'दम बढे पनि नातिनातिनाले विकास देख्ने आसले भोट हाल्न आएँ'

A+ A A-

पेप्सीकोलास्थित फुटबल ग्राउन्डमा मतदानका निम्ति पुगेका थिए, मानबहादुर कटुवाल । दमले थलिएका ९० वर्षका कटुवालको हिँड्दा सास बढ्छ । अक्सिजनको सहायताले उनी मतदान केन्द्रमा आइपुगे । बिरामी वृद्ध तथा अशक्तलाई सहजै मतदानको व्यवस्था थियो ।

मतदानपछि कटुवालको अवस्था देखेर हामीले सोध्यौँ, 'तपाईंको सास पनि बढिरहेको छ । घरमै आराम नगरेर भोट हाल्न पो आउनुभएछ ?' हामीले प्रश्न गरेपछि कटुवालका छोराले आफूले पनि आराम गर्न गरेको आग्रह बुबाले अस्वीकार गरेको सुनाए ।

बुबासँगै मतदान केन्द्र आएका रामजनक कटुवालले भने, 'बिरामी हुनुहुन्छ । अक्सिजन झुण्ड्याएर जानुपर्छ । घरमै बस्नुस् भनेको थिएँ बुवाले मान्नुभएन ।' ९० वर्षका कटुवालले आफ्नो नगरको विकासका निम्ति सही मानिस छान्न मतदान गर्न आएको बताए ।

'भोट नहालेर कहाँ हुन्छ, हाम्रा नातिनातिनीले विकास भएको देख्नुपरेन,' कटुवाल भन्छन्, 'तिमीहरूकै लागि हो भनेर दमले सास बढे पनि छोरालाई अक्सिजन बोक्न लगाएर भोट हाल्न आएँ ।'

कटुवालले ८४ वर्षदेखि नै अक्सिजन लगाउँदै आएका छन् । उनले अघिल्लो स्थानीय तहको चुनावमा पनि अक्सिजन लगाएरै भोट हालेका थिए । उनले २०१५ सालदेखिका चुनावमा भोट हालेका छन् । प्रजातन्त्रले जनप्रतिनिधि छान्ने अधिकार दिएकाले त्यसको सदुपयोग गर्नुपर्ने उनको भनाइ छ ।

'हाम्रो १-१ भोटले नै त नेता छानिने हुन्,' उनी भन्छन्, 'प्रजातन्त्रले दिएको अधिकार हो भोट त ।'

कटुवालले महोत्तरीमा पहिलोपटक भोट हालेका थिए । 'पहिला हात उठाएर भोट हाल्ने चलन थियो,' उनी सम्झिन्छन्, 'नेताअनुसार मतपेटिका र मतपत्र फरक-फरक हुन्थ्यो ।'

९० वर्षका कटुवालसँगै उनकी ८० वर्षीया श्रीमती भवानी पनि आएकी थिइन् । मतदानपछि उनले भनिन्, 'हामी त डाँडामाथिको जून हौँ, हाम्रा नानीबाबुले विकास देख्लान् । उनीहरूलाई राम्रो होला भनेर भोट हाल्न आएका हौँ ।'

प्रकाशित मिति: शुक्रबार, वैशाख ३०, २०७९ १२:३७