भरतपुरमा कांग्रेसको गढमा एमाले विजयी, गठबन्धनलाई धक्का

A+ A A-

कांग्रेसले आफ्नो गढ मान्दै आएको भरतपुर-३ भारी मतान्तरले गुमाएको छ । लामो विवादका बीच पार्टीको आधिकारिक उम्मेदवार बन्न सफल भएका भरत लामिछाने एमालेका विकास थापासँग ६१७ मतान्तरले पराजित भएका छन् ।

थापाले १६६६ मत ल्याउँदा लामिछानेले १०४९ मत मात्र प्राप्त गरे । पार्टीभित्रको आन्तरिक विवादका कारण कांग्रेसको गढमा एमाले हाबी भएको छ । यो वडामा कांग्रेसीले एमालेका वडाअध्यक्ष उम्मेदवारलाई भोट दिएको देखिन्छ ।

भरतपुर-३ मा कांग्रेसी मतदाताको संख्या बढी छ । कांग्रेसका बागी उमेदवार जगन्नाथ पौडेलले पाएको मत हेर्दा पनि त्यो कुरा पुष्टि हुन्छ । उसो त यो वडा पौडेलको उम्मेदवारीको खम्बा बनेर उभिएका कृष्णलाल सापकोटाको वडा हो । गठबन्धनसँग रुष्ट बनेका कांग्रेसीले पौडेललाई मत दिएका छन् । पौडेलले हालसम्म १५७२ मत प्राप्त गरेका छन् । अन्य वडामा १२ प्रतिशतले मत पाइरहेका पौडेलले यो वडामा बढाएर २० प्रतिशत मत पाएका छन् ।

पौडेलले अन्य वडामा पनि यहीँ अनुपातमा मत बढाउँदै गए गठबन्धनकी मेयर उम्मेदवार रेनु दाहाललाई धक्का लाग्ने देखिएको छ । यही वडाबाट बढी मत पाएर कांग्रेसका उपमेयर उम्मेदवार चित्रसेन अधिकारीले भने अग्रस्थानमा छन् ।

गढमै किन हार्‍यो कांग्रेस ?

भरतपुर-३ मा कसले पार्टीको टिकट पाउने भन्नेबारे सुरुदेखि नै विवाद रहँदै आएको थियो । क्षेत्र नम्बर २ का सभापति समेत रहेका पराजित भरत लामिछानेले आफू नै वडाध्यक्ष हुन हरेक प्रयास गरे ।

तर, वडाका बहुमत कांग्रेसीहरूको माग भने तारामित्र पण्डितलाई उम्मेदवार बनाउनुपर्ने थियो । कांग्रेसका तर्फबाट लामिछानेले आफू आधिकारिक उम्मेदवार भन्दै मनोनयन दर्ता गराएपछि तारामित्रले पनि स्वतन्त्रमा उम्मेदवारी दिएका थिए ।

मनोनयनपछि कांग्रेस उपसभापति पूर्णबहादुर खड्काले तारामित्र पार्टीको आधिकारिक उम्मेदवार भन्दै पत्रसमेत पठाए । तर, लामो लबिङ गरेर लामिछानेले त्यो पत्रलाई उल्ट्याउन सफल भए ।

लगत्तै कांग्रेसका मुख्य सचिव कृष्ण पौडेलले फेरि लामिछाने पार्टीको आधिकारिक भन्दै जिल्लालाई पत्र पठाएका थिए । यस्तै, विवादका कारण कांग्रेसको गढ मानिएको भरतपुर-३ मा लामिछाने पराजित हुनु पुगे । त्यसो त लामिछानेलाई टिकट वितरण गर्दा आर्थिक अनियमितताको आरोप लागेको थियो । उक्त आरोपमाथि छानबिन पनि भइरहेको छ ।

भरतपुरका ३ वटा वडाको मत गणना सकिँदा मेयरमा एमालेका विजयी सुवेदीले अग्रता लिइरहेका छन् भने रेनुले पछ्याइरहेकी छिन् । यस्तै, उपमेयरमा कांग्रेसका चित्रसेन अधिकारी अगाडि छन् भने राप्रपाकी हिमला गुरुङले पछ्याइरहेकी छिन् ।

प्रकाशित मिति: सोमबार, जेठ २, २०७९ १२:०२