अघिल्लो चुनावमा आमाले हारेकी थिइन्, अहिले २१ वर्षे छोराले जिते

A+ A A-

पर्साको कालिकामाई गाउँपालिकाको अध्यक्षमा निर्वाचित भए, जनता समाजवादी पार्टीका २१ वर्षीय वशिष्ठ कुमार । नेपाली कांग्रेसका अजय कुमारलाई पराजित गर्दै उनी विजयी भएका हुन् । उनले ३ हजार ७ सय मत ल्याउँदा उनका प्रतिद्वन्द्वी अजयले ३ हजार ६ सय २६ मत पाए ।

अध्यक्षमा निर्वाचित भएसँगै गाउँमा वशिष्ठको परिचय बदलिएको छ, चर्चा पनि चुलिएको छ । भारतमा अध्ययन गरेका वशिष्ठ गाउँमा परिचित थिएनन् । ७ महिनाअघि मात्र अध्ययन पूरा गरेर गाउँ फर्किएका उनलाई जित्न सहज थिएन । छोटो अवधिमा पनि उनी जनताको घरघरमा पुगे, मन र मत दुवै जिते ।

‘गाउँको मान्छे चिनेको थिइनँ । पढाइ सकेर फर्किएपछि जनताको घरघरमा गएर दुःखसुख बाँडेँ,’ उनी भन्छन्, ‘जितको आधार युवाको साथ र सहयोग हो ।’ उनको परिवार राजनीतिक पृष्ठभूमिमको भएकाले पनि चुनावी माहौल बनाउन उनलाई सहज भयो । ‘आमा र काका राजनीतिमा सक्रिय हुनुहुन्छ । उहाँहरूको साथले यहाँसम्म आइपुगेको हुँ,’ उनी भन्छन्, ‘चुनाव जित्न पैसा होइन, जनताको सापोर्ट चाहिने रहेछ ।’

२०७४ को स्थानीय चुनावमा उनकी आमा लालसादेवी कलवार गाउँपालिकाको अध्यक्षमा उठेकी थिइन् । तत्कालीन संघीय समाजवादी फोरमबाट उठेकी लालसादेवी ११९ मतले पराजित भएकी थिइन् । आमा पराजित भएकै पालिकामा उनी अहिले विजयी भएका हुन् । ‘आमाले देखेको विकासको सपना अब म पूरा गर्छु,’ उनी भन्छन् ।

पहुँचका आधारमा आफूले टिकट नपाएको बताउँछन् उनी । ‘स्थानीय चुनाव हो, पहुँचको कुरा छैन,’ उनी भन्छन्, ‘जनताको साथले टिकट पाएर जितेको हुँ ।’ अबको पाँच वर्षमा गर्ने कामको योजना उनले बनाएका छन् । वर्षौंदेखि विकास हुन नसकेको पालिकाको मुहार फेर्ने दाबी गर्छन् उनी । पहिलो प्राथमिकता उनले किसानलाई दिएका छन् । कृषिमा आत्मनिर्भर बनाउन बिउबीजन र आधुनिक खेतीलाई प्रवर्द्धन गर्ने उनको योजना छ । अर्को शिक्षा, स्वास्थ्य र रोजगारलाई योजनामा समेटेका छन् ।

‘अस्पताल छ, डाक्टर छैनन् । उपचार गर्न बाहिर जानुपर्छ । अब निःशुल्क उपचार गर्न डाक्टरको व्यवस्था गर्छु । स्कुल छ, तर शिक्षक र गुणस्तरीय शिक्षा छैन । शिक्षामा सुधार गर्छु,’ उनी भन्छन् । युवाका लागि खेलकुदसँगै रोजगारको अवसर सिर्जना गर्ने संकल्प उनले गरेका छन् । ‘विगतका वर्षमा रोजगार भएन । युवाहरू विदेश पलायन भइरहेका छन् । गाउँमा रोजगारको ढोका खोल्ने काम गर्छु,’ उनी भन्छन्, ‘युवाका लागि क्रिकेटलगायत खेलकुदका लागि मैदानको व्यवस्था गर्छु ।’

ज्येष्ठ नागरिकको पेन्सन घरघरमा पुर्‍याउने प्रतिबद्धता पनि उनले जनाएका छन् । ‘पेन्सन लिन ज्येष्ठ नागरिक तीन/चार दिन हिँडेर आउनुपर्ने बाध्यता छ । घरघरमा पुर्‍याउने काम गर्छु,’ उनी भन्छन्, ‘अबको पाँच वर्षमा काम गरेन वडाध्यक्षले भन्ने प्रश्न आउनै दिन्नँ ।’