चुनावमा खटिए झण्डै ३ लाख सुरक्षाकर्मी, मतदानस्थलमा तीन घेरा

A+ A A-

स्थानीय चुनावका लागि चारवटै सुरक्षा संगठनले सुरक्षाकर्मी परिचालन गरिसकेको छ । नेपाल प्रहरी, सशस्त्र प्रहरी, नेपाली सेना र राष्ट्रिय अनुसन्धान विभागले सुरक्षाकर्मी मतदान केन्द्रमा खटाएको हो ।

प्रहरी प्रधान कार्यालयले ६२ हजार प्रहरी चुनाव केन्द्रित सुरक्षाका लागि परिचालन गरिसकेको प्रवक्ता एसएसपी विष्णु केसीले जानकारी दिए । त्यस्तै, सशस्त्र प्रहरी बलले ३४ हजार, नेपाली सेनाले ७२ हजार सैनिकलाई चुनावको सुरक्षाका लागि ब्यारेकबाट बाहिर निकालेको छ । राष्ट्रिय अनुसन्धान विभागले करिब ४ हजार सुरक्षाकर्मी परिचालन गरेको छ ।

चारवटै सुरक्षा संगठनबाहेक चुनावका लागि १ लाख म्यादी प्रहरीसमेत खटिएका छन् । यसरी स्थानीय चुनावका लागि चारवटै सुरक्षा संगठन र म्यादी प्रहरी गरेर २ लाख ५० हजारभन्दा बढी सुरक्षाकर्मी चुनावमा खटिएका छन् ।

मतदान केन्द्रमा मतदाताको लाइन मिलाउनेदेखि मतपेटिकाको सुरक्षाकाे पहिलो घेराकाे सम्पूर्ण जिम्मा नेपाल प्रहरीले गर्ने एसएसपी केसीले बताए । यसका लागि म्यादी प्रहरी पनि परिचालन हुनेछन् ।

सशस्त्र प्रहरी बल भने निर्वाचन केन्द्रको अधिकारीको सुरक्षादेखि निर्वाचन अधिकृतको निवास, मतपेटिकाको ओसारपसारसहित दोस्रो घेराको सुरक्षामा खटिनेछ । त्यस्तै, नेपाली सेनाको भूमिका तेस्रो घेरामा रहनेछ । सेनाले मतपेटिकाको ओसारपसारको सुरक्षादेखि पैदल गस्तीसमेत गर्नेछ । राष्ट्रिय अनुसन्धान विभागको भूमिका भने सूचना संकलन गर्ने र अरु सुरक्षा संगठनसँग समन्वय गर्ने हो ।

यो स्थानीय चुनावमा देशमा कुनै पनि ठूलो समूह भूमिगत रूपमा नरहेको र पछिल्लो समय नेकपा विप्लव समूह पनि शान्तिपूर्ण राजनीतिमा आइसकेका कारण सुरक्षा चुनौती नरहेको प्रहरीको विश्लेषण छ । यद्यपि, प्रहरी र अन्य तीनवटै सुरक्षा निकायसँग सुरक्षा अवस्थाबारे विश्लेषण गरेर प्रहरी परिचान भएको सुरक्षा अधिकारीहरूले बताएका छन् ।

सामान्य निर्वाचन केन्द्रमा तीन जना प्रहरी र पाँच जना म्यादी प्रहरी, संवेदनशील निर्वाचन केन्द्रमा तीन प्रहरी र सात म्यादी प्रहरी, अति संवेदनशील केन्द्रमा चार जना प्रहरी र १० जना म्यादी प्रहरी खटाइने प्रहरी प्रधान कार्यालयले जनाएको छ ।

त्यस्तै, महानगरमा चार जना सिनियर प्रहरी अधिकारी, उपमहानगरमा तीन जना, नगरपालिका र गाउँपालिकामा दुई/दुई जना खटाइने प्रधान कार्यालयले जनाएको छ ।

सुरक्षाकर्मीको मृत्यु भए आश्रित परिवारलाई २० लाख क्षतिपूर्ति

सरकारले निर्वाचनको सुरक्षामा खटिएको समयमा सुरक्षाकर्मीको मृत्यु भएमा आश्रित परिवारलाई २० लाख रुपैयाँ क्षतिपूर्तिस्वरुप उपलब्ध गराउने निर्णय गरेको छ ।

आइतबार बिहान बसेको मन्त्रिपरिषद् बैठकले निर्वाचनको सुरक्षामा खटिने म्यादी प्रहरीसहितका सुरक्षाकर्मीको मृत्यु भएमा आश्रित परिवारलाई २० लाख आर्थिक सहायता उपलब्ध गराउने निर्णय गरेको हो ।

‘निर्वाचन सुरक्षामा खटिएको समयमा सुरक्षाकर्मी (नेपाली सेना, नेपाल प्रहरी, सशस्त्र प्रहरी बल, राष्ट्रिय अनुसन्धान विभाग) तथा म्यादी प्रहरीको मृत्यु भएमा निजको आश्रित परिवारलाई २० लाख रुपैयाँ आर्थिक सहायता उपलब्ध गराउने,’ मन्त्रिपरिषद् बैठकको निर्णयमा भनिएको छ ।

त्यस्तै, बैठकले निर्वाचनका क्रममा घाइते भएका सुरक्षाकर्मी (नेपाली सेना, नेपाल प्रहरी, सशस्त्र प्रहरी बल नेपाल, राष्ट्रिय अनुसन्धान विभाग) तथा म्यादी प्रहरीको उपचारमा लागेको खर्च पनि सरकारले बेहोर्ने निर्णय गरेको छ ।

बैठकले हिमाली जिल्लामा खटिने म्यादी प्रहरीलाई प्रहरी जवानसरह जिल्लागत दररेटअनुसार रासनभत्ता उपलब्ध गराउने निर्णय पनि गरेको छ ।

प्रकाशित मिति: आइतबार, वैशाख २५, २०७९ १३:५१