सागमा भारोत्तोलनकी एक मात्र स्वर्णविजेता सञ्जुले किन गरिन् आफ्नै गुरुको घरमा आत्महत्या ?

सागमा भारोत्तोलनकी एक मात्र स्वर्णविजेता सञ्जुले किन गरिन् आफ्नै गुरुको घरमा आत्महत्या ?

A+ A A-

हरेक बिहान ६ बजे नै त्रिपुरेश्वरस्थित दशरथ रंगशालामा भेटिन्थिन्, २४ वर्षीया सञ्जु चौधरी । सागकी स्वर्ण पदक विजेता सञ्जु अब न रंगशालमा झुल्किनेछिन् न त अन्त कतै कीर्तिमानको दौडमा उभिनेछिन् । २७ वैशाखको बिहान आफ्नै निवासमा सञ्जु मृत भेटिइन् ।

१३औँ दक्षिण एसियाली खेलकुद ‘साग’ मा भारोत्तोलन खेलबाट एक मात्र स्वर्णविजेताको कीर्तिमान राखेकी उनी एसियन गेमको बन्द प्रशिक्षणमा व्यस्त थिइन् । १६ वैशाखामा मात्र सञ्जु एसियन गेम खेल्न छनोट भएकी थिइन् । अर्को कीर्तिमान मुलुक भित्र्याउने लक्ष्यसहित सञ्जु दिनहुँ दशरथ रंगशालामा अभ्यासका लागि पुग्थिन् ।

विडम्बना, मंगलबारको बिहान भने ललितपुर महालक्ष्मी नगरपालिका– ८, लुभुस्थित तल्लो चौतारामा रहेको डेरामा उनी मृत भेटिइन् । सञ्जु भारोत्तोलनका आफ्नै गुरु सञ्जय महर्जनको साढे दुई तले घरको भुइँ तलामा झुण्डिएको अवस्थामा फेला परेको प्रहरीले जनाएको छ ।

सञ्जुले खेलजीवन मात्र होइन, युवाअवस्थामै आफ्नो जीवन विसर्जन गरिन् । प्रहरीको प्रारम्भिक अनुसन्धानले उनले आत्महत्या गरेको देखाएको छ । उनी सुतेको कोठाको भित्रबाट ‘लक’ लगाएर झुण्डिएको भेटिएका कारण प्रहरीले सञ्जुको मृत्युलाई आत्महत्या हुन सक्ने ठानेको हो । यद्यपि, आत्महत्याको कारण भने खुलेको छैन । ‘हत्याको आशंका गर्ने कुनै प्रमाण फेला नपरेकाले हामीले आत्महत्या हो कि भन्ने प्रारम्भिक निष्कर्ष निकालेका हौँ,’ ललितपुर प्रहरी परिसरका प्रहरी उपरीक्षक (एसपी) सिद्धिविक्रम शाह भन्छन् ।

उनका अनुसार सञ्जु सुतेको कोठाको झ्याल, ढोका सबै बन्द थिए । ‘झ्यालढोका थुनिएको कोठाभित्रको फ्यान झुण्ड्याउन राखिएको सिलिङमा सलले घाँटी कसेर झुण्डिएको अवस्थामा उनलाई भेटिएको थियो,’ एसपी शाहले भने ।

घटनास्थलको प्रकृतिबाहेक सञ्जुले आत्महत्या गरेको ठोस प्रमाण भने प्रहरीले भेटेको छैन । ‘सुसाइड नोट’ पनि फेला परेको छैन । सञ्जुले बोक्ने मोबाइलबाट ‘क्लु’ फेला पर्ने प्रहरीको आशा छ । मोबाइलको फरेन्सिक परीक्षण गर्न पठाइएको छ । ‘त्यसबाट आत्महत्या वा आत्महत्या दुरुत्साहन, केही भए खुल्न सक्छ,’ एसपी शाहले भने ।

गुरुले उठाउन जाँदा झुण्डिएकाे देखे

सञ्जु बस्दै आएको घर भारोत्तोलनकै प्रशिक्षक सञ्जय महर्जनको हो । एसियन गेमका लागि छानिएपछि उनी महर्जनको घरमा बस्न थालेकी हुन् । प्रहरीका अनुसार उनी १६, १७ दिनअघिदेखि मात्र महर्जनको घरमा बस्न थालेकी थिइन् । सञ्जु प्रशिक्षणका लागि गुरु महर्जनसँगै रंगशाला जान्थिन् । महर्जनले नै उनलाई प्रशिक्षण दिँदै आएका थिए ।

मंगलबार भने बिहान साँढे ५ बजेसम्म सञ्जु प्रशिक्षणका लागि जान तयार नभएपछि महर्जनले उनलाई फोन गरे । तर, फोन उठेन । त्यसपछि महर्जन उनको ढोका ढकढक्याउन पुगे । र पनि भित्रबाट कुनै प्रतिक्रिया आएन । महर्जनले झ्यालबाट चियाउँदा सञ्जु झुण्डिरहेको देखे । ‘त्यो देखेर मलाई त एकछिन सपनाजस्तै लाग्यो,’ उनले शिलापत्रसँग भने, ‘केही बेर त के गर्ने कसो गर्ने भन्ने भयो । तैपनि प्रहरीलाई खबर गरियो ।’

प्रहरी आएपछि ढोका फोडेर हेर्दा उनी सलको पासोमा झुण्डिएकी थिइन् । ‘ऊ मेरो घरमा पाहुनाजस्तै भएर बसेकी थिइन्,’ महर्जन भन्छन्, ‘पछिल्लो समय मैले नै उनलाई ट्रेनिङ गराइरहेको थिएँ । तर, किन यस्तो गरिन्, अचम्मित छु ।’ सञ्जुले उनको समस्याबारे आफूलाई कहिल्यै जानकारी नदिएको पनि उनको भनाइ छ ।

सञ्जुले सागमा स्वर्ण पदक जित्नुबाहेक विभिन्न अन्तर्राष्ट्रिय प्रतियोगीताबाट समेत मेडल हात पारेकी छन् । २४ वर्षीया सञ्जु अविवाहित हुन् । उनको परिवार नेपालगञ्ज बस्दै आएको छ ।

प्रकाशित मिति: मंगलबार, वैशाख २७, २०७९ १४:२८