा रिता खत्रीले १९४५ मत पाएका छन् ।

हिमा गाउँपालिका

हिमा गाउँपालिकाको अध्यक्षमा नेपाली कांग्रेसका लक्ष्मण शाही विजयी भए । माओवादी केन्द्रका अम्मरराज शाहीलाई पराजित गर्दै लक्ष्मण शाही विजयी भएका हुन् ।

लक्ष्मण शाहीले १८७२ मत ल्याएर विजयी भएका हुन् भने उनका निकटतम प्रतिद्वन्द्वी माओवादी केन्द्रका अम्मरराजले १४२३ मत ल्याए ।

उपाध्यक्षमा पनि नेपाली कांग्रेसकी सुर्पना शाही विजयी भएकी छन् । उनले १५१८ मत ल्याएकी छन् भने उनकी निकटतम प्रतिद्वन्द्वी माओवादी केन्द्रकी कल्पना दमाईले १४८९ मत पाएकी छन् ।

प्रकाशित मिति: बिहीबार, जेठ ५, २०७९ १९:३२