बागी शब्दसँग किन बिच्किए जगन्नाथ ?

A+ A A-

पाँचदलीय सत्ता गठबन्धन र दुईदलीय विपक्षी गठबन्धनसँग भरतपुर महानगरकाे मेयरमा एक्लै भिडिरहेका नेता जगन्नाथ पाैडेलले आफूलाई प्रयाेग गरिएकाे बागी शब्दप्रति आपत्ति जनाएका छन् । यति मात्रै होइन, बागी भन्नेहरूविरुद्ध मुद्दा हाल्ने चेतावनीसमेत उनले दिइरहेका छन् । आफू नेपाली कांग्रेसकाे बागी उम्मेदवार नरहेकाे पाैडेलकाे जिकिर छ । आफ्नाे उम्मेदवारी सत्ता गठबन्धनकाे विराेधमा रहेकाे उनी बताइरहेका छन् ।

सत्ताधारी दलबीच गठबन्धन भए पनि भरतपुरकाे मेयर कांग्रेसले नै पाउनुपर्ने अडान लिएका पाैडेललगायतका नेताहरूकाे स्वर पार्टीले सुन्नै चाहेन । देउवा स्वयम्‌ले प्रचण्डले छाडिसकेकाे भए पनि उनकी छाेरी रेणु दाहालले नै भरतपुरकाे मेयर लड्नुपर्ने प्रस्ताव आफैँले गरेकाे सार्वजनिक भाषण ठाेके । कांग्रेस एक्लै लड्नुपर्छ भन्नेहरूकाे जमात ठूलै भए पनि भागवण्डामा भरतपुर माओवादीले पाएकाे थियाे । त्यसपछि कांग्रेसबाट राष्ट्रियसभा सदस्यसमेत भइसकेका पाैडेलले मेयर पदमा बागी उम्मेदवारी दिए । उनलाई निर्वाचन आयाेगले स्वतन्त्रकाे हैसियतमा चुनाव चिह्न भुइँकटहर दियाे । याे बीचमा उनकाे उम्मेदवारी फिर्ता गराउने गठबन्धन शीर्ष तहकाे प्रयास पूरै असफल भयाे ।

इमानदार कांग्रेसीहरूकाे रक्षाका लागि उम्मेदवारी दिएकाे बताउँदै आएका पाैडेल आफूलाई किन बागी उम्मेदवार भन्न रुचाउँदैनन् त ? 'म बागी होइन स्वतन्त्र हुँ, कांग्रेससँग मेरो लडाइँ होइन, गठबन्धनसँग हो ', उनकाे जवाफ छ ।

जगन्नाथकाे याे जवाफकाे आफैँमा ठूलाे राजनीतिक अर्थ लगाउन सकिन्छ । के उनले आफू हारे पनि गठबन्धनबाट मेयर पदकी उम्मेदवार रेणु दाहाललाई राेक्ने रणनीति लिएका हुन् ? यसकाे विश्लेषण समयक्रममा हुँदै जाला । प्राप्त पछिल्लाे मतपरिणामअनुसार भरतपुरकाे मेयरमा माओवादी केन्द्रकी दाहालले अग्रता कायमै राखेकी छिन् ।

रेणुले १६ सय ११ मत पाएकी छिन् । उनलाई पछ्याइरहेका एमालेका विजय सुवेदीले १५ सय ४१ मत पाएका छन् । मेयरमा बागी उम्मेदवार जगन्नाथले ५ सय ३८ मत पाएका छन् । उपमेयरमा कांग्रेसका चित्रसेन अधिकारीले १७ सय ७५ मत पाएका छन् भने राप्रपाकी हिमला गुरुङले १२ सय ४२ मत पाएकी छन् । मेयरमा पाैडेलले पाइरहेकाे मत रेणुकाे हारका लागि पर्याप्त बन्न सक्ने अनुमान गरिन थालिएकाे छ । भरतपुरमा पाँचदलीय सत्ता गठबन्धन एकातिर र अर्काेतिर एमाले राप्रपा गठबन्धन मिलेर चुनाव लडिरहेका छन् ।