त्रिवि र म्युनिख विश्वविद्यालयबाट स्नातकाेत्तर निपेश ढाका यसरी बन्न पुगे म्यादी प्रहरी

त्रिवि र म्युनिख विश्वविद्यालयबाट स्नातकाेत्तर निपेश ढाका यसरी बन्न पुगे म्यादी प्रहरी

A+ A A-

म्यादी प्रहरी भन्नासाथ आममानिसलाई लाग्छ– साधारण लेखपढका मात्र हुन्छन् । अन्य रोजगारी नभएपछि छोटो समयका लागि भए पनि जागिर गर्न म्यादी प्रहरीमा भर्ना हुन्छन् ।

याे बुझाइ केही हदसम्म ठीकै पनि हाेला । त्यसै पनि देशमा रोजगारी नपाएर दिनदिनै देश छाडेर खाडी मुलुक हानिने युवापंक्ति ठूलाे छ ।

केही दिनअघि फेसबुकमार्फत ‘भाइरल’ भएको एउटा भिडियोले म्यादी प्रहरीमा आमबुझाइभन्दा भिन्न व्यक्ति पनि भर्ना हुन्छन् भन्ने देखाएकाे छ । भलै, त्यो भिडियोमा सार्वजनिक युवा आफैँ भने म्यादी प्रहरी थिएनन् ।

उनले आफ्नो दाइको म्यादी प्रहरीको पोशाक लगाएर उक्त भिडियो आफैँले सार्वजनिक गरेका थिए । भिडियो सार्वजनिक भएपछि म्यादी प्रहरीमाथि नै आलोचना आउन थाल्यो । जसले गर्दा प्रहरीले ती युवालाई पक्राउ गर्नुपर्ने अवस्था आयो । कपिलवस्तु प्रहरीले पक्राउ गरेका ती युवालाई पछि सम्झाएर छोड्यो ।

स्थानीय चुनावका लागि प्रहरीले यो पालि १ लाख म्यादी प्रहरी भर्नाको आवेदन मागेको थियो । तर, आवेदन झण्डै ३ लाखको पर्‍यो । यसरी आवेदन दिनेहरूको सूचीमा माथि उल्लेखित पात्रहरूभन्दा केही नितान्त फरक व्यक्ति पनि भर्ना भएका छन् ।

जसले देश र विदेशको विश्वविद्यालयबाट दुई विषयमा स्नातकोत्तर हासिल गरेका छन् । पर्यावरण संरक्षणसम्बन्धी सामाजिक अभियानमा सक्रिय छन् । गिनिज बुक अफ वर्ल्ड रेकर्डमा समेत नाम लेखाउन सफल ती व्यक्ति हुन्– माछापुच्छ्रे गाउँपालिका पोखराका ढाकामोहन अधिकारी अर्थात् ‘निपेश ढाका’।

आफूले गरेको कर्मभन्दा देशलाई केही फरक ढंगबाट योगदान गरौँ भन्ने सोचले म्यादी प्रहरीमा भर्ना भएकाे उनी बताउँछन् । भन्छन्, ‘मैले देशका लागि अरु क्षेत्रबाट धेरै योगदान गरेँ । पर्यावरण संरक्षणसम्बन्धी अध्ययनका लागि ६७ जिल्ला पुगेको छु । दुई नगरपालिकालाई प्लास्टिक मुक्त नगरपालिका बनाएको छु । पर्यावरण संरक्षणसम्बन्धी लामो गीतसमेत दिएर देशलाई योगदान पुर्‍याएको छु । तर, यो ४० दिनको अवधिमा म केही अर्को तरिकाले सिकौँ र देशलाई योगदान गरौँ भनेर म्यादी प्रहरी भएको हुँ ।’

कर्म गर्न कुनै पेसा सानो ठूलो नहुने पनि उनको तर्क छ । ‘कर्म गर्ने हो । सिक्ने हो, जीवनको आनन्द यसमा छ । जुनसुकै कर्म गरे पनि पेसाको हिसाबले यसलाई गौरब बनाउने हो,’ अधिकारी भन्छन् ।

उसो त अधिकारीले म्यादी प्रहरी हुनैका लागि २ वर्षदेखि तयारी गरेको दाबी गर्छन् । म्यादी प्रहरीभित्रको अनुशासनले आफूलाई लोभ्याएको भन्दै सकेसम्म आफ्नो परिवारका सबै सदस्यलाई एकपटक म्यादी प्रहरीमा भर्ना गराउने सपना उनको छ ।

सानैदेखि पोखराको गुरुङ बस्तीमा हुर्किएका अधिकारीलाई प्रहरीको पोशाकले आकर्षित गरेको थियो । तर, बच्चा बेला भएको एउटा सानो दुर्घटनाका कारण प्रहरीमा जान नसकेको दु:खेसो उनको छ ।

‘म गुरुङ, मगर बस्तीमा हुर्किएको हुँ । मलाई सेना प्रहरीको बर्दीले सानैदेखि लोभ्याएको थियो । तर, परिस्थितिले भर्ना हुन सकिनँ । अहिले म्यादी प्रहरी हुनुमा एउटा कारण यो पनि हो,’ अधिकारी भन्छन् ।

म्यादी प्रहरीलाई आममानिसले हेर्ने दृश्टिकोण पनि बदल्नुपर्ने तर्क छ उनको ।

उनी भन्छन्, ‘जीवन सिकाइको प्रक्रिया हो । सबै पेसालाई हामीले सम्मान गर्नुपर्छ । अरु थुप्रै काम गर्दा देशले चिनेन । अहिले म्यादी प्रहरीको पोशाकले मलाई चिनायो । काम भन्ने कुरा सानो–ठूलो हुँदैन । त्यसको उदाहरण म आफैँ हुँ ।’

अधिकारीले म्यादी प्रहरी भएर आउने सबै पारिश्रमिक चेपाङ बस्तीमा खर्च गर्ने बताए । ‘मैले धादिङको विकट रोलाङ गाउँपालिकाका चेपाङलाई सात वर्षदेखि रेखदेख गर्दै आएको छु । अब म्यादी प्रहरी हुँदा आएको पारिश्रमिक पनि चेपाङ बस्तीमा नै खर्च गर्छु,’ अधिकारीले भने ।

म्यादी प्रहरीको जागिर केही सिकौँ भन्नेहरूका लागि ठूलो अवसर भएको उनको बुझाइ छ । अधिकारीले जर्मनीको युनिभर्सिटी अफ म्युनिखबाट एमएस्सी र त्रिभुवन विश्वविद्यालयबाट गणितमा स्नातकाेत्तर गरेका छन् । स्थानीय चुनावका लागि प्रहरीले चैत अन्तिम सातादेखि ५ जेठसम्मका लागि म्यादी प्रहरी भर्ना गरेको थियो ।

प्रकाशित मिति: मंगलबार, जेठ ३, २०७९ ११:५९