'बालेनलाई भेटेर आशीर्वाद दिइस् भने हार्छस्' भन्दै जब नरसिंह व्यञ्जनकारलाई धम्की आयो

'बालेनलाई भेटेर आशीर्वाद दिइस् भने हार्छस्' भन्दै जब नरसिंह व्यञ्जनकारलाई धम्की आयो

A+ A A-

११औँ पटक पनि वडाध्यक्ष जित्ने सपनासहित ललितपुर महानगर–१० मा उठेका ८१ वर्षीय नरसिंह व्यञ्जनकारले यसपटक हार स्वीकार्नुपर्‍यो । रोचक त के छ भने, हार पनि उनले आफ्नै भतिज रविनमानसँग स्वीकार्नुपरेको हो ।

१०औँ पटकसम्म निरन्तर वडाध्यक्ष जितेका नरसिंहलाई हार्छु भन्ने कत्ति पनि लागेको थिएन । ‘मैले सोच्दै नसोचेको कुरा भयो’, लामो सुस्केरा हाल्दै उनले भने ।

त्यसो त व्यञ्जनकार यसपटक चुनावमा उठ्दा घरदैलो कार्यक्रममा खासै सरिक हुन पाएका थिएनन् । ‘घरदैलो गर्दा पनि ‘किन आउनुपर्‍यो, तपाईंलाई नै त हो, हामीले भोट हाल्ने’ भनेर मान्छेहरूले भन्न थालेपछि उनले घरदैलो गर्नै छाडिदिएका थिए ।

तर, यसपटक नसोचेको भयो । २८२ मतान्तरसहित नरसिंहले यसपटक चुनाव हारे ।

०००

यसरी हार्नुपरेकोमा नरसिंह त्यति दुःखी भने छैनन् । आफ्नै भतिजले वडाध्यक्ष जितेकोमा खुसी नभइरहनै सकेका छैनन्, उनी ।

‘अब जनताले तँलाई पत्याए । राम्रोसँग काम गर्नू भनेर भन्छु’, शिलापत्रसँग कुरा गर्दै नरसिंहले रविनमानलाई बधाई तथा आशीर्वाद दुवै दिए ।

‘अरुलाई वडाध्यक्ष गएको भए अलिकति दुःखी हुन्थेँ होला । आफ्नै परिवारमा पर्‍यो ! जे भए पनि खुसी छु,’ नरसिंहले थपे ।

नरसिंह खुसी नै भए पनि उनलाई हराएर विजयी भएका रविनमान भने पूर्ण रूपमा खुसी छैनन् । कारण, आफ्नै ठूलोबुबासँग उनले प्रतिस्पर्धा गर्नुपर्‍यो ।

‘उहाँ मेरो अभिभावक हो’, रविनमानले भने, ‘आफ्नै अभिभावकलाई हराउँदा खुसी हुन नसकिँदो रहेछ !’

जितेलगत्तै विजयोत्सव र्‍यालीमा हिँडिरहेका रविनमान मिश्रित खुसीमा परेको बताउँछन् । ‘म खुसी यस कारण छु, किनकि यसपटक नेपाली कांग्रेसले पहिलोपटक वडा नं १० मा जितेको छ । तर, म दुःखी यस कारण छु, किनकि मैले आफ्नै ठूलोबुबासँग लड्नुपर्‍यो’, आफ्नै जितमा अड्कलेर खुसी हुनुपरेको रविनमानले बताए ।

‘हराउनलाई भन्दा पनि ठूलोबुबालाई आराम दिन म चुनाव लडेको हो’, रविनमानले आफू चुनावमा उठ्नुको रहस्य खोले । तर, नरसिंह भने आफूलाई आराम गर्ने फुर्सद नभएको बताउँछन् । विजयी भएका रविनमानलाई भेटेर बधाई दिन खादा तयार पार्दै गरेका ८१ वर्षीय नरसिंह बिहीबार बिहानैदेखि समाजसेवाको काममा नै तल्लीन देखिन्थे ।

शुभेच्छुक र सहयोगीले घेरिएका नरसिंह एकाबिहानैदेखि काममा लागिपरिसकेका छन् । ‘समाजसेवा त म छोड्दिनँ’, उनले भने, ‘सबैभन्दा ठूलो काम मेरो कटुवाल गाउँमा भइरहेछ । मास्टर प्लान बन्दैछ । लेलेमा पनि काम भइरहेछ,’ नरसिंहले आफ्नो कामको फेहरिस्त उतारे ।

२०२९ सालदेखि १० पटकसम्म वडाध्यक्ष जितेका नरसिंहले आखिर यसपटक किन चुनाव हारे त ?

यसको सम्पूर्ण दोष कांग्रेसीलाई दिन्छन्, नरसिंह । आफूलाई हराउनकै लागि कांग्रेसीले सम्पूर्ण शक्ति प्रयोग गरेको उनको आरोप छ । ‘दोष म भतिजलाई पनि दिन्नँ । नेपाली कांग्रेसलाई दिन्छु । कांग्रेससँग नैतिकता नै छैन । अहिलेका जितेन्द्र, पूर्वन्यायाधीश कल्याण श्रेष्ठ सबैले छलफल गरेर टिकट भतिजलाई दियो ।’

त्यसो त आफूले हार्ने हो कि भन्ने संशय नरसिंहलाई नपलाएको भने होइन, जब काठमाडौं महानगरमा हाल अग्रता लिइरहेका स्वतन्त्र उम्मेदवार बालेन साहले नरसिंहलाई राजनीतिक गुरु मान्दै भेटेर आशीर्वाद लिने घोषणा गरे । नभन्दै नरसिंहलाई एउटा झस्काउने फोन आयो ।

फोनमा एक जनाले चेतावनी दिँदै भने, ‘बालेनलाई भेटेर आशीर्वाद दिस् भने तँलाई हराउँछौँ ।’

बालेनलाई भेटेर आशीर्वाद दिन सम्पूर्ण सर्वसाधारण, मिडिया तयार भइरहेको अवस्थामा नरसिंहले तयारी रोक्न सकेनन् । बरु बालेनले जित्छ भने आफू हारिदिन तयार हुन्छु भन्ने उनलाई लाग्यो । ‘म बरु हार्छु तर आशीर्वाद दिएरै छोड्छु,’ उनले अठोट गरे ।

त्यसो त बालेनले नरसिंहलाई आफ्ना राजनीतिक गुरु मान्दै आएका छन् । ललितपुर महानगर– १० मा मतगणना भइरहँदा नरसिंहको प्रतिनिधि बस्नसमेत बालेन बुधबार बिहानै ललितपुर पुगेका थिए । तर, उम्मेदवारको ठेगाना भएकै ठाउँमा मतदाता नामावलीमा नाम हुनुपर्ने भएपछि उनले अनुमति पाउन सकेनन् ।

बालेनले गुरु मान्ने नरसिंह एकपटकबाहेक सधैँ स्वतन्त्रबाट वडाध्यक्षमा जित्दै आएका थिए । ०४९ सालमा त उनी निर्विरोध वडाध्यक्ष नै भएका थिए । तत्कालीन कांग्रेसका सभापति कृष्णप्रसाद भट्टराईले नरसिंहलाई बोलाएर वडाध्यक्षका लागि आफैँले टिकट दिएका थिए । यतिसम्म कि एमालेबाट माधव नेपालले समेत नरसिंह उठेको ठाउँमा हामीहरूले उम्मेदवारी दिनुहुँदैन भनेर उठाउन मानेनन् । त्यसयता आफूलाई कहिल्यै पनि पार्टीसँग जोडिन मन नलागेको नरसिंह बताउँछन् ।