मतपत्र च्यातिएपछि पहिले चर्चामा आएको भरतपुरमा अहिले के छ तयारी ?

A+ A A-

भरतपुरमा दिनभर गर्मी भए पनि साँझमा भने हावाहुरीसहित एक झर्को पानी परेसँगै सितल छ । शुक्रबाुर भएको स्थानीय चुनावको मतदानसँगै भरतपुरको मतपरिणाम कसको पोल्टामा पर्ने हो भन्ने उत्सुकताले भने राजनीतिक वातावरणमा गर्मी ह्वात्तै बढेको छ । यतिबेला भरतपुर १० मा रहेको चितवन उद्योग संघको प्रर्दशनी केन्द्रमा भरतपुरको मतगणना सुरु हुने क्रममा छ ।

२०७४ सालको चुनावयता भरतपुरमा हुने विभिन्न राजनीतकि घटनाक्रमले अहिले महानगर देशकै चर्चाको विषय बनेको छ । भरतपुर चर्चामा आउनुको कारण हो अघिल्लो स्थानीय चुनावमा च्यातिएको मतपत्र । अहिले पनि भरतपुरको चुनावी चर्चासँगै सो घटनाको स्मरण भइरहेको छ ।

अहिले पनि माओवादी र कांग्रेससँगै पाँचदलीय गठबन्धनले मेयरमा माओवादी केन्द्रका अध्यक्ष पुष्पकमल दाहाल प्रचण्डकी छोरी रेनु दाहाललाई उम्मेदवार बनाएका छन् भने यता एमाले र राप्रपाको तालमेलबाट एमालेका विजय सुवेदी उम्मेदवार छन् ।

२०७४ को चुनावमा भरतपुर महानगरको मेयरको उम्मेदवारमा एमालेका देवी ज्ञवाली र कांग्रेस–माओवादी गठबन्धनकी रेनु दाहाल प्रतिस्पर्धामा थिए ।

भरतपुर महानगर वडा नम्बर १९ को मतगणनाका क्रममा जेठ १५ गते मध्यरातमा माओवादीका मतगणना प्रतिनिधि मधुकर न्यौपाने र द्रोण सिवाकोटीले मतपत्र च्यातेका थिए । मतगणनामा मतपत्र च्यात्ने दुबै जनालाई चितवन जिल्ला अदालतले एक लाख रुपैयाँ जरिवाना तोक्दै दोषी ठहर गरेको थियो।

मतपत्र च्यातिएपछि भरतपुर १९ मा पुनः मतदान भएको थियो । सो मतदानपछि ज्ञवालीलाई हराउँदै दाहाल भरतपुरको मेयर बनेकी थिइन् । निर्वाचन आयोगले च्यातिएको मतपत्रको छानबिन गर्न गठन गरेको समितिका अनुसार ९० वाटा मतपत्र च्यातिएको थियो ।

अघिल्लो स्थानीय चुनावमा भएको मतगणना धाँधलीलाई लिएर विभिन्न राजनीतिक तहबाट बितेको पाँच वर्षयता विभिन्न टिकाटिप्प्णी तथा कटाक्ष बेला बेला हुने गरेका छन् । यतिमात्रै नभएर पछिल्लो समय प्रमुख निर्वाचन आयुक्त दिनेश थपलियाले मतपत्र च्यात्ने र चपाउने प्रयास नगर्न दलहरुलाई चेतावनी दिएको विषय त सर्वत्र चर्चामा रह्यो । भरतपुरको अघिल्लो चुनावको मत गणनामा भएको धाँधलीलाई इङ्गित गर्दै उनले यस्तो चेतावनी दिएका थिए ।

यता थपलियाको ‘मतपत्र बलियो कागज राखेका छौं अब चपाउन, च्यात्न सकिँदैन’ भन्ने अभिव्यक्ति र केपी ओलीको बोली समान रहेको भन्दै माओवादी केन्द्रका वर्षमान पुनले आपत्ति जनाए ।

निर्वाचन आयोगले भरतपुरको मतगणनास्थल प्रर्दशनि केन्द्रमा विगतमा मतगणनास्थलमै भएको अनियमितता सुधार्न यो पटक गणनास्थलमा विशेष व्यवस्था मिलाएको छ । फलामको तारबारसहित निगरानीका लागि ८ ठाउँमा सीसीटीभी जडान गरिएको छ । मतगणना अहिले मध्यरातबाट सुरु हुने प्रारम्भिक जानकारी आएको छ ।

प्रकाशित मिति: शनिबार, वैशाख ३१, २०७९ ००:५९