श्रम मन्त्रालयको गरैजिम्मेवारीका कारण कन्सुलर र श्रम सहचारीको रोजगारदाता देशमै बिचल्ली

श्रम मन्त्रालयको गरैजिम्मेवारीका कारण कन्सुलर र श्रम सहचारीको रोजगारदाता देशमै बिचल्ली

A+ A A-

श्रम, रोजगार तथा सामाजिक सुरक्षा मन्त्रालयले यूएई, कतार, साउदी अरब र बहराइनमा कार्यरत कन्सुलर तथा श्रम सहचारीको समयावधि सकिए पनि फिर्ता बोलाएको छैन ।

यी देशमा कार्यरत कन्सुलर र श्रम सहचारीको माघ महिनामै करार अविध सकिएको थियो । तर, श्रम मन्त्रालयले कन्सुलर र श्रम सहचारीका लागि लिएको परीक्षाको नतिजा समयमा प्रकाशन गर्न नसकेको भन्दै चारवटा देशका कन्सुलर र श्रम सहचारीको समयावधि ३ महिना थपेको थियो ।

माघमा थपिएको समयावधि समेत वैशाखमा सकिएको छ । तर, श्रम मन्त्रालयले उनीहरूको समयावधि थपका लागि पत्रचार र फिर्ता बोलाउने चिठी नपठाउँदा यूएईमा श्रम सहचारी निर्मला थापा, साउदीमा जिवनकुमार राई, कतारका लागि कन्सुलर अनुज गौतम र बहराइनका लागि कन्सुलर दामोदार दाहाल अहिले नियोगमा हाजिर नगरी बसेका छन् ।

समय सकिएको एक महिनाभित्र स्वदेश बोलाउनुपर्ने व्यवस्था छ । तर, नियोगमा हाजिरै नगरी बसेका चारै जनालाई श्रम मन्त्रालयले निर्वाचनको आचारसंहिता लागू भएको भन्दै पत्रचार नगर्दा उनीहरू नियोगमै बिचल्ली भएर बसेको श्रम मन्त्रालयका एक कर्मचारीले जानकारी दिए ।

चारै जना नियोगमा काम र हाजिरसमेत नगरी बसेका छन् । यो विषयमा श्रम मन्त्रालय चासो नदिएको ती कर्मचारीले जानकारी दिए । करार सकिएका कर्मचारीलाई समयमा फिर्ता बोलाउन र उनीहरूलाई नियोगमै केही समय थमाउन सम्बन्धित मन्त्रालयले एक महिनाअघि नै पत्रचार गर्नुपर्छ तर, श्रम मन्त्रालयले दुवै काम नगर्दा उनीहरू अहिले कामविहीन भएर स्वदेश फर्किनसमेत नपाएको उनको भनाइ छ ।

कन्सुलर र श्रम सहचारीका लागि लिएको परीक्षाको नतिजा प्रकाशन गर्न ढिलो भएका कारण करार सकिएका कर्मचारी फिर्ता बोलाउन ढिलो भएको श्रम मन्त्रालयका प्रवक्ता डण्डुराज घिमिरेले जानकारी दिए । उनीहरूलाई निर्वाचन लगत्तै फिर्ता बाेलाउने उनको भनाइ छ ।

श्रम मन्त्रालयले कूटनीतिक मर्यादा नबुझ्दा श्रम कन्सुलर र श्रम सहचारी स्वदेश फर्किन पाएका छैनन् । कन्सुलर र श्रम सहचारीमा श्रम मन्त्रालयले परीक्षा लिएर श्रम मन्त्रालयकै अनुभावी कर्मचारी पठाउने गरेको छ । कन्सुलर र श्रम सहचारीले २ वर्ष नियोगमा काम गरी स्वदेश फर्किनुपर्ने कानुनी व्यवस्था छ ।

गत माघ महिनामा लिएको कन्सुलर र श्रम सहचारीको परीक्षाको नतिजा श्रम मन्त्रालय चार महिनासम्म प्रकाशन गर्न सकेको छैन । जसका कारण कतिपय रोजगारदाता देशमा कन्सुलर र श्रम सहचारीको पद रिक्त छ ।