पालिका अध्यक्षमा एसको अग्रता, ४५ वडाअध्यक्षमध्ये कांग्रेस एमाले समान (सूचीसहित)

पालिका अध्यक्षमा एसको अग्रता, ४५ वडाअध्यक्षमध्ये कांग्रेस एमाले समान (सूचीसहित)

A+ A A-

३० वैशाखमा हुने स्थानीय चुनावअघि नै देशभरबाट ३५३ जनप्रतिनिधि निर्विरोध निर्वाचित भएका छन् । यसमध्ये ५२ जना अध्यक्ष, उपाध्यक्ष र वडाध्यक्ष निर्वाचित भएका छन् ।

निर्वाचन आयोगले हालसम्म अध्यावधिक गरेको तथ्यांकअनुसार अध्यक्ष, उपाध्यक्ष र वडाध्यक्षमा ५२ जना निर्विरोध निर्वाचित भएका छन् । जसमध्ये अध्यक्ष ३ जना, उपाध्यक्ष ४ जना र ४५ जना वडाध्यक्ष रहेका छन् ।

२०७४ को चुनावमा निर्विरोध निर्वाचित हुने अध्यक्ष, उपाध्यक्ष र वडाध्यक्षको संख्या ६२ थियो भने अहिले १० कम देखिएको हो ।

निर्वाचन आयोगका प्रवक्ता शालिगग्राम पौडेलले एक जनाको मात्रै उम्मेदवारी परेकाहरू निर्विरोध भएको बताएका छन् । अघिल्लो चुनावमा अर्को उम्मेदवारले पछि उम्मेदवारी फिर्ता लिएको कारणले पनि निर्विरोध निर्वाचित भएका थिए ।

अध्यक्षमा पहिलो एकीकृत समाजवादी

देशभरका ७५३ स्थानीय तहमध्ये ३ वटा पालिका अध्यक्षमा निर्विरोध निर्वाचित हुँदा नेकपा एकीकृत समाजवादीका उम्मेदवार २ वटा पलिकामा निर्विरोध निर्वाचित भएका छन् ।

उपाध्यक्ष र वडाध्यक्षमा एमालेका बढी उम्मेदवार निर्वाचत भए पनि अध्यक्षमा भने एकीकृत समाजवादीका उम्मेदवार बढी देखिएका हुन् ।

एकीकृत समाजवादीका तर्फबाट २ पालिका अध्यक्ष, एक उपाध्यक्ष र ६ वडाअध्यक्ष निर्वाचित भएका छन् ।

हेर्नुस् एकीकृत समाजवादीबाट निर्विरोध निर्वाचित भएकाहरूको सूचीः

उपाध्यक्षमा एमाले अगाडि

निर्विरोध निर्वाचित हुने उपाध्यक्षमा भने एमाले अघि छ । ४ वटा उपाध्यक्ष निर्विरोध निर्वाचित हुँदा एमालेको तर्फबाट २ जना निर्वरोध निर्वाचित भएका छन् ।

त्यस्तै पालिका अध्यक्षमा एक र १६ वटा वडाका वडाध्यक्षमा एमाले उम्मेदवार निर्विरोध निर्वाचित भएका छन् ।

एमालेबाट निर्विरोध निर्वाचितको सूचीः

कांग्रेसका १६ वडाध्यक्ष निर्विरोध

निर्विरोध हुने वडाध्यक्षमा भने कांग्रेस एमाले समान रहेका छन् । ४५ वडाध्यक्ष निर्विरोध निर्वाचित हुँदा कांग्रेसको तर्फबाट १६ जना निर्विरोध भएका छन् ।

पालिका अध्यक्षमा कांग्रेसको तर्फबाट निर्विरोध कोही हुन सकेको छैन भने एउटा उपाध्यक्षमा कांग्रेस निर्विरोध भएको छ ।

निर्विरोध भएका कांग्रेस उम्मेदवारको सूचीः

यता माओवादी केन्द्र र स्वतन्त्रका उम्मेदवार गरी अन्य ७ जना वडाध्यक्ष पनि निर्विरोध निर्वाचित भएका छन् । नासोँ गाउपालिका वडा नं. ४, धवलागिरी गाउँपालिका वडा नं. १ र चुमनुव्री गाउँपालिका वडा नं. ६ मा माओवादी केन्द्रका उम्मेदवार क्रमश: धर्मजंग गुरूङ, झकबहादुर छन्त्याल र सरोज लामा निर्विरोध निर्वाचित भएका हुन् ।

स्वतन्त्रबाट भने नार्पाभूमि ४ र ५ मा क्रमश: कर्म ग्यान्जे लामा र सोनम तेजे लामा निर्वाचित भएका छन् । त्यस्तै मनाङ ङिस्याङ वडा ३ र ९ बाट क्रमश: कृष्ण लामा र च्योप्ला गुरूङ निर्विरोध निर्वाचित भएका छन् ।

निर्वाचन आयोगले कतिपय स्थानीय तहको तथ्यांक अझै अध्यावधिक गराउन सकेको छैन । अध्यावधिक गरिएको मध्ये देशभर ५२ जना अध्यक्ष, उपाध्यक्ष र वडाध्यक्ष निर्विरोध भएको पाइएको छ भने ३०० जना सदस्य निर्विरोध निर्वाचित भएका छन् ।

प्रकाशित मिति: बुधबार, वैशाख २१, २०७९ २०:२६