कैलालीको गौरीगंगामा जितलाई निरन्तरता दिने एमाले योजनामा गठबन्धन तगारो

A+ A A-

कैलालीको गौरीगंगा नगरपालिकामा यसपटकको चुनाव रोचक हुने देखिएको छ । अघिल्लो चुनावमा मेयरमा एमालेका उम्मेदवारले जितेको पालिकामा यसपटक गठबन्धनका उम्मेदवारले चुनौती दिइरहेका छन् ।

गौरीगंगामा २०७४ सालको निर्वाचनमा माओवादी केन्द्रका उम्मेदवार देवीदत्त कँडेललाई ६१ मतले पराजित गर्दै नेकपा एमालेका भीमबहादुर देउवा मेयरमा विजयी भएका थिए । कँडेल यसपटक पनि मेयरका उम्मेदवार छन् । माओवादी केन्द्रका नेता कँडेललाई २०७४ सालको निर्वाचनमा तेस्रो भएको दल नेपाली कांग्रेसको पनि समर्थन छ ।

०७४ सालकाे मतपरिणामका आधारमा कँडेल एमालेका उम्मेदवार पदमसिंह सिंगालभन्दा बलिया देखिएका छन् । तर, अहिले नयाँ मतदाता थपिएका छन् । उनीहरूले कसलाई मतदान गर्छन् त्यो महत्त्वपूर्ण छ । गठबन्धनबाट नगर प्रमुखका उम्मेदवार कँडेल सजिलै चुनाव जित्नेमा आशावादी छन् । कँडेलले भ्रष्टाचार, सुशासनसहित र स्थानीय सरकार जनताको सरकार हो भन्ने अनुभूति दिलाउने गरेर काम गर्ने बताए । ‘विगतमा एमालेले गरेका कामहरू जनतालाई चित बुझेको छैन । त्यसैले जनताले यस पटक गठबन्धका साझा उम्मेदवारलाई जिताउँछन्,’ उनले भने ।

पाँच वर्ष जनताको काम गरेकाले पुनः नगर प्रमुखमा आफ्नो उम्मेदवार विजयी हुने दाबी नेकपा एमालेको छ । कांग्रेसका नगरस्तरीय नेताहरू तथा माओवादी केन्द्रबाहेकका मतदाताको सहयोग पाउने अपेक्षा पनि एमालेको छ । मतदाताको संख्या पनि वृद्धि भएको र कांग्रेस, समाजवादी पार्टीका मतहरू पनि नेकपा एमालेका उम्मेदवार सिंगाललाई आउने दाबी एमालेले गरेको छ ।

एमालेबाट प्रमुखका उम्मेदवार सिंगालले भ्रष्टाचारमुक्त नगर बनाउने आफ्नो पहिलो प्राथमिकता रहेको बताए । भूमिहीन, आवासविहीन, अतिविपन्न वर्गका र सुकुम्बासी बस्तीका जनताका लागि एकीकृत नमुना बस्ती निर्माण गर्ने आफ्नो योजना रहेको उनको भनाइ छ । ‘नगरका सबै वडाहरूमा पाँच वर्षभित्र पानी, पिच र कालोपत्रेसहितको बाटो बनाउँछु,’ उनले भने ।

२०७४ को निर्वाचनमा एमालेका भीम देउवाले ५ हजार ८९१ मत ल्याएर विजयी हुँदा माओवादी केन्द्रका उम्मेदवार कँडेलले ५ हजार ८३० मत ल्याएका थिए । नेपाली कांग्रेसका उम्मेदवार दिनेशराज जोशीले ५ हजार ३९२ मत ल्याएका थिए । यो पटक ४० हजार १८ मतदाताले गौरीगंगा नगरपालिकामा मतदानको अधिकार पाएका छन् ।

कँडेल र सिंगालसँगै स्वतन्त्रबाट भानबहादुर ठगुन्ना, मौलिक जरोकिलो पार्टीबाट सावित्री गिरी र राप्रपाबाट सुवास कुँवरले गौरीगंगाको नगर प्रमुखमा उम्मेदवारी दिएका छन् ।

गठबन्धनबाट नेपाली कांग्रेसका भोजबहादुर बम, राप्रपाबाट कमला बोहरा, मौलिक जरोकिलो पार्टीबाट चेतराज साउँद र नेकपा एमालेबाट शान्तिदेवी सिंह उपप्रमुखका उम्मेदवार छन् ।

प्रकाशित मिति: सोमबार, वैशाख २६, २०७९ १०:१२