भरतपुरमा विवेकशील साझाका उम्मेदवार भन्छन्- परिणाम देखेर छक्क परेकाे छु

A+ A A-

केन्द्रकै चासो बोकेको भरतपुर महानगरपालिकाको मेयर पदमा उठेका ठूला दलका उम्मेदवारसँगै एक युवा उम्मेदवारको पनि चर्चा सर्वत्र भयो । गठबन्धनकी रेनु दाहाल, एमालेका विजय सुवेदी र कांग्रेसका बागी उम्मेदवार जगन्नाथ पौडेलसँगै विवेकशील साझा पार्टीबाट मेयरको उम्मेदवार बनेका २८ वर्षे इन्जिनियर प्रविण काफ्लेले पनि चर्चा बटुले ।

युवा उमेरका, आत्मविश्वासी र एजेन्डा बोकेका काफ्लेको उम्मेदवारीबारे चर्चा ठूलै भए पनि उनले मत भने बटुल्न सकेका छैनन् । अन्य ठूला दलका उम्मेदवारको तुलनामा उनको मत नगन्य मात्रामा आइरहेको छ ।

भरतपुरको वडा नम्बर ७ को मतपरिणाम आइसक्दा उनले १ सय ८ मत मात्र प्राप्त गर्न सकेका छन् । बिहीबार मतगणनास्थलमा भेटिएका काफ्लेले अहिलेको मतपरिणाम अनेपेक्षित रहेको बताए । आफूहरूले धेरै आशा नराखे पनि न्यूनतम मत पनि नपाएको उनको दुखेसो छ ।

चुनावी प्रचारप्रसारमा जादा १०औँ हजारले भोट दिन्छु भनेर आश्वासन बाँडे पनि अन्त्यमा नदिएको उनको गुनासो छ । ‘अहिलेको म परिणाम देखेर म छक्क परेको छु, सय दुई सयमै थन्किनुपर्ला जस्तो लागेको थिएन । धेरै नभए पनि हाम्रो अपेक्षा ५ हजार भोट पाउँछौँ भन्ने थियो’ मतपरिणामबारे प्रतिक्रिया दिँदै उनले भने, ‘मतदाताको घरघरमा पुग्दा सबैले आशीर्वाद दिनुभो, शुभेच्छा दिनुभो, दूध, मही खुवाउनुभो । तर भोट दिनुभएनछ ।’

भरतपुरमा व्यक्तिकाे एजेन्डा भन्दा दलको आन्तरिक प्रभाव हाबी हुँदा मतपरिणाम अपेक्षित नआएको उनको दाबी छ । उनी भन्छन्, ‘मैले कम्तीमा पनि ४०/५० हजार जनालाई प्रचारप्रसारमा जादा घोषणापत्र बाँडे हुँला । त्यो पढिदिएको भए पनि केही अर्थ लाग्थ्यो होला, मत भन्या विचार, व्यक्ति एजेन्डा इमानदारिताले निर्धारण नगर्ने रहेछ । हाम्रो जस्तो समाजमा धेरै कुराले फरक पार्ने रहेछ’, उनी भन्छन्, ‘ भरतपुरमा यतिधेरै राजनीतिक जालझेल होला जस्तो लागेको थिएन । भित्री राजनीतिक सञ्जाल बुझ्न कडा रहेछ । त्यो भरतपुरको लागि स्वस्थ छैन । अहिले गठबन्धनबाट १ भोट फुत्काउन मात्रै पनि हम्मे हम्मे छ । ’

आफूले पाएको भोटमा आफ्नै पार्टीभित्रकाे असन्तुष्टि र अन्य केही आन्तरिक किचलाले पनि प्रभाव पारेको उनको ठहर छ । अर्को निर्वाचनमा आफूहरू सांगठनिक रूपमा बलियो बनेर आउने उनले बताए । मतपरिणामले निराशा बनाए पनि भरतपुरमा निर्वाचित जनप्रतिनिधिहरूलाई खबरदारी गर्दै आफ्नो उपस्थिति बढाएर लैजाने उनको योजना छ ।

प्रकाशित मिति: बिहीबार, जेठ ५, २०७९ ०९:०८