कर्ण थापाको वडामा एमालेले बुथ कब्जा गरेको कांग्रेसको आरोप, मतगणना अन्योलमा

कर्ण थापाको वडामा एमालेले बुथ कब्जा गरेको कांग्रेसको आरोप, मतगणना अन्योलमा

A+ A A-

बाजुराको बुढीगंगा नगरपालिकाको मतगणना प्रक्रिया अन्योलमा परेको छ । नगरपालिकाको २, ३, ५ र ९ नम्बर वडाको चुनावमा बुथ कब्जा गरेर मतदान भएको भन्दै फेरि चुनाव हुनुपर्ने माग कांग्रेसले राखेको हो ।

उक्त वडाको मतदान प्रक्रिया के गर्ने भन्ने विषयमा विवाद हुँदा नगरपालिकाका निर्वाचन कार्यालयमा खटिएका निर्वाचन अधिकृत कृष्ण सापकोटाले राजीनामा नै दिएका छन् ।

उनी नगरपालिकाबाट राजीनामा दिएर सदरमुकाम मार्तडी पुगेका छन् । विवाद भएका चारवटै वडामा प्रभावशाली व्यक्तिहरूको प्रतिष्ठाको लडाइँले गर्दा चुनावमा झडप भएको स्थानीयको आरोप छ ।

नगरपालिकाको विवाद समाधानका लागि निर्वाचन आयुक्तको टोली नै नगरपालिका पुगेको छ । तर, अझै कुनै निर्णय हुन नसकेको बाजुराका प्रहरी प्रमुख डीएसपी चतुर्भुज ओझाले जानकारी दिए । ‘नगरपालिकाको अधिकांश मतदान केन्द्रमा झडप भएको थियो । तर, मतदान प्रक्रिया भने रोकिएन । अहिले मतगणनाका लागि एउटा पार्टी सहमत भएको छैन । एउटा पार्टी मतगणना गर्नुपर्छ भन्नेमा छ । विवाद मिलेको छैन,’ डीएसपी ओझाले भने ।

९ नम्बर वडा नेकपा एमालेका नेता कणर्बहादुर थापाको हो । त्यही वडाबाट यसअघि कांग्रेसका दीपक शाहीले मेयरमा जितेका थिए । त्यस्तै, ३ नम्बर वडासमेत एमालेका सांसद लालबहादुर थापाको हो । ५ नम्बर वडा सूदूरपश्चिम प्रदेश प्रमुख देवराज जोशीको हो ।

२ नम्बर यसअघि कांग्रेसबाट जितेकी उपमेयर तारा खातीको वडा हो । यसपालि भने कांग्रेसले रंगबहादुर खातीलाई मेयरको उम्मेदवार बनाएको छ । त्यस्तै, एमालेको तर्फबाट रामबहादुर बानियाँ छन् । कांग्रेसका मेयरका उम्मेदवर खातीले बुथ कब्जा गरेर मतदान गरेका कारण उक्त मतपत्र गणनामा आफूहरू कुनै पनि हालतमा सहभागी नहुने बताए ।

‘२, ३, ५ र ९ नम्बर वडामा एमालेले बुथ कब्जा गरेर भोट हालेको छ । हाम्रो पार्टीका कार्यकर्तालाई भोट हाल्नबाट वञ्चित गराइएको छ । भोट हाल्दा हाम्रो एजेन्ट राखिएको छैन । मतदान केन्द्रमा सुरक्षाका लागि खटिएका प्रहरी नै भागेर गएका छन् । यस्तो अवस्थामा भएको चुनावको मतपत्र कसरी गणना हुन्छ ?,’ कांग्रेस मेयरका उम्मेदवार खातीले भने ।

उता एमालेका मेयरका उम्मेदवार रामबहादुर बानियाँले भने एमालेको तर्फबाट कुनै पनि बुथ कब्जा नभएको बताए । ‘हाम्रा पार्टीका कार्यकर्ताले कुनै पनि बुथ कब्जा गरेको छैन । बुथ कब्जा गरे भनेर कांग्रेसले हल्ला चलाएको ठाउँ एमालेको पकड भएको क्षेत्र हो । कांग्रेसका कार्यकर्ता भोट हाल्न छोडेर ढुङ्गामुडा गर्नतिर लागे । हामीले बुथ कब्जा गरेका छैनौँ । फेरि हुने चुनावको पक्षमा एमाले छैन । मतगणना हुनुपर्छ,’ बानियाँले भने ।

मतदान केन्द्रबाट प्रहरी भागेको भने उनले स्वीकार गरेका छन् । उनले भने, ‘मतदान प्रक्रिया चलेकै बेला सुरक्षाका लागि खटिएका प्रहरी भागेका छन् । बरु उनीहरू किन भागे ? कारबाही हुनुपर्छ ।’ बाजुरा प्रहरीका अनुसार सुरक्षा समितिले विवादित चारवटा वडाको मतदान फेरि गर्नुपर्ने राय निर्वाचन आयोगलाई दिएको छ । चारवटै वडाकाे मतदान केन्द्रमा पटक-पटक झडप भएको थियो ।

प्रकाशित मिति: आइतबार, जेठ १, २०७९ १४:०८