भरतपुरमा जगन्नाथले मत अनुपात कायम राखे रेनुलाई गाह्रो पर्ने, २१ देखि २८ वडामा माओवादीलाई भर

भरतपुरमा जगन्नाथले मत अनुपात कायम राखे रेनुलाई गाह्रो पर्ने, २१ देखि २८ वडामा माओवादीलाई भर

A+ A A-

भरतपुर महानगरपालिकामा कांग्रेसबाट बागी उठेका उम्मेदवार जगन्नाथ पाैडेलले मतको अनुपात कायम राखे सत्ता गठबन्धनकी उम्मेदवार रेनु दाहाललाई गाह्रो पर्ने देखिएको छ । हालसम्म सार्वजनिक मतपरिणाममा अनुसार, पौडेलको मतको अनुपात प्रत्येक वडाबाट करिब ९ सयको हाराहारीमा छ ।

भरतपुरमा वडा नम्बर १, २, ३ र ४ को मतपरिणाम सार्वजनिक हुँदा पौडेलले वडा नम्बर १ बाट ४ सय ३०, वडा नम्बर २ बाट ९ सय २४ मत ल्याएका छन् । पौडेलले वडा नम्बर ३ मा ६ सय ५१ र वडा नम्बर चारमा १५ सय ७२ मत पाएका हुन् ।

वडा नम्बर ४ सम्मको मतपरिणामलाई आधार मान्दा एमालेको भोटको अनुपात प्रत्येक वडामा १९ सय ९३ देखिन्छ । यता माओवादी केन्द्रको अनुपात प्रत्येक वडामा २२ सय ५१ रहेको छ । भरतपुरका २९ मध्ये चार वडा एकीकृत समाजवादीले पाएको हुनाले यी वडामा एमालेको मत घट्ने छ । एमालेले नै जितेका वडा नम्बर ७, ९, २२ र १२ एकीकृत समाजवादीले पाएको छ । वडा नम्बर ७ मा ४ हजार ६ सय ४१ मत रहेको छ भने वडा नम्बर ९ मा ४२ सय ९१ मत छ ।

यता, वडा नम्बर २२ मा ३ हजार ७४ मत रहेको छ । तीबाहेक एमालेका तर्फबाट वडाध्यक्षमा जितेका १० र १२ का जनप्रतिनिधि पनि एकीकृत समाजवादीमा रहेकाले यी वडामा पनि एमालेको मत घट्ने देखिन्छ । वडा नम्बर १० मा ५ हजार ७ सय ८ मत छ भने वडा नम्बर १२ मा ४ हजार ५ सय ३१ मत छ ।

एमालेबाट विगतमा ११ नम्बर वडामा अध्यक्ष रहेका बाबुराम अधिकारीले वडा नम्बर ९ देखि एमालेले अग्रता लिन सुरु गर्ने दाबी गरे । मतगणना जारी रहेको वडा नम्बर पाँचमा भने अपेक्षित परिणाम नआएको उनले बताए । 'वडा नम्बर पाँचमा अपेक्षित परिणाम आएन । हामी वडा नम्बर ९ देखि लिड गर्न सुरु गर्छौं । १० मा राम्रै परिणाम आउँछ । ११ मा अलिकति असर पर्न सक्छ,' उनले भने । वडा नम्बर २३, २४ र २८ मा पनि राम्रै मत आउने अपेक्षा गरिएको अधिकारीले बताए ।

यता माओवादी केन्द्रले भने पश्चिम चितवनबाट फराकिलो अग्रतालाई निरन्तरता दिने विश्वास लिएको छ । वडा नम्बर २५ मा विगतमा अध्यक्ष रहेका विजय भुजेलले भने, 'पुराना मानिसहरूले भुइँकटहरमा मत दिइरहनुभएको छ । उहाँहरूको संख्या धेरै नरहेकाले हामीले आत्तिनुपर्ने अवस्था छैन । पश्चिम चितवनका २१ देखि २८ वडाको मत गणना गर्दा हामी निकै अगाडि बढ्नेछौँ,' उनले भने ।

भुइँकटहर चुनाव चिह्नमा उठेका जगन्नाथ पौडेलले वडा नम्बर ४ मा खसेको मतको २७ प्रतिशत मत ल्याएका छन् । उनले वडा नम्बर १ मा १३ प्रतिशत मत ल्याएका छन् भने वडा नम्बर २ मा १९ प्रतिशत मत ल्याएका छन् । वडा नम्बर ३ मा १९ प्रतिशत मत ल्याएका छन् । पौडेलले २० हजार भोट कटाउने र २५ हजारसम्म मत आउन सक्ने आकलन गरिएको उनका समर्थक मीना खरेलले बताइन् । आफूहरूले मतमा धेरै अग्रता नलिए पनि राजनीतिक निष्ठा र सिद्धान्तको अग्रता खोजेको उनले बताइन् ।

'हामीले मतमा भन्दा पनि राजनीतिक निष्ठा र सिद्धान्तको अग्रता खोजेका हौँ । हामीलाई कमजोर बनाउने प्रयत्नका बाबजुद सशक्त ढंगले अघि बढिरहेका छौँ, हामीले २० देखि २५ हजार मत ल्याउँछौँ,' उनले भनिन् ।

वडा नम्बर ६ देखि १९ सम्म राम्रै मत आउने उनले बताइन् । '६, ७, ८, ९ मा हामीलाई राम्रै मत आउँछ । १० मा बढ्छ । ११, १२, र १३ मा ठीकै मत आउँछ र १४ देखि १९ सम्मको वडामा हामीले अहिलेको अनुपातलाई कायमै राख्छौँ । बाँकी वडा पनि राजनीतिक निष्ठाको पक्षमा सहयोग गर्नेहरू हुनुहुन्छ । उहाँहरूको साथले हामी कम्तीमा पनि २० हजार मत ल्याउँछौँ,' उनले भनिन् ।

कुन वडामा कति छ मत हेर्नुस् विवरण :

२९ वडामध्ये विगतमा कहाँ कसको थियो प्रभाव

भरतपुरका २९ वडामध्ये १३ कांग्रेस, १३ एमाले र ३ वटा वडा माओवादी केन्द्रले जितेका थिए । कांग्रेसले १, ३, ६, ८, १४, १५, १७, १८, १९, २०, २१, २३ र २७ वडा जितेको थियो । यता एमाले २, ४, ५, ७, ९, १०, ११, १२, १६, २२, २४, २८ र २९ वडामा विजयी भएको थियो । यता माओवादी केन्द्र १३, २५ र २६ मा विजयी भएको थियो ।

यो समाचार तयार पार्दासम्म भरतपुरमा २० हजार ८८ मत गणना गर्दा ६ हजार ७ सय ९४ मत रेनु दाहालको पक्षमा खसेको छ । एमालेका विजयी सुवेदीको मत ६ हजार ५ सय ४८ मत छ भने जगन्नाथ पौडेलको मत ३ हजार ३ सय ९ छ । भरतपुरमा १ लाख २७ हजार ५ सय ६६ मत खसेको छ । दाबी गरेअनुसार जगन्नाथले २० हजार मत ल्याएमा एमालेलाई सहज र रेनुलाई गाह्रो हुनेछ ।

प्रकाशित मिति: मंगलबार, जेठ ३, २०७९ १९:१०