दार्चुलामा एमालेले जितेका तीन पालिकामा माओवादी भिड्दै, एमालेलाई विरासत जोगाउनै चुनौती

दार्चुलामा एमालेले जितेका तीन पालिकामा माओवादी भिड्दै, एमालेलाई विरासत जोगाउनै चुनौती

A+ A A-

०७४ को स्थानीय चुनावमा दार्चुलाका नाैमध्ये तीन पालिकामा जितेको एमालेलाई यसपालि भने साख जोगाउन कठिन देखिएको छ । जिल्लाका सबै स्थानीय तहको वडातहसम्मै नेपाली कांग्रेस र माओवादी केन्द्रले गठबन्धन गरेपछि एमालेलाई आफूले जितेका पालिकामै जित निकाल्न हम्मेहम्मे परेको हो ।

यसअघिको चुनावमा एमालेले अपिहिमाल, नौगाड र लेकम गाउँपालिकामा जित हासिल गरेको थियो । माओवादी केन्द्रले एउटा मात्रै स्थानीय तह मार्मा गाउँपालिकामा जितेको थियो । कांग्रेसले भने महाकाली नगरपालिका, शैल्यशिखर नगरपालिका, मालिकार्जुन गाउँपालिका, दुहुँ गाउँपालिका र व्याँस गाउँपालिका गरेर पाँच तह जितेर स्थानीय सरकार चलाएकाे थियाे ।

कांग्रेस-माओवादी वडा तहसम्मै गठबन्धन गरेका चुनामी मैदानमा उत्रिएका कारण आफ्ना उम्मेदवार विजयी हुनेमा गठबन्धनका उम्मेदवार आशावादी छन् । नौ स्थानीय तहमध्ये एमालेले जितेका तीनवटै तहमा गठबन्धनले माओवादी केन्द्रका उम्मेदवार मैदानमा उतारेकाे छ ।

एमालेले जितेको अपिहिमाल गाउँपालिकामा गठबन्धनको तर्फबाट माओवादी केन्द्रका भगत सिंह ठेकरे उम्मेदवार बनेका छन् । २०७४ को चुनावमा उनी एमालेका धर्मानन्द मन्यालसँग पराजित भएका थिए । कांग्रेस भने तेस्रो स्थानमा थियो । मन्याल १ हजार २४९ मतका साथ विजयी भएका थिए ।

माओवादी केन्द्रले ९ सय ८८ मत र कांग्रेसले ९ सय २२ मत प्राप्त गरेका थिए । यसरी दुवै पार्टीको यसअघिको मत संख्या हेर्दा १ हजार ९ सय १० हुन्छ । जुन एमालेले यसअघि पाएको मतभन्दा ६ सय ६१ मतले गठबन्धन अगाडि देखिन्छ । एमालेले अपिहिमाल गाउँपालिकामा पुरानै उम्मेदवार मन्याललाई नै दोहोर्‍याएको छ ।

गठबन्धनबाहेक अपिहिमाल गाउँपालिकामा एकीकृत समाजवादी पार्टीका अध्यक्ष कमलेश सिंह रोकायले पनि उम्मेदवारी दिएका छन् । तर, पालिकामा समाजवादीको प्रभाव न्यून देखिन्छ ।

अपिहिमालपछि एमालेले नौगाड गाउँपालिकामा जितेर स्थानीय सरकार चलाएकाे थियाे । एमोलबाट प्रेमसिंह धामीले २ हजार २ सय ८९ मत ल्याएर अध्यक्ष बनेका थिए । कांग्रेसको १ हजार ८ सय १६ तथा माओवादी केन्द्रले १ हजार ५ सय ३३ मत ल्याएको थियो । यसरी २०७४ को चुनावकाे मतभारलाई हेर्दा नौगाड गाउँपालिकामा एमालेको भन्दा गठबन्धनको मत १ हजारले बढी छ ।

नौगाड गाउँपालिकामा पनि एमालेले पुरानै उम्मेदवारलाई दोहोर्‍याएको छ । गठबन्धनको तर्फबाट माओवादी केन्द्रका दलजित सिंह धामीलाई उम्मेदवार बनाइएको छ । त्यस्तै, २०७४ मा लेकम गाउँपालिकामा एमालेका परमानन्द जोशी २ हजार २ सय ३५ मत ल्याएर अध्यक्षमा निर्वाचित भएका थिए । यो पालिकामा कांग्रेसले २ हजार १ सय ३५ र माओवादी केन्द्रले १ हजार ५७ मत ल्याएका थिए ।

यो पालिकामा पनि दुवै पार्टीको मत जोड्दा एमालेभन्दा ९५७ मत ज्यादा हुन्छ । लेकम गाउँपालिका एमालेका उम्मेदवारविरुद्ध गठबन्धनले माओवादीका रामदत्त जोशीलाई उभ्याएको छ । एमालले भने पुरानै उम्मेदवार जोशीलाई नै दोहोर्‍याएको छ ।

एमालेका उम्मेदवार जोशीले योपटकको चुनावमा पनि आफू नै विजयी हुने दाबी गरेका छन् । ‘यसपालिको चुनावमा गठबन्धन भएका कारण केही गाह्रो त छ नै तर गठबन्धनमा केही असन्तुष्टहरूको मत हामीले पाउँछौँ । त्यसैले टक्कर भए पनि अन्तिममा हामीले नै जित्छौँ’, जोशीले भने ।

नौगाड गाउँपालिका गठबन्धनका उम्मेदवार दलजित सिंह धामी माओवादीले अध्यक्ष पाएका सबै पालिकामा कार्यकर्ता तहसम्मै गठबन्धनको उम्मेदवारलाई जिताउनुपर्छ भन्ने भावना पाएको बताउँछन् । ‘गठबन्धनका सबै नेता/कार्यकर्ता चुनावी घरदैलौ कार्यक्रममा छौँ । गठबन्धनका कार्यकर्ताबाट कुनै धोका हुँदैन । पहिला एमालेले जितेको ठाउँमा एमाले पार्टी फुटका कारण पनि आफैँ कमजोर भएको छ,’ धामीले भने ।

कांग्रेसले भने यसअघिको चुनावमा जित हात पारेका दुई नगरपालिकासहित पाँच स्थानीय तहमा आफ्नो उम्मेदवारी दिएकाे छ । नौ स्थानीय तहमध्ये दार्चुलामा पाँच कांग्रेस र चार माओवादीको भागमा परेको थियो ।

दुहुँमा कांग्रेसका पुलेन्द्रबहादुर कार्कीसँग एमालेका नरेन्द्र बडाल, व्याँस गाउँपालिकामा कांग्रेसका दिलीपसिंह बुढाथोकीसित एमालेका मंगलसिंह धामी, मालिकार्जुन गाउँपालिकामा कांग्रेसका नरेन्द्रसिंह धामीसँग एमालेका हीरा धामी प्रतिस्पर्धामा छन् ।

त्यस्तै, दुईवटा नगरपालिका शैल्यशिखरमा कांग्रेसका अमरसिंह धामीसँग एमालेका विजय धामी र सदरमुकाम खलंगास्थित महाकाली नगरपालिकामा कांग्रेसका हंसराज भट्टसँग एमालेका नैनसिंह चैसेर चुनावी मैदानमा छन् । यसअघि पनि यी स्थानीय तहमा कांग्रेस उम्मेदवार विजयी भएका थिए ।

प्रकाशित मिति: बिहीबार, वैशाख २२, २०७९ १७:०७