ओलीको गृहनगरमा चुनावी माहाैल : कसैको भिड, कसैको शून्यता

A+ A A-

सोमबार झापाको दमकस्थित गणतन्त्र चोकमा विवेकशील साझाका रेवतचन्द्र भण्डारी आफ्ना चुनावी एजेन्डा सुनाइरहेका थिए । उनका केही कार्यकर्ताबाहेक न सुन्ने कोही थियो, न ताली पड्काउने नै । उनको चुनावी भेलामा केही सहयोगी मात्र सहभागी थिए ।

जनता समाजवादी पार्टीका पवन विष्ट दमककै नमुना मार्गछेउ उस्तै शून्यतामा आफ्ना बह पोखिरहेका थिए । उनका केही सहयोगी झण्डा र ब्यानर बोकेर हिँडिरहेका थिए । छेउमा माइकिङ गरिरहेको सिटी सफारी रोकिएको थियो । कार्यकर्ताबाहेक बजारको भिड कसैले विष्टलाई चासो दिएको जस्तो देखिँदैनथ्यो ।

एमालेबाट दमक नगर प्रमुखकी उम्मेदवार रहेकी गीता अधिकारी ठूलै हल्ला–खल्लाका साथ यलम्बर चोकमा भेटिइन् । तुल ब्यानर, चर्को स्वरमा माइकिङ । भ्यूटावर बनेपछि पर्यटन विकास हुने विश्वास साट्दै उनी चुनावी अभियानमा थिइन् । सबैका घरमा पसेर सबैलाई नमस्कार गर्दै भोट माग्दै थिइन् उनी ।

‘माहौल एकदम राम्रो भएर गएको छ, म विजय नजिक छु,’ अधिकारीले दाबी गरिन् । अधिकांश पछिल्ला पुस्ताका मतदाता उनका विद्यार्थी हुन् । अघिल्लो निर्वाचनमा लोकप्रिय मतका साथ उनी उपमेयरमा विजयी भएकी थिइन् ।

अंक गणितमा दमकमा एमाले कमजोर भए पनि गठबन्धनका लागि अधिकारी भारी परेकी छन् । उनी विगत र स्थानीयले देखेको सपनामा टेकेर खरो उत्रिएकी छिन् ।

चियाबारी क्षेत्रमा बहु–पार्टीका झण्डासहित गीत बजाएर भोट माग्दै गरेका भेटिए गठबन्धनका उम्मेदवार राम थापा । राप्रपाको भागमा मेयरको उम्मेदवारी परेपछि उनमा पनि विजयको ठूलै आशा देखिन्छ । माओवादी, कांग्रेसलगायतका दलले साथ दिए उनी पहिलो हुनेछन् । उनको अनुहारमा देखिएको खुसीको कारण पनि यही हो । ‘दमकमा राप्रपा दोस्रो दल हो, कांग्रेस, माओवादीलगायतको दलको गठबन्धन भएपछि स्वतः हाम्रै विजय हुनेछ,’ खुसी मुद्रामा थापाले भने ।

अर्को गज्जबको दृश्य त झापाको गौरादहमा देखियो । गौरादह– ३ को वडाध्यक्षमा एमालेका दिलीपकुमार भण्डारीले स्वतन्त्र उम्मेदवारी दिएका छन् । यो एमाले झापाका अध्यक्ष दीपक कार्कीको वडा हो । एमालेले भण्डारीलाई टिकट नदिएपछि उनी स्वतन्त्र उठेका छन् ।

झन्डै २० वटा गाडी, उत्तिकै सङ्ख्याका अटो रिक्सा र मोटरसाइकलमा सवार ठूलो लाम उनको समर्थनमा गौरादह बजारमा भेटियो । जेब्रा चुनाव चिह्नसहित ठूलै होहल्लाका साथ उनीहरू चुनावी अभियानमा थिए । उनीहरूको चुनावी हल्ला कुनै स्वतन्त्र उम्मेदवारको जस्तो थिएन । बरु पुरानो राजनीतिक दलको प्रिय उम्मेदवारको झल्को दिने खालको भिड थियो ।

झापाको कमल गाउँपालिका जहाँ एमालेको क्षेत्र हो, राप्रपाका अध्यक्ष राजेन्द्र लिङ्देन चुनावी सभामा थिए । स्थानीय चुनाव ०७४ मा कमल गाउँपालिकाका सातवटा वडामध्ये वडा नम्बर १ कांग्रेस र बाँकी सबै एमालेले जितेको थियो । राप्रपाका लागि कमल गाउँपालिका कमजोर क्षेत्र हो ।

अध्यक्ष लिङ्देन ठूलै भिड जम्मा गरेर भिडसँग खेल्दै थिए । कमजोर क्षेत्रमा बलियो भाषण गरे उनले । कमलमा उनी पार्टीको भिजनभन्दा पनि स्थानीयको समवेदनामा खेल्ने कोसिसमा थिए । उनी भन्दै थिए, ‘बेरोजगारलाई विदेश पठाउन पाँच वर्षअघि तपाईंहरूले भोट दिएको हो ? पक्कै होइन, दु:खी बुढा बा–आमाको सहारा हुने बेलामा छोरो विदेशमा छ । यो अवस्थाका लागि तपाईंले भोट दिएको हो र !’

प्रकाशित मिति: सोमबार, वैशाख २६, २०७९ १९:३९