कांग्रेसले धाेका दिएकाे बाबुराजकाे जिकिर, चिरीबाबु भन्छन्- यसलाई धाेका भनिँदैन

कांग्रेसले धाेका दिएकाे बाबुराजकाे जिकिर, चिरीबाबु भन्छन्- यसलाई धाेका भनिँदैन

A+ A A-

ललितपुर महानगरमा यसपटक सत्ता गठबन्धनले मेयरमा कांग्रेस र उपमेयरमा माओवादीलाई उठाउने निर्णय गर्‍याे । सोहीअनुसार कांग्रेसका चिरीबाबु महर्जन र माओवादीका बाबुराज बज्राचार्यले सँगसँगै घरदैलो गरे । सगुन खाँदै उनीहरू सँगसँगै हिँडेनन् मात्रै, दुवैले सामूहिक रूपमा एकअर्कालाई भोट पनि मागे ।

ललितपुरका सर्वसाधारणले पनि गठबन्धनलाई नै भोट हाल्ने आश्वासन दिए । तर, मतगणनाको प्रारम्भिक नतिजा सार्वजनिक हुँदै गर्दा कांग्रेसका चिरीबाबुले अत्याधिक मतान्तरसहित अग्रता लिए पनि बाबुराज भने भारी मतान्तरसहित पछि परेका छन् । अनौठो कुरा त के छ भने गठबन्धनबाट माओवादीमा बाबुराजलाई आउनुपर्ने भोट उल्लेखनीय मात्रामा उम्मेदवार नै नभएको ‘रुख’ चिह्नमा गएको देखिन्छ ।

मतगणना स्थलमा चियाको चुस्की लिँदै गरेका कांग्रेसका एक कार्यकर्ता भन्छन्, ‘हाल्न त भोट बाबुराजलाई नै हाल्ने भनेर गएको हो । तर, वर्षौंदेखि रुखमा हाल्दै आएको हात हसिँया हथौडातिर त जाँदै गएन ।’

यी कार्यकर्ता जस्तै यसपटक ललितपुरका ५ हजार ७४२ जना (शुक्रबार बिहान ६ बजेसम्मकाे तथ्या‌ंकअनुसार) सोही मनोविज्ञानबाट गुज्रिएको पाइएको छ ।

हालसम्म ४० हजार ९८७ मत गणना हुँदा उपमेयरमा बाबुराजले ८ हजार ३५४ मत ल्याएका छन् । तर, उम्मेदवार नै नभएको रुखमा ५ हजार ७४२ भोट खसेको छ । यदि रुखमा खसेको मत बाबुराजले पाउँथे भने यतिखेर उनले १४ हजार ९६ मतसहित उपमेयरमा अग्रता लिइरहेका हुन्थे ।

‘गठबन्धन होइन ठगबन्धन’

गठबन्धनबाट आफूलाई धोका भएको बाबुराज जिकिर छ । ’मलाई गठबन्धनबाट सरासर धोका भयो । गठबन्धनमा साथीहरूको विश्वास नहुँदो रहेछ,’ उनले भने ।

गठबन्धनको मर्मलाई कांग्रेसीले नबुझिदिएको उनको आरोप छ । ’माओवादीको तर्फबाट त हामीले कांग्रेसमा मेयरलाई सहयोग नै गरेका थियौँ । हामीले त त्यस्तो बेइमान गरेको छैन’, उनले भने, 'सहयोग दोहोरो भएन ।'

बाबुराजको यस्ताे आरोपसँग आफू असहमत रहेकाे चिरीबाबु बताउँछन् । ‘असहयोग गरेका होइनौँ’, चिरीबाबुले भने, ‘हामीले घरदैलो कार्यक्रम गर्दा बाबुराजजीलाई वडा नम्बर १ देखि २९ सम्म सँगै लिएर हिँडेका छौँ । कोठे बैठकमा पनि हामी सँगै छौँ ।’

अरु त अरु मतदान गर्ने दिनसमेत आफूहरू सँगै घरबाट सगुन खाएर निस्केको चिरीबाबुको भनाइ छ । ‘मैले मात्रै होइन, उहाँ(बाबुराज)ले मात्रै होइन, हामीले दुवैका लागि भोट मागेका थियौँ’, उनले भने ।

स्थानीय चुनावमा मतदान शिक्षाको अभाव भएका कारण यस्ताे भएकाे हुन सक्ने चिरीबाबुकाे बुझाई छ । ‘मानिसहरूले गठबन्धन नबुझेको देखियो । अधिकांश मतपत्रमा ‘रुख’मा लस्करै छाप हालेको पाइयो’, उनले भने ।

तर बाबुराज सरासर माओवादीलाई धाेका दिइएकाे बताउँछन् । ‘गठबन्धन नबुझ्ने र मतदाता शिक्षाको अभावै हुन्थ्यो भने कांग्रेसमा कसरी त्यति धेरै भोट गयो त’, उनी प्रश्न गर्छन् ।

‘आफूले मात्रै लिने र अरुलाई भोट नदिने गठबन्धनलाई एमालेबाट मेयरका उम्मेदवार हरिकृष्ण व्यञ्जनकारले ठगबन्धन भन्दै कटाक्ष गरेका छन् । अघिल्लो चुनावमा केवल ३ सय २६ मतान्तरले चिरीबाबुसँग हारेका उनी यसपटक गठबन्धनका कारण भारी मतान्तरले पराजयकाे बाटोमा छन् । गठबन्धनका कारण कांग्रेससँगको लडाइ चुनौतीपूर्ण बनेकाे उनले स्वीकारे । तर, गठबन्धन धेरै नटिक्ने दाबी उनकाे छ । ‘यस्तो गठबन्धन धेरै टिक्दैन । आफू मात्रै लिने, अरूलाई नदिने गठबन्धनको पनि आयु हुन्छ त’, उनी भन्छन् ।

आश भने मारिसकेको छैन :बाबुराज

नेकपा एमालेकी उपमेयरकी उम्मेदवार मञ्जली शाक्य बज्राचार्यलाई ३ हजार ४८८ मतान्तरसहित पछ्याउँदै गरेका बाबुराजले आफू विजयी हुने आस भने मारिसकेका छैनन् । ’अहिलेसम्म १४ वडाको त गणना भयो नि, बाँकी १५ वडा त गन्नै बाँकी छ’, उनले भने, ’अझ मेरो कोर एरिया त बाँकी नै छ । आस मारिसकेकाे छैन।’

वडा नम्बर ६,७,८,९,११,१२,१६,१९ र २० आफ्नो कोर एरिया रहेको उनले बताए । बज्राचार्य ललितपुरको वडा नम्बर १६ का बासिन्दा हुन् ।

प्रकाशित मिति: शुक्रबार, जेठ ६, २०७९ ०७:५३